Read xamtanga ይዃንስት እትለ 19 Bible Online

ይዃንስት እትለ 19 - xamtanga bible

ይዃንስት እትለ 19

¹እንዝ ግረ ንቕፀው ኽዝቭዙ ድመ ተከው ድመ ሲመይስ፦ «ኻልየ ሉየ![3] ቓዘነው፣ ክቭር፣ ኻይል ይናኣምላክቱ የጝ።

²ጝፍርድድ እማን፣ ጭቅየውም የጝ፤ ጝርሽርሙጥነይዝ ዝቨየንት ኣርክስረይ ኽይረይ ገልምተየንት ፊርድኩ፤ ጝኣገልጋያኒዝ ብርድም ቢቅልሽኩ» ያንድ ወጩን።

³እንደ ገነም፦ «ኻልየ ሉየ ጝርጊስ ፈው ጥየድ ዘላልም ኣልም ኣሽ ፉጡ» ይ።

⁴ለርን ሲዘ ሽመቅሊዝመ ሲዘ እንሰሲዝም ዙፋኒል ጐየው ኣምላኪዝ፦ «ኣሚን! ኻልየ ሉየ» ይጛ ጝታግምባሪዝ ደፋሽጝ ሲግድ።

⁵እንዝ ግረ ዙፋኒስ፦ «እፈ ጝኣገልጋያን ክታትርነ! ጝት ጐውትርነቅም ክታትርነ! ፅጕርነቅድም፣ ኽይርነቅድም ክታእጝቅቅ ይናኣምላክት ሚዝየንዝጥን» የው ድመ ፉ።

⁶ቈሽም ንቕፀው ኽዝቭዙ ድመ፣ ኽየው ኣቘ ገፍዙ ድመ፣ ነጐድጓድዙ ድመ ተከው ድመ፣ እንት ያንድ ወጩን፦ «ኻልየ ሉየ እጝቅትቅ ቸለው ኣደረ ኣምላክ ኒግስኩ።

⁷ቢገይዙ ቅየንድ ችጛንስቅ፣ ጝስሪሸንም ጝርቕምት ኣስልዳንስቅ፣ ዲስ ይነ፤ ቓናዝንም ዲስ ይነ፤ ጝጭስም ክቭር ይውነ።

⁸ብርቕርቕ የው ንፅዅ ፃረው ኻረ ኣልቨ ሲትራንስ ጝርጭስ ይውሽቱ» ፃረው ኻር ኣልቨድ ቅዱሳኒዝ ፅድቅዙ ሰቭድ የጝ።

⁹መላክድም ይት፦ « ‹ቢገይዙ ቅየኒዝ ድግሲል ጭጝሸቍ እቅ ቀቫሸቍ ጛይ› ይር ፃፍ» ዩ፤ መላክድም ቈሽ፦ «እንዛይ እማንተቍ እደረት ቃላን ጛይ» ዩ።

¹⁰ያንም ጝጭስ ሲግድጨ ጝልኲል ሊቩን፤ ጘጝ ኣቓንድ፦ «በጭ! እኒንት ፃቭተ! ያንም ክጅቅ፣ እየሱስት ሚዝርነይድ ፃየቍ ክፅኒጅቅም ኣገልጋይ የጝ፤ እደረስ ሲግጭ፤ እየሱስት ሚዝርነይድ ትንቪትዙ መንፈስ የጝ» ዩ።

¹¹እንዝ ግረ ሲመይ ቢት ቓሉን፤ ጝግልም እንወ ላው ፃረው ፊርዘ ዊኑ፤ ጘጝ ፊርዘይልም፦ «ኣምንሸው፣ እማንተው» የነው ድቃር ዊኑ፤ ጘጝም ጭቅተ ፊርደኵ፤ ጣይሸኵም።

¹²ጝእልጣንድ ልየ ነቨልቫል ተከቍ ጛይ፤ ጝኣውሪልም ንቕፀቍ ዘውዳን እኵ፤ ጘጝ ኣቕሽጚ ላየ ኣውማውቅ ኣርቓው ሽ ጝዲጊል ፃፍሽ ዊኑ።

¹³ጘጝም ብርዝ ናኽርሸው ኣልቨ ሲር ዊኑ፤ ጝሽድም፦ «እደረት ቃል» የነው የጝ።

¹⁴ሲመይትቍ ሰራዊታንም ንፅዅ ፃረው ኻር ኣልቨ ሲርጝ ፃረቍ ፋርፅል ጐይጝ ጝት ቲክንጛ ዊን።

¹⁵ኣኽዛቫንድ ጣዘነው ስለታም ሰይፍ ጝምቸይስ ፈኵ፤ ብረትዙ ግብዝም ጛት ቅመኵ፤ ጘጝ እጝቅትቅ ቸለው እደረቱ ወይን ድቝዘነድየንት ደደኵ፤ እንም እደረቱ ብርቱ ቍጠድ የጝ።

¹⁶ጝኣልቨይዝመ ጝዲቢዝም፦ «ንጕሳኒዝ ንጕስ፣ ኣደርጢዝ ኣደረ» የው ሽ ፃፍሽኩ።

¹⁷እንዝ ግረ ላው መላክ ኰረይዝ ዲጊል ችብር ቓሉን፤ ጘጝም ሲመይቱ ቢረቍ ዚልቅድዛት፦ «ላቝጥን እደረቱ ኽየው ድግሲል ኣኽቭጭጥን።

¹⁸ንጕሳኒዙ ስየድ፣ ጠውር ኻልቅጢዙ ስየድ፣ በርታቐቍ ዊተድሪዙ ስየድ፣ ፋርፂዝመ ፈረስኝጢዝዙ ስየድ፣ እኒዝጘም ኣውማው እጅሪዙ ስየድ፣ የነትም ጭዊዝመ በሪዝዙ ስየድ፣ ኽየቊዝመ ፅጐቊዝዙ ስየድ ዅጥን» የው ኽየው ድመዝ ቓፁ።

¹⁹እንዝ ግረ ኣረዊቲዝመ ዝቨይዝቍ ንጕሳኒዝ ጝታዊተድርድም ኣቕጝ ፃረው ፊርዘይል ጐየዊዝመ ጝሰራዊቲዝ ጋጥምጥጘ ኣኽቭሽጝ ቓሉን።

²⁰ዊገድ ግን ኣረዊትድ ፃይሹ፤ ጝጅቅም ጝበዊል ንቕፀቍ ምልክታን ፃቫ ዊነው ኻሽወረ ነቭይድ ፃይሹ፤ ጘጝ ኣረዊቲዙ ምልክትድ ለምረቊ፣ ጝምስሊልም ሲግደቍድዛት ቀሰውድ እንዛይ ምልክታኒዝ የጝ፤ ጝታቪልቅ ዲንዝ ኻውየው ለየዙ ባኽሪል ጝታርዅየዝ ፅብጛ ማልሽት።

²¹እዳቐቍድ ቈሽ ፊርዘይል ጐየዊዙ ምቸይስ ፈው ሰይፊዝ ቍዉሽት፤ ዚልቅድም እጝቅቅ ጝታስየድየንት ዅጝ እፍት።