Read xamtanga ይዃንስት እትለ 2 Bible Online

ይዃንስት እትለ 2 - xamtanga bible

ይዃንስት እትለ 2

¹«እፊሰውን ፅብረይ ምከንሸንት መላኪዝ እንት ይር ፃፍ፦ «ላጝጠ ፅግልውጥድዛት ጝናኒዝ ፃየውድ፣ ላጝጠ ዊርቀዝቍ መቅረዛኒዝ ማኽሊዝም ወጥርጥረውድ እንት የኵ፦

²‹ክሰቭድ፣ ክልቕረድ፣ ክኣቕልድ ኣርቐኵን፤ ጭቕ እቅድዛትም ቸለል ይር በሪረር ኣረጘ፣ ኻወርየታን ኣቒጝቀ፦ «ይን ኻወርየታን የጝ» የቍድዛትም ሚርምርድር ኻሽወጥ ኣቕጝ ችጝረጘ ኣርቐኵን።

³ቈሽም ኣቕልዝ ፀናረጘ፣ ይሽⶔዝ ማጥንም ሚከረ ለምትረጘ ኣርቐኵን፤ እንዝቅ ዝላቒረርም።

⁴ኣነጚ ያን ክት ኒቕፈው ላው ዊገ እኩ፤ እንም በውገቱ ክፍቅርድየንት በትርኵሩ።

⁵ነስየ ኣወየው ስፍረይስ ሊቭረጘ ትዝ ይ፤ ንስኻ ጥውር በውገ ሰራሽራ ዊንደው ሰቭድየንት ፃቭ፤ ንስኻ ጥዊረውዝየ ግን ተጥ ክመቅረዝድየንት ጝስፍረይስ ፊስጭር።

⁶ዊገድ ግን ክት ሚዝየንሰው ላው ዊገ እኩ፤ ያን ሽክጠው ኒቈላኒዙ ሰቭድየንት ክትም ሽክትርኵሩ።›

⁷«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ፤ ድል ፃቨዊዝ እደረት ገነቲል ፅበው ርዅየዙ ዘፊስ ዅጠ ፃቭጭር።»

⁸«ሰምርነስ ፅብረይ ምከንሸንት መላኪዝ እንት ይር ፃፍ፦ «ኪርመነዝመ ኻትሸነዝ ኣቐውድ፣ ክር ዊነውድ፣ ፅበውም ኣቐውድ እንት የኵ፦

⁹‹ክሚከረይዝመ ክድኽቲዝ ኣርቐኵን፤ ኣነጚ ክት ኻፍታም የጝ፤ ኣይዅዳን ኣዪጝቀ፦ «ይን ኣይዅዳን የጝ» ይጛ ክሽድ ጨቀቍድዛት ኣርቐኵን፤ ጛይ ሲጣንዝ ማኽቨርትኝጥ ጛይ።

¹⁰ነስየ ክግል ችጝጡ ሚከረድየንት ጐውተ፤ እንወ ዳቪለውስ ክታት ፊትንጠ ክታጊስ ላውላውድ ወኽኒ ጝንል ድውጡ፤ ፅቃ ግርቅም ሚከረ ልምርትርንቅ፤ ክረነውል ኣሽቅ ኣምንሽትረር ኣቕ፤ ያንም ርዅየዙ ኣክሊል ክጭስ ነቅጭር።›

¹¹«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ፤ ድል ፃቨውድ ሊጘትረ ክርጘይዝ ቘይሻውም።»

¹²«ቢርጋሙን ፅብረይ ምከንሸንት መላኪዝ እንት ይር ፃፍ፦ «ሊጘይዝቅ ቀቨው ስለታም ሰይፍ ፃየውድ እንት የኵ፦

¹³‹ሲጣንዙ ዙፋን ፅበው ስፍረል ፅብረር ኣረጘ ኣርቐኵን፤ ኣቕሽም ይሽድ ኪው ሽር ፃይርኵሩ፤ ሲጣን ፅበው ጘጝ ኻትመይስ ቍዉሽተው ኣምንሽተው ይሚዝር ኣንቲባስ ዊነው ዚምኒዝ እኳ ይግል ፃይረው እምንትድየንት ኻድዪረርም።

¹⁴ኣነጚ ያን ክት ኒቕፈቍ ዊትቍ ዊቅ እኵ፤ እስራየላንድ ጣወትዝ ሲውኑ ስየድየንት ዅጛንስመ ሻርሙጥጛንስ ማጥን ጝታበዊል ፅጋ እቝርጠ ባላቅት ክንሰው በለኣምት ክንድጝድ ቲክነቍ ላው ላው እቅ ክማኽሊል እኵ።

¹⁵ኒቈላነ ክንድጝድየንትም ቲክነቍ ላው ላው እቅ ጝግል እኵ።

¹⁶እንዝ ማጥን ንስኻ ጢ፤ ንስኻ ጥዊረውዝየ ግን በውዝ ተጭር፤ ይምቸይስ ፈው ሰይፊዝም ጛት ሲቭጭር።›

¹⁷«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ፤ ድል ፃቨዊዝ ሲውርሸው መነይስ ይውጭር፤ ቈሽም ጝት ለምረው እጅሪዝለ ላየ ኣውማውቅ ኣርቓው ኣይር ሽ ፃፍሸው ፃረው ቕርጘ ይውጭር።»

¹⁸«ትያጥሩን ፅብረይ ምከንሸንት መላኪዝ እንት ይር ፃፍ፦ «ልየ ለቕላቐ ተከቍ እልጣንዝመ ኽየው ልጂዙ ኻኽመዝ ብረው ብረት ተከቍ ልኵጣንዝ ፃየው እደረት ዅር እንት የኵ፦

¹⁹‹ክሰቭድ፣ ክፍቅርድ፣ ክእምንትድ፣ ክኣግልግለውትድ፣ ክኣቕልድ፣ ኣርቐኵን፤ ቈሽም ከሰቭድ በውገትዊስ ሽ ነንትውድ ዲቍጠጘ ኣርቐኵን።

²⁰ኣነጚ ያን ክት ኒቕፈው ዊገ እኩ፤ «ያን ነቭይ የጝ» ይረይ እውነ ይልዛቪልት ቸለል ይር በትርኵሩ፤ ጚ ይኣገልጋያንድ ሻርሙጥጛንስመ ጣወትዝ ሲውሸው ዅረድየንት ዅጛንስ ማጥን ጝርክንድጚዝ ቀሰች።

²¹ጝርሽሙጥነይስ ንስኻ ጥውራንስ ማጥን ጝርጭስ ግርየ ይው ዊኑን፤ ጚ ግን ንስኻ ጥወነው በኒረይም።

²²እንዝ ማጥን ጝርግል ሚከረ ነስጭር፤ ጝርጅቅ ሻርሙጠቍድዛትም ጝርጒደነይስ ዋጥርጝ ንስኻ ጥዊጘውዝየ ጛግል ኽየው ስቃይ ጊምዝጭር።

²³ጝርቝርትም ክርጘዝ ቐፃጭር፤ ኣይንድ ምከንጣንድቅ ያን እዘንዝመ ኵላሊትዝ ሚርምረር ኣቐጘ ኣርቕጥቍ፤ ክታይተእጝቅዝቅም ክታይተሰቪዝጘ ኪፍልጭር።›

²⁴« ‹ጝርክንድጝድየንት ቲክኒርነቅ፣ ሲጣንዙ ጥልቅ ምስጢር ይሽተውድየንትም ለምሪርነቅ ትያጥሩን ፅበርነቅ ክታጭስ ግን፣ ላየ ምውር መውሰቅም።

²⁵ኽሽስ ያን ተጪስቅ ክታፃይርነውድየንት ኪውሽርን ሊሚድጥን።

²⁶ድል ፃቨዊዝመ ይሰቭድየንት ኻትሸነይል ኣሽ ፋፅመዊዝቅ፣ ጝጭስ ኣልሚዙ ኽዝቭድየንት ቅመነው ስልጣን ይውጭር።

²⁷ጘጝም ጛት ብረትዙ ግብዝ ቅምጡ፤ ሻኽለይዝጘም ቃጥቅጥጡ፤ እንም ልክ ያን ይርቲስ ስልጣን ለምጠዊዝጘ የጝ።

²⁸ቅሸን ብየም ጝጭስ ይውጭር።›

²⁹«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ።»