Read xamtanga ይዃንስት እትለ 20 Bible Online

ይዃንስት እትለ 20 - xamtanga bible

ይዃንስት እትለ 20

¹እንዝ ግረ ጥልቅ ቢⶔዙ ብዘነ ቝልፍዝመ ኽየው ሰንሰለትዝ ጝናኒዝ ፃየው መላክ ሲመይስ ጊማንድ ቓሉን።

²ኽየሲቭረድየንትም ፃይ ሽኽ ምት እፅቁ፤ እኒን ኽየሲቭረድም ዳቪለውስ ዊንም ሲጣን ይሽተው ኽፅምቱ ሲቭረድ የጝ።

³ሽኽ ምትድም ፋፅምሽጥጚስቅ ነስየ ኽዝቫንድዛት ቀሳየጘ መላክድየን ጝት ጥልቅ ቢⶔል ማሉ፤ ቢድየንትም ዲቭ ማኽተምዝ ኣሽጉ፤ ጝዝ ግረ ዊትቍ ግርቅዝ እኪትጠ ጥውሸኵ።

⁴እንዝ ግረ ዙፋናን ቓሉን፤ ዙፋናኒልም ፊርድጥጘ ስልጣን ይውሽተቍ እቅ ጐይጝ ዊን፤ ቈሽም እየሱስት ሚዝርነይዝቍዝመ እደረት ቃሊዝቍዝ ጝታኣውርድ ቀቭሽትጝ ክረቊዝ ኒፍሳንድዛት ቓሉን፤ ጛይ ኣረዊቲዝ፣ ዊንም ጝምስሊዝ ሲግዲየቍም፤ ጝምልክትድየንትም ጝታግምባሪልም ኣነ ጝታናኒል ፃቪየቍም፤ ጛይ ክርጘይስ ጕጝ ክርስቶስ ጅቅ ሽኽ ምት ኒግስ።

⁵እንም በውረ ክርጘይስ ጐነድ የጝ፤ ክረቍ ላጥድ ግን ሽኽ ምትድ ኻትሽጥጚስቅ ክርጘይስ ጕየቍም።

⁶በውረ ክርጘይስ ጐነይዝ ጐቍድ ቀቫሸቍ፣ ቅዱሳንም ጛይ፤ ሊጘትረ ክርጘድ ጛግል ስልጣን እጀውም፤ ዊገድ ግን እደረስመ ክርስቶስስት ካኽነጣን ኣጥቍ፤ ክርስቶስ ጅቅም ሽኽ ምት ኒግስጥቍ።

⁷ሽኽ ምትድ ኻትሽጛንድም ሲጣንድ ጝእፁሸዊስ እኪትጡ።

⁸ዝቨይዙ ሲዘ ማይዘኒል ፅበቍ ኽዝቫንድዛት የነትም ጐጕስመ ማጐጕስ ቀሳ ኣጭነል ሲልፍዝጠ ፍጡ፤ ጝታእግዘድም ባኽር ደዪይዙ ሽነይዝጘ የጝ።

⁹ጛይም ዝቨይልቅ ቢትንሽጝ ቅዱሳንድ ሲፍርጘው ስፍረይዝመ ቀንሽረይ ኻትመየንስ ኪብ፤ ዊገድ ግን ጛት ሲመይስ ልየ ጊም ኹ።

¹⁰ጛት ቀሰው ዳቪለውስም ኣረዊቲዝመ ኻሽወረ ነቪዪዝ ፅብጘው ልየይዝመ ዲኒዙ ባኽሪል ማልሽቱ፤ ጛይም ጝግል ዘላልም ኣልም ኣሽ ተሰቃይሽጥቍ።

¹¹እንዝ ግረ ኽየው ፃረው ዙፋን፣ ጝዲጊልም ጐየውድየንት ቓሉን፤ ዝቨስመ ሲመይስም ጝበዊስ ሰይ፤ ጛጭስም ስፍረ ችጝሺየውም።

¹²ክረቍ ኽየቍ ፅጐቍድቅ ጝዙፋኒዝ በዊል ችብርጝ ቓሉን፤ መፃፋንም ቢት፤ እንደ ገነም ርዅየዙ ላየ መፃፍ ቢቱ፤ ክረቍድም መፃፋኒዝ ፃፍሽት ችጝሸው ጝታሰቪዝጘ ፍርድ ለምር።

¹³ባኽርድም ጝኣቒል ዊነቍ ክረቍድዛት ይዉ፤ ክርጘዝመ ሲወልስም ጝታግል ዊነቍ ክረቍድዛት ይው፤ ጝታይተእጝቅቅ ጝታይታሰቪዝጘ ጝታይተፍርድድ ለምር።

¹⁴ክርጘዝመ ሲወልስም ልየዙ ባኽሪል ማልሽት፤ እኒን ልየዙ ባኽርድም ሊጘትረ ክርጘድ የጝ።

¹⁵ጝሽድ ርዅየዙ መፃፊል ፃፍሽት ችጝሺየውድቅ ልየዙ ባኽሪል ማልሽቱ።