Read xamtanga ይዃንስት እትለ 21 Bible Online

ይዃንስት እትለ 21 - xamtanga bible

ይዃንስት እትለ 21

¹እንዝ ግረ ኣይር ሲመይዝመ ኣይር ዝቨስ ቓሉን፤ በውረ ሲመይዝመ በውረ ዝቨየንስ ዲቍጝኵነ፤ ባኽርም ነስየይስ ፅባውም።

²ቅድስት ኻትመ ኣይር እየሩሳልየምም ጝርጕርየስ ሺልምሽረይ ስሪትጘ ኣስልሽር ሲመይስ እደረቲስ ጊምራንድ ቓሉን።

³ቈሽም ዙፋኒስ ኽየው ድመ፦ «እንወ እደረት ጨነድ እቀ ማኽሊል የጝ፤ ጛጅቅም ፅብጡ፤ ጛይም ጝኽዝቭ ኣጥቍ፤ ጝቕም እደረም ጛጅቅ ፅብጡ፤ ጝታኣምላክም ኣጡ።

⁴እርⶓድቅ ጝታእልጣኒስ ኻዝጡ፤ በውገቱ ስረትድ ዲቋንስቅ ነስየይስ ክርጘ፣ ዊንም ኽዝን፣ ዊንም ሊዝ፣ ዊንም ስቃይ ዊናውም» ያ ፋንድ ወጩን።

⁵ዙፋኒል ጐየውድም፦ «እንወ እጝቅትቅ ኣይር ፃቭጭር» ዩ፤ ይትም፦ «እንዛይ ቃላንድ ኣምንሽተቍ፣ እማንተቍም ኣጛንስቅ ፃፍ» ዩ።

⁶እንደ ገነም እንት ዩ፦ «ፋፅምሹ፤ ኣልፈዝመ ወሚገዝ፣ ኪርመነይዝመ ኻተነይዝ ያን የጝ፤ ዝቛንደዊዝ ርዅየዙ ኣቘ ምኝጪስ ናፀዝ ይውጭር።

⁷ድል ፃቨውድ እኒንትቅ ዊርስጡ፤ ያንም ጝኣምላክ ኣጭር፤ ጘጝም ይዅር ኣጡ።

⁸ዊገድ ግን ጐቝንድ፣ እምንት እጀቍድ፣ ርኩሳንድ፣ ኒፍስ ቍወቍድ፣ ሸርሙጣንድ፣ ኣስማትኝጥድ፣ ጣወት ኣምልከቍድ፣ ኻሽወጥድቅ እጝቅቅ ጝታእድል ፊንተድ ዲንዝመ ልየዙ ባኽርል ማልሽተነው ኣጡ፤ እንም ሊጘትረ ክርጘድ የጝ።»

⁹ኻትሸነይዝቍ ላጝጠ መቅሰፍታንድ እቻቐቍ ላጝጠ ፅውጥድ ፃየቍ ላጝጠ መላካኒስም ላውድ ተር ይት፦ «ለው! ቢገይዝ እውነ ኣረይ ስሪሸንት ቓሊስጭር» ዩ።

¹⁰መንፈስዝም ይት ላው ኽየው ሊግዘው ኣበል ፊሱ፤ ቅድስት ኻትመ እየሩሳልየምም ሲመይስ እደረቲስ ጊምራንድ ይጭስ ቓሊሱ።

¹¹ጚይም እደረት ክቭርዝ ኣቭርኽራ ዊንች፤ ጝርብርኻኒዙ ድምቅትድም ጭቕጘ ኪብረው እየሰቢድ የነው ኪብረው ቕርጘይዝጘ፣ ምስታዊቲዝጘም ዊር የው ዊኑ።

¹²ፅጭ ሊጘ ሚል ፃየው ኽየው ሊግዘው ግምብዙ ኻፅር ፃይር ዊንች፤ ሚሊልም ፅጭ ሊጘ መላካን ችብርጝ ዊን፤ ሚሊልም ፅጭ ሊጘ እስራየላነ ነገዳኒዝ ሽድ ፃፍሽ ዊኑ።

¹³ሚልድም ምስራቂዝ ሻቘ፣ ሰሚኒዝ ሻቘ፣ ደቩቪዝ ሻቘ፣ ምራቪዝ ሻቘ ዊን።

¹⁴ኻትመየንቱ ግምብ ኻፅርድም ፅጭ ሊጘ መሰረታን ፃየው ዊኑ፤ ጛግልም ቢገይዝቍ ፅጭ ሊጘ ኻወርየታኒዝ ሽድ ፃፍሽ ዊኑ።

¹⁵ይጅቅ ዊግታ ዊነው መላክድም ኻትመየንስመ ጝርሚሊዝ፣ ጝርግምብ ኻፅርድየንትም ሊኪጠ ሊክየነው ዊርቀዙ ዚግ ፃይ ዊኑ።

¹⁶ኻትመየንም ጝርሊግዚዝመ ጝርፍራይዝ እኵለ ኣቕር ሲዘት ማይዘንት ዊንች። መላክድም ኻትመየንት ጝዚጊዝ ሊክዩ፤ ጝርሊግዝድም ሊጘ ሽኽዝ ሲዘላ ኪለው ሚትር[4] ኣጠ ኣቑ፤ ጝርፍራይዝመ ጝርቁመቲዝም ጘጝት ኣቑ።

¹⁷ኻትመየንት ግምብ ኻፅርድየንትም ሊክዩ፤ ጝቍመትድም መላክድ ሊክየው ኣረሰው ሊክየነይዝ ላዝ ኣርቭዝ ሲዘ ቈሪ ኣቑ።

¹⁸ግምብ ኻፅርድ ተሲተውድ እየሰቢድዝ ዊኑ፤ ኻትመየንም ምስታዊቲዝጘ ዊር የው ንፅዅ ዊርቀዝ ተስትረይ ዊንች።

¹⁹ኻትመየንት ኻፅሪዝቍ መሰረታንድም እጝቅት ኣይንት ኪብረው ቕርጘዝ ሺልምሸቍ ዊን፤ ጛይም በውረ ሚስርትድ እየሰቢድ፣ ሊጘትረድ ሰንቢር፣ ሸወትረድ ከልቀዱን፣ ሲዘትረድ መረግድ፣

²⁰ኣኰትረድ ሰርዱንክስ፣ ዋልጠትረድ ሰርዲወን፣ ላጝጠትረድ ክርስቲሉቪ፣ ሰውጠትረድ ብርሊ፣ ፃይጨትረድ ውራውርየ፣ ፅቃትረድ ክርስብራስስ፣ ፅጭ ለወትረድ ያክንት፣ ፅጭ ሊጘትረድ ኣመተስጢኑስ የነቍ ዊን።

²¹ፅጭ ሊጘ ሚልድቅ ፅጭ ሊጘ እቋን ዊን፤ ሚልድም ጝታይተእጝቅ ላው ላው እቍዝ ተሲተቍ ዊን፤ ኻትመየንት ኣውረ ጒደነድም ምስታዊቲዝጘ ብርኻን ቓሊሰው ንፅዅ ዊርቀዝ ተሲተው ዊኑ።

²²እጝቅትቅ ቸለው እደረስመ ቢገይዝ ጝርመቅደስ ኣጛንስቅ ኻትመየንትል ላየ መቅደስ ጝን ቓሊቀርም።

²³እደረት ክቭርድ ጝርስ ብርኻን ይዋንስቅ ቢገድም ጝርመቭራት ኣቓንስቅ ኰረ ዊንም ኣርቨ ጝርስ ኣቭርኽጥጘ በንዛውም።

²⁴ኽዝቫንድ ጝርብርኻኒዝ ፃጝጥቍ፤ ዝቨት ንጕሳንድም ጝታክቭርድ ጝርጐ ነስጥቍ።

²⁵ጝርግል ኻር እጀው ኣቓንስቅ ጝርሚልድ ኣውማው ግርቂዝቅ ዲቭሽታቍም።

²⁶ኽዝቫኒዙ ግርመይዝመ ክቭሪዝ ጝርግል ጥውጡ።

²⁷ቢገይዙ ርዅየዙ መፃፍዝ ፃፍሸቍድ ኣጝሽጚ ስኽፍሸው ዊገቅ ጝርግል ጥዋውም፤ ርኵስት ፃቨቍዝመ ኻሽት ዊግተቊዝም ስሪስቅ ጝርግል ጥዋቍም።