Read xamtanga ይዃንስት እትለ 22 Bible Online

ይዃንስት እትለ 22 - xamtanga bible

ይዃንስት እትለ 22

¹እንዝ ግረ መላክድ እደረቲስ፣ ቢገይዙ ዙፋኒስም ፈው ምስታዊቲዝጘ ዊር የው ርዅየዙ ኣቘ ዊርቨ ይጭስ ቓሊሱ።

²ዊርቨድም ኻትመየንቱ ኣውረ ጒደነይዝ ማኽለ ማኽል ሳንጥቅ ቅብራ ዊኑ፤ ዊርቨይዙ ለወዝይመ ፃግቪዝ ኣርፈ ኣርፈዝ ፍርዛ ኣምረይዝ ፅጭ ልን ፍርዘው ርዅየዙ ዘፍ ዊኑ፤ ዘፊዙ ኻፀድም ኽዝቫኒዝ ቓዘው ጥላ ዊኑ።

³ነስይስ ፍፅም እፀነው ኣቓውም፤ እደረስመ ቢገይዙ ዙፋንድ ኻትመየንትል ኣጡ፤ ጝኣገልጋያንድም ጝት ኣምልክጥቍ።

⁴ጝበውድም ቓልጥቍ፤ ጝሽድም ጝታግምባሪል ኣጡ።

⁵ነስየይስቅ ኻር ዊናውም፤ ምላሰንድም መቭራትዙ ዊንም ኰረዙ ብርኻን ጛጭስ በንዛውም፤ ኣደረ ኣምላክ ጛጭስ ኣቭርኽጡ፤ ዘላልም ኣልም ኣሽም ኒግስጥቍ።

⁶መላክድም ይት፦ «እንዛይ ቃላንድ ኣምንሽተቍ እማንተቍም ጛይ፤ ጝመንፈሲዝ ነቭያታንድዛት ዊግሰው ኣደረ ኣምላክ ጣቀት ግርየዝ ኣቐው ዊገድየንት ጝኣገልጛያኒዝ ቓሊስጠ ማጥን ጝመላክድየንት በርስኩ» ዩ።

⁷«እንወ በውዝ ተጭር፤ እኒን መፃፊዙ ትንቪቲዝ ቃልድየንት ሊሚደውድቅ ቀቫሸው የጝ።»

⁸እንዛት ወጨርድ ቓለርድም ያን ይዃንስ የጝ፤ እንዛት ወጫንድ ቓላንድም እንዛት ቓሊሰው መላኪዝ ሲግድጨ ጝሊኲል ደፋጩን።

⁹ጘጝ ግን፦ «በጭ! እኒንት ፃቭተ! ያንም ክጅቅ፣ ክፅን ነቭያታኒጂቅም እኒዝጘም እጝቅ እኒን መፃፊዙ ቃልድየንት ሊሚደቊጅቅ ኣገልጋይ የጝ፤ እደረስ ሲግጭ» ዩ።

¹⁰እንደ ገነም፦ «ግርየድ ችጛንስቅ እኒን መፃፊዙ ትንቪት ቃልድየንት ማኽተምዝ ዲቭተ።

¹¹ኣመፅኘድ ጝኣመፂዝ ፅብነ፤ ርኵስድም ጝእርኵስነይዝ ፅብነ፤ ፃድቅድም ጝፃድቅነይዝ ፅብነ፤ ቅዱስድም ጝቅድስነይዝ ፅብነ» ዩ።

¹²«እንወ ቃዝየዝ ተጭር፤ ይወየድ ይጅቅ እኩ፤ እጝቅዝቅ ጝሰቭ ጝሰቪዝጘ ኪፍልጭር።

¹³ኣልፈዝመ ወሚገዝ፣ በውረይዝመ እገረይዝ፣ ኪርመነይዝመ ኻትሸነይዝ ያን የጝ።

¹⁴«ርዅየዙ ዘፊል ችጛንስመ ጝርሚሊዝ ፃቭጝ ኻትመየንትል ጥውጥጘ መቭት ችጛንስ ማጥን ጝታኣልቨድየንት እቓሰቍድ ቀቫሸቍ ጛይ።

¹⁵ግፅጚዝጘ ርኵሳን ኣቐቍድ፣[5] ኣስማትኝጥድ፣ ሰሰኝጥድ፣ ኒቭስ ቍወትድ፣ ጣወት ኣምልከቍድ፣ ኻሽወነው ቀነቍዝመ ኻሽትዝ ፃጘቊድቅ እጝቅቅ ቢዘይል ኣጥቍ።

¹⁶«ያን እየሱስ እንዛይ ዊቅድዛት ሚዝርዳንስ ማጥን ይመላክድየንት ምከንጣኒል እፃቕኩን፤ ያን ዳዊትት ስር፣ ዚረም የጝ፤ ኣቭርኸው ቅሸን ቢየም የጝ።»

¹⁷መንፈሲዝመ ስሪሸንስ፦ «ለው» ይጘኵ፤ ወሸውድም፦ «ለው» ይነ፤ ዝቛንደውድቅም ተርነ፤ ርዅየዙ ኣቝም ናፀዝ ዝይነ።

¹⁸እኒን መፃፊዙ ትንቪት ቃልድየንት ወሸውድየንትቅ ጣጝቅቅሰኵን፤ ኣውማውቅ እኒን ቃሊል ላው ዊገ ቈሽሽ፣ እደረ እኒን መፃፊል ፃፍሸቍ መቅሰፍታንድዛት ጝጭስ ቈሽጡ።

¹⁹ኣውማውቅ እኒን ትንቪትዙ መፃፊል ፃፍሸው ቃሊስ ላው ዊገ ጒድልዝሽ እደረ እኒን መፃፊል ፃፍሸቍ ርዅየዙ ዘፊስመ ቅድስት ኻትመየንቲስ ጝእድልድየንት ጒድልዝጡ።

²⁰እንዛይ ዊቅድዛት ሚዝርደውድየን፦ «የይ! ቃዝየዝ ተጭር!» የኵ። ኣሚን፤ ኣደረ እየሱስወ! ለው!

²¹ኣደረ እየሱስት ፃገድ ክታእጝጅቅ ኣነ፤ ኣሚን።