Read xamtanga ይዃንስት እትለ 3 Bible Online

ይዃንስት እትለ 3 - xamtanga bible

ይዃንስት እትለ 3

¹«ሰርዲስ ፅብረይ ምከንሸንት መላኪዝ እንት ይር ፃፍ፦ «ላጝጠ እደረት መንፈሳኒዝመ ላጝጠ ፅግልውጢዛት ፃየውድ እንት የኵ፦ ‹ክሰቭድ ኣርቐኵን፤ ፅበው ይሽትር ጭጝሽረኵ፤ ዊገድ ግን ክትርኵሩ።

²ክሰቭድ ይኣምላክት በዊል ፍፅም ኣቕም ችጚቀር ኣቓንስቅ ነቃቕ፤ ክርጥጘ ጐቍ እዳቐቍ ዊትቍድዛትም ጣጝክርዝ።

³ነስየ ለምትረዊዝመ ወሽረው ክንድጚዝ ኣስክሽ፤ ጝጭስም ኣዚጭ፤ ንስኻም ጢ፤ ነቃቒሪሽ ግን ቓፅጘይዝጘ ክግል ተጭር፤ ኣውማው ሰቲዝ ክግል ተጨጘም ኣርቓርም።

⁴ዊገድ ግን ጝታኣልቨድየንት እምቝሲየቍ ዊትቍ እቅ ክጅቅ ጝግል ሰርድየስ እኵ፤ ጛይም ፃረው ኣልቨ ሲርጝ ይጅቅ ፃጝጥቍ፤ ምላሰንድም እኒን ጛጭስ ጥውሸው የጝ።

⁵ድል ፃቨውድም ጝታጘ ፃረው ኣልቨ ሲርጡ፤ ያንም ይርስመ ጝመላካኒዝ በዊል ጝሽድየንት ሚዝርድጭር፤ ጝሽድየንትም ርዅየዙ መፃፊስ ዲምስሰቅም።›

⁶«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ።»

⁷«ፊላደልፍየ ፅብረይ ምከንሸንት መላኪዝ እንት ይር ፃፍ፦ «ዳዊትት ቝልፍድየንት ጝናኒዝ ፃየውድ፣ ጘጝ ብዘውድየንት ኣውማውቅ ዲቭጠ ቸላው፣ ጘጝ ዲቨውድየንትም ኣውማውቅ ብዝጠ ቸላው፣ ቅዱስ፣ እማንተውም ኣቐውድ፣ እንት የኵ፦

⁸‹ክሰቭድ ኣርቐኵን፤ እንወ ኣውማውቅ ዲቭጠ ቸላው ቢተው ሚረ ክበዊል ፃቭኩን፤ ክኻይልድ ዊቱ ኣቐጘ ኣርቐኵን፤ ኣቕሽም ይቃልድ ሊሚድርኵሩ፤ ይሽድም ኻድዪረርም።

⁹እንወ ኣይዅዳን ኣቒጝቀ፦ «ይን ኣይዅዳን የጝ» የቍ ኻሽወቍ ሲጣኒዙ ማኽቨሪስ ኣቐቊ እቂስ ክጐ ተርጝ ክልኲዝ ሳይል ሊቭጝ ሲግድጥጘ፣ ያን ክት ቀነጘም ኣርቕጥጘ፣ ፃቭጭር።

¹⁰ኣቕልዝ ፃናራንስ ማጥን ያን ክጭስ ነቀው ይትዛዝድየንት ሊሚድራንስቅ፣ ያን ቈሽ ዝቨይል ፅበቍድዛት ፊትንጠ ኣልሚልቅ ተረው ሚከረዙ ግርየይስ ክት ሊሚድጭር።

¹¹በውዝ ተጭር፤ ኣውማውቅ ክኣክሊልድየንት ፊሳየጘ ክፃይረውድየንት ኪው ሽር ፃጭ።

¹²ድል ፃቨውድየንት ይኣምላክት መቅደስ ጝኒል ጝት ዲቭየ ፃቭጭር፤ ጝጊስም ፍፅም ፋውም፤ ይኣምላክት ሽⶔዝመ ይኣምላክት ኻትመየንት ሽⶔዝ ጝዲጊል ፃፍጭር፤ እኝቸን ኻትመየንም ሲመይስ ይኣምላክቲስ ጊምረይ ኣይር እየሩሳልየም ጚ፤ ኣይር ይሽድየንትም ጝዲጊል ፃፍጭር።›

¹³«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ።»

¹⁴«ለዱቅየ ፅብረይ ምከንሸንት መላኪዝ እንት ይር ፃፍ፦ «ኣሚን ኣቐውድ፣ ኣምንሽተው፣ እማንተው ሚዝርም ኣቐውድ፣ እደረት ፍጥርቲዝም በውረ ኣቐውድ እንት የኵ፦

¹⁵‹ቓፅቕፅረር ዊንም ብርደር ኣይረር ኣረጘ ክሰቭድ ኣርቐኵን፤ ቓፅቕፅረር ዊንም ብርደር ኣራንስ ቀንጨ ዊኑን።

¹⁶ቓፅቕፅረር ዊንም ብርደር ኣዪጝቀ ዝም ይር ለብ ይረር ኣራንስቅ ይምቸይስ ፊስ ማልጨ የጝ።

¹⁷<ያን ኻፍታም የጝ፤ ፃጅጠርም የጝ፤ ይጊስ ጒድለው ውረውረም እጀው> ይረኵ፤ ዊገድ ግን ክት ጐስቛል፣ ምስኪን፣ ድኻ፣ ኻርቨ፣ ዝባትረርም ኣረጘ ኣርቓርም።

¹⁸ነስየ ኻፍታም ኣራንስ ማጥን ልየዝ ኣንጥርሸው ዊርቀ፣ ክሰውነቲድየንትም መጥማጥ ኣቕ ኣይቭታይረጘ ፃረው ኣልቨ፣ ቓለነው ቻልዳንስም ቺል፣ ይጊስ ጅቭተ ማኽረኵን።

¹⁹ያን ቀነቍድዛት ጋስፀኵን፤ ቐፃቐኵንም፤ እንዝ ማጥን ቲጊ፤ ንስኻም ጢ።

²⁰እንወ ቢዘይል ችብጥ ኳኳ ሸኵን፤ ኣውማውቅ ይድመድየንት ወሽ ጝቢለድ ብዝሽ ጝጐ ጥው ጝጅቅ ዅጭር፤ ጘጝም ይጅቅ ዅጡ።

²¹ያን ድል ፃቭ ይር ጅቅ ጝዙፋኒል ጐየጘ፣ እኒዝጘም ድል ፃቨውድ ይጅቅ ይዙፋኒል ጐይጠ ፃቭጭር።›

²²«መንፈስ ቅዱስ ምከንጣኒዝ ዊግተውድየንት ቀርዝ ፃየው እጅርድቅ ወሽነ።»