Read xamtanga ይዃንስት እትለ 4 Bible Online

ይዃንስት እትለ 4 - xamtanga bible

ይዃንስት እትለ 4

¹እንዝ ግረ እንወ ሲመይስ ቢተው ሚረ ቓሉን፤ በውግስ ወጨው መለከት ተከው ድመድም ይት፦ «እንጐ ለው፤ እንዝ ግረ ኣጡ ዊገድየንት ቓሊስጭር» ዩ።

²ያንም በውዝ መንፈስዝ ሚስጥጩን፤ እንወ ሲመይስ ዙፋን ችብር ቓሉን፤ ዙፋኒልም ጐየው ዊኑ።

³ጘጝም ጝሚልክድ እየሰቢድ፣ ሰርዲኑን፣ የነቍ ኪብረቍ ቕርጝድ ተከው ዊኑ፤ መረግድ የነው ኪብረው ቕርጘድ ተከው ቀስተደመነም ዙፋንድየንት ኪብ ዊኑ።

⁴ዙፋኒዙ ጅልወይልም ላጥ ለርን ሲዘ ዝፋናን ዊን፤ ጝታዲጊልም ፃረቍ ኣልብ ሲረቍ፣ ጝታኣውሪልም ዊርቀዙ ኣክሊል ደፋቐቍ ለርን ሲዘ ሽመቅል[2] ጐይጝ ዊን።

⁵ዙፋኒስም መቭረቅ፣ ድመ፣ ነጐድጓድም ፋ ዊኑ፤ ዙፋኒዝ በዊልም ኻውየቍ ላጝጠ መቭራታን ዊን፤ እንዛይም ላጝጠ እደረት መንፈሳንድ ጛይ።

⁶ቈሽም ዙፋኒዝ በዊል ምስታዊቲዝጘ ዊር የው ብርጭቈዙ ባኽር ዊኑ። ማኽለ ማኽል ዙፋኒዝ በዊል፣ ጝጅልወይልም ጝታበው እግርገድቅ እልጣንዝ እቻቐቍ ሲዘ እንሰስ ዊን።

⁷በውረ እንሰሰድ ኣብዘ ተከው ዊኑ፤ ሊጘትረ እንሰሰድ ቢረ ተከው ዊኑ፤ ሸወትረ እንሰሰድ እጅርዙ ጋፅ ተከው ጋፅ ፃየው ዊኑ፤ ሲዘትረ እንሰሰድ ቈሽ ቢረው ጣልየ ተከው ዊኑ።

⁸ሲዘ እንሰስድም ጝታይተእጝቅቅ ዋልጠ ዋልጠ ኪፍጣን ፃየቍ ዊን፤ ጝታጅልወይዝመ ጝታኣቒዝድቅ እልጣንዝ እቻቐቍ ዊን፤ ኻር ጊርቅም «ቅዱስ፣ ቅዱስ፣ ቅዱስ ዊነው፣ ፅበው፣ ተርጡ፣ እጝቅትቅ ቸለው ኣደረ ኣምላክ» የነውድ ቀቫቍም ዊን።

⁹እንሰስድም ዘፋኒል ጐየዊዝ፣ ዘላልም ኣልም ኣሽም ፅበው ኣቕ ፅበዊዝ ክቭር፣ ውዳሲ፣ ሚዝየነ ይውጛንድ፣

¹⁰ለርን ሲዘ ሽመቅልድም ዙፋኒል ጐየው ዘላልም ኣልም ኣሽ ፅበው ኣቕ ፅበዊዝ በዊል ጝታግባሪዝ ደፋሽጝ ጝጭስ ሲግድጘኵ፤ ጝታኣክሊልድየንትም ዙፋኒዝ በዊል እቝርጝ፣

¹¹«ይናኣደረ፣ ይናኣምላክምወ! እጝቅትቅ ክት ፋጥርዳንስቅ፣ እጝቅ ዊገድቅ ፋጥርሸውድ፣ ኣቐውድም ክፍቃዲዝ ኣቓንስቅ፣ ክቭር፣ መጐስ፣ ኻይልም ለምርተ ጥውሸኵ» ይጘኵ።