Read xamtanga ይዃንስት እትለ 5 Bible Online

ይዃንስት እትለ 5 - xamtanga bible

ይዃንስት እትለ 5

¹ዙፋኒል ጐየዊዙ ለወ ናኒልም ኣቒቱም ቢዘቱም ፃፍሸው ላጝጠ ማኽተማንዝ ኣሽግሸው ጥቅልል መፃፍ ቓሉን።

²ላው ኻይሉ መላክም፦ «ማኽተማንድ እክስጠ፣ መፃፍድም ብዝጠ በቃቐውድ ኣው የጝ?» የው ኽየው ድመዝ ኣውጃንድ ቓሉን።

³ዊገድ ግን ሲመይስም ኣነ ዝቨይስ፣ ዝቨይዝ ሳይስም፣ መፃፍድ ብዝጠ ዊንም ኣቒድየንት ቓልጠ ቸለው ላውም ዊኒየው።

⁴ያንም መፃፍድየንት ብዝጠ ዊንም ቓልጠ በቃቐው ላውቅ እጀው ኣቓንስቅ፣ ጭቕጘ ሊዙን።

⁵ኣይንድ ሽመቅሊስ ላውድ ይት፦ «ሊዝተ፤ እንወ ይዅዳት ነገዲስ ኣቐው ኣብዘድ ዳዊት ዚረይስ ፈውድ ድል ፃቭኩ፤ ጘጝ መፃፍድ ብዝጠ፣ ላጝጠ ማኽተማንድም እክስጠ ቸለኵ» ዩ።

⁶ኣይንድ ዙፋኒዝመ ሲዘ እንሰሲዝ ማኽሊል፣ ሽመቅሊዝ ማኽሊልም ዝውሸው ተከው ቢገ ችብር ቓሉን፤ ጘጝ ቢገድ ላጝጠ ጅቅጣንዝመ ላጝጠ እልጣንዝ ፃየው ዊኑ፤ ጛይም ኣልሚልቅ እፃሸቍ ላጝጠ እደረት መንፈሳንድ ጛይ።

⁷ቢገድም ተር ዙፋኒል ጐየዊዙ ለወ ናኒስ መፃፍድየንት ፊሱ።

⁸መፃፍድየንት ፊሳንድም ሲዘ እንሰሲዝመ ለርን ሲዘ ሽመቅሊዝ ቢገይዝ በዊል ጝታግምባሪዝ ደፋሽ፤ ጝታይተእጝቅቅም በገነዝመ ቅዱሳኒዙ ፀለውት ኣቐው እጣንድ እቻቐው ዊርቀዙ ሙዳይዝ ፃይጝ ዊን።

⁹ጛይም፦ «ክት ጥቅልል መፃፍድ ፊስተ፣ ማኽተማንድም እክስተ በቃቕርኵሩ፤ ምላሰንድም ዝውሽርኵሩ፤ ክብሪዝም ነገዲስቅ፣ ቋቈይስቅ፣ ዊግነይስቅ፣ ኽዝቪስቅ እደረስ እቅ ኻርነይ ፊስኵሩ። ጛትም ይናኣምላክስ ካኽነጣነ ምጝግስት ፃቭርኵሩ፤ ጛይም ኣልሚል ኒግስጥቍ» ይጛ ኣይር ቅንየዝ ዚምር።

¹¹እንዝ ግረ ቓሉን፤ ንቕፀቍ መላካንዝ ድመም ወጩን፤ ጝታእግዘድም ንቕፀው ሽኽዝመ ንቕፀው ምሊወንዝ እጊተው ዊኑ፤ ጛይም ዙፋኒዝመ እንሰሲዝ፣ ሽመቅሊዝም ጅልወይል ኪብጝ ዊን።

¹²ኽየው ድመዝም፦ «ዝውሸው ቢገድ ኻይልዝመ ፃጀዝ፣ ጥቨቭዝመ ብርታትዝ፣ ክቭር፣ መጐስም፣ ሚዝየነም፣ ለምርጠ ጥውሸኵ» ይጛ ዚምር።

¹³እንዝ ግረ ሲመይስመ ዝቨይስ፣ ዝቨይዝ ሳይስመ ባኽሪዝ፣ ጝታኣቒልም ፀበው ፍጥርድቅ፦ «ዙፋኒል ጐየዊዝመ ቢገይዝ፦ ሚዝየነዝመ መጐስዝ፣ ክቭርዝመ ኻይልዝ ዘላልም ኣልም ኣሽ ኣነ!» የው ዚምራንድ ወጩን።

¹⁴ሲዘ እንሰስድም፦ «ኣሚን!» ይ፤ ለርን ሲዘ ሽመቅልድም ጝታግምባሪዝ ደፋሽጝ ሲግድ።