Read xamtanga ይዃንስት እትለ 6 Bible Online

ይዃንስት እትለ 6 - xamtanga bible

ይዃንስት እትለ 6

¹እንዝ ግረ ቢገድ ላጝጠ ማኽተማኒስ በውረድየንት እክሳንድ ቓሉን፤ ኣይንድም ሲዘ እንሰሲስ ላውድ ነጐድጓድ ተከው ድመዝ፦ «ለው!» ያንድ ወጩን።

²ኣይንድም እንወ ፃረው ፊርዘ ችብር ቓሉን፤ ጝት ድቃር ዊነውድም ቀስት ፃይ ዊኑ፤ ጝጭስም ኣክሊል ይውሽቱ፤ ጘጝም ድል ፃቨው እጅሪዝጘ ድል ፃቭጠ ፉ።

³ቢገድም ሊጘትረ ማኽተምድየንት እክሳንድ ሊጘትረ እንሰሰድ፦ «ለው!» ያንድ ወጩን።

⁴ኣይንድም ኻኽመ ተከው ላየ ሰረው ፊርዘ ፋንድ ቓሉን፤ ጝት ድቃር ዊነውድም ዝቨይስ ዲግተድ ፊስጠ፣ እቅድም ጛስ ጛይ ዝወዝውሽትጥጘ ማጥን ጝጭስ ስልጣን ይውሽቱ፤ ኽየው ሰይፍም ይውሽቱ።

⁵ቢገድም ሸወትረ ማኽተምድየንት እክሳንድ ሸወትረ እንሰሰድ፦ «ለው!» ያንድ ወጩን፤ ኣይንድም እንወ ጝጭር ፊርዘ ችብር ቓሉን፤ ጝት ድቃር ዊነውድም ጝናኒዝ ሚዛን ፃይ ዊኑ።

⁶ሲዘ እንሰሲዝ ማኽሊስ፦ «ኪለው ግቨር ዚርው ላው ግርየዙ መኻየ፣ ኪለውዝመ ግቨርዝ ኣቐቍ ስቅምም ላው ግርየዙ መኻየ ኣነ፤ ዘይቲዝመ ወይኒዝ ግን ቘይስተ» የው ድመ ወጩን።

⁷ቢገድም ሲዘትረ ማኽተምድየንት እክሳንድ ሲዘትረ እንሰሰድ፦ «ለው!» ያንድ ወጩን።

⁸ኣይንድም እንወ ግረጨ ፊርዘ ችብር ቓሉን፤ ጝት ድቃር ዊነውድም ጝሽድ፦ «ክርጘ» ይሽተው ዊኑ፤ ሲወልም ጝእግርገይል ቲክና ዊኑ፤ ጛጭስም ዝቨይስ ሲዝነድየንት ኣጭነዝ፣ ግድርዝ፣ መቅሰፍትዝ፣ ዝቨይዝቍ ኣረዊታንዝቅ ቁጛንስ ማጥን ስልጣን ይውሽቱ።

⁹ኣኰትረ ማኽተምድም እኪታንድ እደረት ቃሊዝቍዝመ ሊሚድጘው ሚዝርነይዝቍዝ ዝውሽተቍ እቂዝ ኒፍሳንድዛት መሰወይዝ ሳይስ ቓሉን።

¹⁰ጛይም ኽየው ድመዝ፦ «እጝቅትቅ ቅምረር ቅዱስ፣ እማንተውም ኣረር ኣደረወ! ኣውን ኣሽ ዝቨይል ፅበቊል ፊርዳር? ኣውን ኣሽስ ይናብሪዝቍዝ ጛት ቢቅልዳር?» ይ።

¹¹ኣይንድም ጝታይታእጝቅዝቅ ፃረው ኣልቨ ይውሽቱ፤ ገነ ጝታጘ ቍዉሽተቍ ኣገልጋያን ጝታፃምጢዝመ ጝታፅኒዝ እግዘድ እቻጢስቅ ዊቱ ግርየ ኣቕልድጛንስ ማጥን ጛጭስ ድቍሽቱ።

¹²ዋልጠትረ ማኽተምድም እኪታንድ ቓሉን፤ ኣይንድም እንወ ዝቨድ ጭቕጘ ናውፅሽቱ፤ ኰረየንም ግምሪዝጘ ጝጭርች፤ ኣርቨየንም ምሉ በምሉዝ ብሪዝጘ ሰርች።

¹³በለስ ዘፍ ኻይሉ ፊግየዝ ኒንቅሽራንድ ጂየው ጝርፍረድ ኣርግፍሻንትጘ፣ ሲመይት ፅግልውጥድ ዝቨይል ኣርግፍሽ።

¹⁴ሲመይም ጥቅልል መፃፊዝጘ ጥቅልሽ ፊሩ፤ ኣብቒዝመ ደሲታኒዝቅ ጝታስፍረድ ሊቅጝ ፊር።

¹⁵እንዝ ግረ ዝቨይዝቍ ንጕሳኒዝመ ቅመቲዝ፣ ጠውርዝቍ ሽማንድ፣ ኻፍታማንድ፣ ኻይልቍድ፣ ጭውድ፣ በርድ፣ እጝቅቅ ጋቒል፣ ኣብቒዝቍ ጋውችጢልም ጭቭር።

¹⁶ኣብቒዝመ ጋውችጢዝዛትም፦ «ይናዲጊል ሊቭጥን፤ ዙፋኒል ጐየዊዝ በዊስ፣ ቢገይዙ ቍጠይስም ይናት ጭቭስጥን።

¹⁷ምላሰንድም ኽየው ቍጠዙ ግርየድ ተርኩ፤ ጝት ተቋቍምሸነው ቸለውድስ ኣው የጝ?» ይ።