Read xamtanga ይዃንስት እትለ 7 Bible Online

ይዃንስት እትለ 7 - xamtanga bible

ይዃንስት እትለ 7

¹እንዝ ግረ ሲዘ መላካን ዝቨይዙ ሲዘ ማይዘኒል ችብርጝ ቓሉን፤ ጛይም ፊግየድ ዝቨይል፣ ዊንም ባኽሪል፣ ዊንም ኣውማው ዘፊልቅ ፊግያየጘ ዝቨይዝቍ ሲዘ ፊግይጥድዛት ፃይ።

²ዘላልም ፅበው ኣምላክዙ ማኽተም ፃየው ላየ መላክም ምስራቂስ ተራንድ ቓሉን፤ ጘጝም ዝቨይዝመ ባኽሪዝ ጒዲጥጘ ስልጣን ለምረቍ ሲዘ መላካንድዛት ኽየው ድመዝ፦

³«ይናኣምላክት ኣገልጋያኒዙ ግምባሪል ማኽተምዝ ኻትምኒስቅ ዝቨየንት ዊንም ባኽርድየንት ዊንም ዘፋንድዛት ጒዲትርነ» ዩ።

⁴ኻትምሸቊ እቂዝ እግዘድም ወጩን፤ እስራየላነ ነገዳኒስቅ ላዝ ኣርቭዝ ሲዘ ሽኽ እቅ ኻትምሽ።

⁵ይዅዳት ነገዲስ ፅጭ ሊጘ ሽኽ፣ ረውቪልት ነገዲስ ፅጭ ሊጘ ሽኽ፣ ጋድት ነገዲስ ፅጭ ሊጘ ሽኽ፣

⁶ኣሲርት ነገዲስ ፅጭ ሊጘ ሽኽ፣ ንፍታሊምት ነገዲስ ፅጭ ሊጘ ሽኽ፣ ምናሲት ነገዲስ ፅጭ ሊጘ ሽኽ፣

⁷ስሙንት ነገዲስ ፅጭ ሊጘ ሽኽ፣ ለዊት ነገዲስ ፅጭ ሊጘ ሽኽ፣ ይሳኰርት ነገዲስ ፅጭ ሊጘ ሽኽ፣

⁸ዛቭለውንት ነገዲስ ፅጭ ሊጘ ሽኽ፣ ዮሴፍት ነገዲስ ፅጭ ሊጘ ሽኽ፣ ብንያምት ነገዲስ ፅጭ ሊጘ ሽኽ፣ ኻትምሽ።

⁹እንዝ ግረ እንወ ዙፋኒዝመ ቢገይዝ በዊል ኣውማውቅ እግዝጠ ቸላው ኽዝቪስ፣ ነገዲስ፣ ዊግነይስ፣ ቋቈይስ፣ እጝቂስቅ ተረው ጭቕጘ ንቕፀው ኽዝቭ ችብር ቓሉን፤ ጛይም ፃረው ኣልቨ ሲርጝ፣ ሰልየንዙ ኻፀም ጝታናኒዝ ፃይጝ ዊን።

¹⁰ኽየው ድመዝም፦ «ቓዘነው፣ ዙፋኒል ጐየው ይናኣምላክቱ፣ ቢገይዙም የጝ» ይ።

¹¹መላካንድም እጝቅቅ ዚፋኒዝመ ሽመቅሊዝ፣ ሲዘ እንሰሲዝም ጅልወይል ኪብጝ ችብርጝ ዊን፤ ዙፋኒዝ በዊልም ጝታግምባሪዝ ደፋሽጝ እደረስ ሲግድ።

¹²ጛይም፦ «ኣሚን! ውዳሲዝመ ክቭርዝ፣ ጥቨቭ፣ ሚዝየነ፣ መጐስ፣ ኻይል፣ ብርታትም ዘላልም ኣልም ኣሽ ይናኣምላክስ ኣነ፤ ኣሚን!» ይጛ ዊን።

¹³እንዝለ ሽመቅሊስ ላውድ ይት፦ «እንዛይ ፃረው ኣልቨ ሲረቍድ ኣውታይ ጛይ? ኣዊስስ ተር?» ዩ።

¹⁴ያንም፦ «ኣደረወ! ክት ኣርቕረኳ» ዩን፤ ጘጝም እንት ዩ፦ «እንዛይ ኽየው ሚከረይስ ተረቍ ጛይ፤ ጝታኣልቨድየንትም ቢገይዙ ብረይዝ እቓስጝ ፃርዝጝኵ።

¹⁵እንዝ ማጥን ዙፋኒዝ በዊል ኣቕጝ ኻር ጊርቅ ጝመቅደሲል ኣግልግልጘኵ፤ ዙፋኒል ጐየውድም ጝድኳንድየንት ጝታግል ዘርጋጡ።

¹⁶ነስየ እንዝ ግረ ግድርዳቍም፤ እንዝ ግረም ዝቛንዳቍም፤ ኰረዝም ጣይታቍም። ኻሩርዝም ቃጥልሻቍም።

¹⁷ምላሰንድም ዙፋኒዝ ማኽሊል ፅበው ቢገድ ጝታምቓ ኣጡ፤ ርዅየዙ ኣቘ ምኝጪዝ ጐም ቃውጡ፤ እደረም እርⶓድቅ ጝታእልጣኒስ ኻዝጡ።»