Read xamtanga ይዃንስት እትለ 8 Bible Online

ይዃንስት እትለ 8 - xamtanga bible

ይዃንስት እትለ 8

¹ቢገድም ላጝጠትረ ማኽተምድየንት እክሳንድ ሲመይስ ግቨር ሰት ኣጠ ዝምተ ኣቑ።

²እግረም እደረት በዊል ችብረቍ ላጝጠ መላካንድ ቓሉን፤ ጛጭስም ላጝጠ መለከታን ይውሽቱ።

³ላየ መላክም ዊርቀዙ ፅንኸ ፃይ ተር መሰውየይዝ ጋቢል ችብሩ፤ ጝጭስም ዙፋኒዝ ጋቢል ፅበው ዊርቀዙ መሰውየይል እጝቅ ቅዱሳኒዙ ፀለውቲጂቅ ኣልስጠ ማጥን ንቕፀው እጣን ይውሽቱ።

⁴እጣኒዙ ጥየድም ቅዱሳኒዙ ፀለውቲጅቅ ኣቕ መላኪዝ ናኒስ እደረት በዊል ችጙ።

⁵መላክድም ፅንኸድ ፃይ መሰውየይዙ ልየይስ እቻዝ በር ዝቨይል ዊርውሩ፤ ኣይንድም ነጐድጓድ፣ ድመ፣ መቭረቅ፣ ዝቨዙ ንውፅውፅተም፣ ኣቑ።

⁶ላጝጠ መለከታን ፃየቍ ላጝጠ መላካንድም መለከታንድዛት ዋስጥጘ ኣስልሽ።

⁷በውረ መላክድም ጝመለክትድ ዋሱ፤ ኣይንድ ብርዝ ዲቭልቅሸው ኣዝመ ልየዝ ኣቑ፤ ዝቨይልም ሊቩ፤ ዝቨይስም ሸውነድ ቃጥልሹ፤ ዘፋኒስም ሸውነድ ቃጥልሹ፤ ሊልምደው ፃቀድም እጝቅቅ ቃጥልሹ።

⁸ሊጘትረ መላክድም ጝመለክትድ ዋሱ፤ ኽየው ኣበ ተከውም ልየዝ ኻውያ ባኽሪል ሊቩ፤ ባኽሪስም ሸውነድ ላውጥሽ ብር ኣቑ።

⁹ባኽር ኣቒል ፅበው ፍጥሪስም ሸውነድ ክሩ፤ ሚርክቫኒስም ሸውነድ ኽልም የው ድዙ።

¹⁰ሸወትረ መላክድም ጝመለክትድ ዋሱ፤ ሺከይዝጘ ኻውየው ፅግልወም ሲመይስ ሊቩ፤ ሊቨውድም ዝቨይዝቍ ዋርቢዝ ሸውነይል፣ ምኝጫኒዝ ሸውነይልም የጝ።

¹¹ጘጝ ፅግልወይዝ ሽድም፦ «ኣውሸረ» ይሽተው ዊኑ፤ ኣቘይዙ ሸውነድም ማረው ኣቑ፤ ኣቘድ ማራንስቅም ንቕፀቍ እቅ ክር።

¹²ሲዘትረ መላክድም ጝመለክትድ ዋሱ፤ ጝታብርኻኒዙ ሸውነድ ጥምታንስ ማጥን ኰረይዙ ሸውነድ፣ ኣርቨይዙ ሸውነድ፣ ፅግልውጢዙ ሸውነድም፣ ጣይቱ፤ ጊርቂዙ ሸውነይዝመ ኻሪዙ ሸውነይዝም ብርኻን ይውሽታየጘ ኪልክልሹ።

¹³እንዝ ግረ ቓላንድ ላው ጣልየ ሲመይ ማኽሊል ቢራ ኽየው ድመዝ፦ «እዳቐቍ ሻቘ መላካኒዝቍ መለከታንድ ዋይትጥጘ ኣቓንስቅ ዝቨይል ፅበቍ እቂዝ ወየው! ወየው! ወየው!» ያንድ ወጩን።