Read xamtanga ይዃንስት እትለ 9 Bible Online

ይዃንስት እትለ 9 - xamtanga bible

ይዃንስት እትለ 9

¹ኣኰትረ መላክድም ጝመለክትድ ዋሱ፤ ኣይንድም ሲመይስ ዝቨይዝጐ ሊቨው ፅግልወ ቓሉን፤ ጝጭስም ጥልቅ ቢⶔዙ ቝልፍድ ይውሽቱ።

²ጘጝም ጥልቅ ቢድየንት ብዛንድ፣ ኽየው ልጂስ ፈው ጥየይዝጘ ጥየ ፋንድ ቓሉን፤ ቢⶔስ ፈው ጥየይዝም ኰረይዝመ ሲመይዝ ጥምት።

³ጥየይስም ኣብጠ ፍ ዝቨይል ጊሙ፤ ዝቨይዝቍ እጭወ ክርክርጣነቊዙ ኻይልድ ተከው ኻይልም ጛጭስ ይውሽቱ።

⁴ዝቨይዙ ፃቀድም ኣነ ኣውማው ሊልምደውድቅ፣ ዊንም ዘፋንድቅ፣ ቘይሳይጘጘ ጛጭስ ድቍሽቱ፤ ዊገድ ግን ቘይስጥጘ ጥውሸውድ እደረት ማኽተምድ ጝታግምባሪል እጀቍ እቅድዛት ጭቝ የጝ።

⁵ጛይ እቅድዛትም ኣኰ ርፍ ኣሰቃይዝጛንስጚ ቁጛንስ ጛጭስ ስልጣን ይውሽቲየውም፤ ኣሰቃይዝጘው ስቃይድም እጅር እጭወ ክርክርጣነውዝ ዀሽት ተሰቃይሻንትጘ የጝ።

⁶ጛይ ግርቂዝ እቅ ክርጘ ደምዝጥቍ፤ ዊገድ ግን ችጛቍም፤ ክርጥጘ በንጥቍ፤ ዊገድ ግን ክርጘድ ጛጊስ እክልድጡ።

⁷ኣብጥድም ኣጭነ ጋጥምጥጘ ኣስልሸቍ ፋርፅ ተከቍ ዊን፤ ጝታኣውሪልም ዊርቀዙ ኣክሊል ተከው ደፋቕጝ ዊን፤ ጝታጋፅድም እቀ ጋፅ ተከው ዊኑ።

⁸ጝታፅቭቀድ እቍኒዙ ኣውር ፅቭቀድ ተከው ዊኑ፤ ጝታእርቍጣንድም ኣብዘይዝቍ እርቍጣንድ ተከቍ ዊን።

⁹ብረትዙ ጥርቩሽ ተከው ጥርቩሽ ፃይጝ ዊን፤ ጝታኪፊዙ ድመድ ኣጭነል ጊስግሰቍ ንቕፀቍ ፋርፅዝመ ሰረገልጥዝዙ ድመድ ተከው ዊኑ።

¹⁰እጭወ ክርክርጣነውዙ ፅምርዝመ ሲቨነዝ ፃየቍ ዊን፤ ጝታፅምሪልም እቅድዛት ኣኰ ርፍ ኣሰቃይዘነው ኻይል ዊኑ።

¹¹ጝታኒየይልም ንጕስ ፃየቍ ዊን፤ ጘጝም ጥልቅ ቢⶔዙ መላክድ የጝ፤ ጝሽድም እቭራይስጢዝ፦ «ኣቭደን» ግሪኪዝ ቈሽ፦ «ኣቡልየን» ይሽተኵ።

¹²በውረ ወየውድ ዲቍኩ፤ ነስየ ገነ ሊጘ ወየው ተርጥጘ ጛይ።

¹³ዋልጠትረ መላክድም ጝመለክትድ ዋሱ፤ እደረት በዊል ፅበው ዊርቀዝ ተሲተው መሰዊየይዙ ጂስ ድመ ፋንድ ወጩን።

¹⁴ጘጝ ድመድም መለከት ፃየው ዋልጠትረ መላክድየንት፦ «ኽየው ይፍራጥስ ዊርቨይል እፁሸቍ ሲዘ መላካንድዛት እክሽ» ዩ።

¹⁵እቀ ዚረይስቅ ሸውነድየንት ቍውጥጘ ማጥን እኒን ሰቲዝመ ግርየይዝ፣ ኣርፈይዝመ ኣምረይዝ ኣስልሽጝ ዊነቍ ሲዘ መላካንድ እኪት።

¹⁶ፈረሰኘይዙ እግዘድም ሊጘ ላ ምሊወን ኣቐጘ ወጩን።

¹⁷ያን እትለዝ ቓለቍ ፋርፂዝመ ጛት ድቃረቍ እቂዝ፣ ጝታጥርቩሽድ ልየ ኻኽመይዝጘ ሰረው፣ ያክንቲዝጘ ቓመወ ተከው፣ ዲኒዝጘም፣ ኣለ ተከው ዊኑ፤ ፋርፂዙ ኣውርድም ኣብዘዙ ኣውር ተከው ዊኑ፤ ጝታምቸይስም ልየ፣ ጥየ፣ ዲንም ፋ ዊኑ።

¹⁸ጝታምቸይስ ፈቍ እንዛይ ሻቘ መቅሰፍታኒዝ የነትም ልየይዝ፣ ጥየይዝ፣ ዲኒዝም፣ እቀ ዚረይስ ሸውነድ ክሩ።

¹⁹ፋርፂዙ ጝታኻይልድ ዊነውድ ጝታምቸይል ጝታፅምሪልም የጝ፤ ጝታፅምርድም ሲቭረ ተከው፣ ሲቭረዙ ኣውርም ፃየው ዊኑ፤ እጅር ጒዲጘውድም ጝዝ ዊኑ።

²⁰እንዛይ መቅሰፍታኒዝ ክሪጝቀ እዳቐቍ እቀ ዚረድም፣ ነንም ጝታናኒዙ ሰቪስ ንስኻ ጥዊየቍም፤ ጋኒናንድዛት ኣምልከነው፣ እኒዝጘም ቓለነው፣ ወሸነው፣ ዊንም ፃጘነው ቸላቍ ዊርቀዝ፣ ብረትዝ፣ ቕርጘዝ፣ ቃነዝ፣ ተስንቍ ጣወታንድዛት ኣምልከነውድ በርየቍም።

²¹ቈሽም ኒፍስ ቍወነዊስ፣ ጝታጥቍልነይስ፣ ጝታሽርሙጥነይስ ጝታቕፅጚስም ንስኻ ጥዊየቍም።