Read yoruba Ìwé ti Jobu 15 Bible Online

Ìwé ti Jobu 15 - yoruba bible

Ìwé ti Jobu 15

¹Elifasi ará Temani bá dáhùn pé,

²“Ṣé ọlọ́gbọ́n a máa fọ èsì tí kò mọ́gbọ́n lọ́wọ́? Kí ó dàbí àgbá òfìfo?

³Kí ó máa jiyàn lórí ọ̀rọ̀ tí kò wúlò, tabi ọ̀rọ̀ tí kò níláárí?

⁴Ṣugbọn ò ń kọ ìbẹ̀rù Ọlọrun sílẹ̀, o sì ń dènà adura níwájú rẹ̀.

⁵Nítorí ẹ̀ṣẹ̀ rẹ ni ó ń fa irú ọ̀rọ̀ tí ń ti ẹnu rẹ jáde, ètè rẹ sì kún fún àrékérekè.

⁶Ẹnu rẹ ni ó dá ọ lẹ́bi, kì í ṣe èmi; ẹ̀rí tí ò ń jẹ́ nípa rẹ ní ń ta kò ọ́.

⁷“Ṣé ìwọ ni ẹni kinni tí wọ́n kọ́ bí láyé? Tabi o ṣàgbà àwọn òkè?

⁸Ṣé o wà ninu ìgbìmọ̀ Ọlọrun? Tabi ìwọ nìkan ni o rò pé o gbọ́n?

⁹Kí ni o mọ̀, tí àwa náà kò mọ̀? Òye kí ni o ní, tí ó jẹ́ ohun ìpamọ́ fún àwa?

¹⁰Àwọn tí wọ́n hu ewú lórí wà láàrin wa, ati àwọn àgbàlagbà, àwọn tí wọ́n dàgbà ju baba rẹ lọ.

¹¹Ṣé ìtùnú Ọlọrun kò tó fún ọ ni, àní ọ̀rọ̀ jẹ́ẹ́jẹ́ tí ó ń sọ fún ọ?

¹²Àgbéré kí lò ń ṣe, tí o sì ń fi ojú burúkú wò wá.

¹³Tí ọkàn rẹ yipada kúrò lọ́dọ̀ Ọlọrun, tí ò ń jẹ́ kí irú ọ̀rọ̀ bẹ́ẹ̀ ti ẹnu rẹ jáde?

¹⁴Kí ni eniyan jẹ́, tí ó fi lè mọ́ níwájú Ọlọrun? Kí ni ẹnikẹ́ni tí obinrin bí já mọ́, tí ó fi lè jẹ́ olódodo?

¹⁵Wò ó, Ọlọrun kò fọkàn tán àwọn angẹli, àwọn ọ̀run kò sì mọ́ níwájú rẹ̀.

¹⁶Kí á má tilẹ̀ wá sọ ti eniyan tí ó jẹ́ aláìmọ́ ati ẹlẹ́gbin, tí ń mu ẹ̀ṣẹ̀ bí ẹni mu omi!

¹⁷“Fetí sílẹ̀, n óo sọ fún ọ, n óo sọ ohun tí ojú mi rí,

¹⁸(ohun tí àwọn ọ̀jọ̀gbọ́n sọ, tí àwọn baba wọn kò sì fi pamọ́,

¹⁹àwọn nìkan ni a fún ní ilẹ̀ náà, àlejò kankan kò sì sí láàrin wọn).

²⁰Ẹni ibi ń yí ninu ìrora ní gbogbo ọjọ́ ayé rẹ̀, àní, ní gbogbo ọdún tí a là sílẹ̀ fún ìkà.

²¹Etí rẹ̀ kún fún igbe tí ó bani lẹ́rù, ninu ìdẹ̀ra rẹ̀ àwọn apanirun yóo dìde sí i.

²²Kò gbàgbọ́ pé òun lè jáde kúrò ninu òkùnkùn; ati pé dájú, ikú idà ni yóo pa òun.

²³Ó ń wá oúnjẹ káàkiri, ó ń bèèrè pé, ‘Níbo ló wà?’ Òun gan-an sì nìyí, oúnjẹ àwọn igún! Ó mọ̀ pé ọjọ́ òkùnkùn ti súnmọ́ tòsí.

²⁴Ìdààmú ati ìrora dẹ́rùbà á, wọ́n ṣẹgun rẹ̀, bí ọba tí ó múra ogun.

²⁵Nítorí pé ó ṣíwọ́ sókè sí Ọlọrun, o sì ṣe oríkunkun sí Olodumare,

²⁶ó ń ṣe oríkunkun sí i, ó sì gbé apata tí ó nípọn lọ́wọ́ láti bá a jà;

²⁷nítorí pé ó sanra tóbẹ́ẹ̀ tí ojú rẹ̀ yíbò, ẹ̀gbẹ́ rẹ̀ sì jẹ́ kìkì ọ̀rá.

²⁸Ó ń gbé ìlú tí ó ti di ahoro, ninu àwọn ilé tí eniyan kò gbọdọ̀ gbé, àwọn ilé tí yóo pada di òkítì àlàpà.

²⁹Kò ní ní ọrọ̀, ohun tí ó bá ní, kò ní pẹ́ lọ́wọ́ rẹ̀, òun alára kò sì ní fìdí múlẹ̀.

³⁰Kò ní bọ́ kúrò ninu òkùnkùn, iná yóo jó àwọn ẹ̀ka rẹ̀, afẹ́fẹ́ yóo sì fẹ́ àwọn ìtànná rẹ̀ dànù.

³¹Kí ó má gbẹ́kẹ̀lé òfo, kí ó má máa tan ara rẹ̀ jẹ, nítorí òfo ni yóo jẹ́ èrè rẹ̀.

³²A ó san án fún un lẹ́kùn-únrẹ́rẹ́ lọ́jọ́ àìpé, gbogbo ẹ̀ka rẹ̀ ni yóo sì gbẹ.

³³Yóo gbọn àwọn èso rẹ̀ tí kò tíì pọ́n dànù, bí àjàrà, yóo sì gbọn àwọn ìtànná rẹ̀ dànù, bí igi olifi.

³⁴Nítorí asán ni àwùjọ àwọn tí wọn kò mọ Ọlọ́run, iná yóo sì jó ilé àwọn tí ń gba owó àbẹ̀tẹ́lẹ̀.

³⁵Wọ́n ń ro èrò ìkà, wọ́n ń ṣe iṣẹ́ ibi, wọ́n sì ń pète ẹ̀tàn lọ́kàn.”