Read yoruba Ìwé ti Jobu 18 Bible Online

Ìwé ti Jobu 18 - yoruba bible

Ìwé ti Jobu 18

¹Bilidadi ará Ṣuha bá tún dáhùn pé,

²“Ìgbàwo ni o óo sinmi ẹjọ́ tí ò ń tò yìí? Ohun tí a tí ń bá ọ sọ ni kí o gbé yẹ̀wò, kí á lè sọ èyí tí a tún fẹ́ sọ.

³Kí ló dé tí o fi kà wá sí ẹranko, tí a di òmùgọ̀ lójú rẹ?

⁴Ìwọ tí o faraya nítorí inú ń bí ọ, ṣé kí á sá kúrò láyé nítorí rẹ ni, tabi kí á ṣí àwọn àpáta nípò pada?

⁵“Nítòótọ́, a ti pa fìtílà ẹni ibi, ahọ́n iná rẹ̀ kò sì mọ́lẹ̀ mọ́.

⁶Inú àgọ́ rẹ̀ ṣókùnkùn, a sì ti pa àtùpà ìgbèrí rẹ̀.

⁷Agbára rẹ̀ ti dín kù, ète rẹ̀ sì gbé e ṣubú.

⁸Ó ti ẹsẹ̀ ara rẹ̀ bọ àwọ̀n, ó ń rìn lórí ọ̀fìn.

⁹Tàkúté ti mú un ní gìgísẹ̀, ó ti kó sinu pańpẹ́.

¹⁰A dẹ okùn sílẹ̀ fún un, a sì dẹ pańpẹ́ sí ojú ọ̀nà rẹ̀.

¹¹“Ìbẹ̀rù yí i ká, wọ́n ń lé e kiri.

¹²Ebi pa agbára mọ́ ọn ninu, ìṣòro sì ti ṣetán láti gbé e ṣubú.

¹³Àìsàn burúkú jẹ awọ ara rẹ̀, àkọ́bí ikú jẹ ẹ́ tọwọ́ tẹsẹ̀.

¹⁴A fipá wọ́ ọ kúrò ninu àgọ́ rẹ̀ tí ó gbẹ́kẹ̀lé, a sì mú un lọ sọ́dọ̀ Ọba Ẹ̀rù jẹ̀jẹ̀.

¹⁵Àgọ́ rẹ̀ kún fún àwọn tí kì í ṣe tirẹ̀, imí-ọjọ́ fọ́nká sí gbogbo ibùgbé rẹ̀.

¹⁶Gbòǹgbò rẹ̀ gbẹ nísàlẹ̀, ẹ̀ka rẹ̀ sì gbẹ lókè.

¹⁷Ó di ẹni ìgbàgbé lórílẹ̀ ayé, bẹ́ẹ̀ ni a kò gbórúkọ rẹ̀ mọ́ ní ìgboro.

¹⁸Wọ́n tì í láti inú ìmọ́lẹ̀ sinu òkùnkùn, wọ́n lé e kúrò láyé.

¹⁹Kò lọ́mọ, kò lọ́mọ ọmọ, kò sì sí ẹni tí yóo rọ́pò rẹ̀ ní ibùgbé rẹ̀, láàrin àwọn eniyan rẹ̀.

²⁰Ẹnu yóo ya àwọn ará ìwọ̀ oòrùn, ìwárìrì yóo sì mú àwọn ará ìlà oòrùn, nítorí ohun tí yóo ṣẹlẹ̀ sí i.

²¹Dájúdájú bẹ́ẹ̀ ni ibùgbé ẹni ibi yóo rí, àní, ilé ẹni tí kò mọ Ọlọrun.”