Read yoruba Ìwé ti Jobu 27 Bible Online

Ìwé ti Jobu 27 - yoruba bible

Ìwé ti Jobu 27

¹Jobu tún dáhùn pé,

²“Mo fi Ọlọrun tí ó gba ẹ̀tọ́ mi búra, mo fi Olodumare tí ó mú kí ọkàn mi bàjẹ́ ṣẹ̀rí,

³níwọ̀n ìgbà tí mo wà láàyè, tí mo sì ń mí,

⁴n kò ní fi ẹnu mi purọ́, ahọ́n mi kò sì ní sọ̀rọ̀ ẹ̀tàn.

⁵Kí á má rí i, n kò jẹ́ pè yín ní olóòótọ́; títí di ọjọ́ ikú mi ni n óo dúró lórí ọ̀rọ̀ mi, pé mo wà lórí àre.

⁶Mo dúró lórí òdodo mi láìyẹsẹ̀, ọkàn mi kò ní dá mi lẹ́bi, títí n óo fi kú.

⁷“Kí ó rí fún ọ̀tá mi gẹ́gẹ́ bí í ti í rí fún ẹni ibi, kí ó sì rí fún ẹni tí ó dojú kọ mí bí í ti í rí fún alaiṣododo.

⁸Ìrètí wo ni ẹni tí kò mọ Ọlọrun ní nígbà tí Ọlọrun bá pa á run, tí Ọlọrun sì gba ẹ̀mí rẹ̀?

⁹Ǹjẹ́ Ọlọrun yóo gbọ́ igbe rẹ̀, nígbà tí ìyọnu bá dé bá a?

¹⁰Ǹjẹ́ yóo ní inú dídùn sí Olodumare? Ǹjẹ́ yóo máa ké pe Ọlọrun nígbà gbogbo?

¹¹“N óo kọ yín ní ìmọ̀ agbára Ọlọ́run; n kò sì ní fi ohun tíí ṣe ti Olodumare pamọ́.

¹²Wò ó! Gbogbo yín ni ẹ ti fojú yín rí i, kí ló wá dé tí gbogbo yín fí ń sọ ìsọkúsọ?”

¹³“Ìpín ẹni ibi láti ọ̀dọ̀ Ọlọrun nìyí, òun ni ogún tí àwọn aninilára ń rí gbà lọ́dọ̀ Olodumare:

¹⁴Bí àwọn ọmọ rẹ̀ bá ń pọ̀ sí i, kí ogun baà lè pa wọ́n ni, oúnjẹ kò sì ní ká wọn lẹ́nu.

¹⁵Àwọn ọmọ tí wọn bá gbẹ̀yìn rẹ̀, àjàkálẹ̀ àrùn ni yóo pa wọ́n, àwọn opó wọn kò sì ní ṣọ̀fọ̀ wọn.

¹⁶Bí ó tilẹ̀ jẹ́ pé ó ń kó fadaka jọ bí erùpẹ̀, tí ó sì to aṣọ jọ bí amọ̀;

¹⁷olódodo ni yóo wọ aṣọ tí ó bá kó jọ, àwọn aláìṣẹ̀ ni yóo pín fadaka rẹ̀.

¹⁸Ilé tí ó kọ́ dàbí òwú aláǹtakùn, àní bí àgọ́ àwọn tí wọn ń ṣọ́nà.

¹⁹A ti máa wọlé sùn pẹlu ọrọ̀ tẹ́lẹ̀, ṣugbọn kò ní rí bẹ́ẹ̀ fún un mọ́. Nígbà tí ó bá la ojú rẹ̀, gbogbo ọrọ̀ rẹ̀ yóo ti fò lọ.

²⁰Ìwárìrì á bò ó mọ́lẹ̀ bí ìkún omi, ní alẹ́, ìjì líle á gbé e lọ.

²¹Afẹ́fẹ́ ìlà oòrùn á fẹ́ ẹ sókè, á sì gbé e lọ, á gbá a kúrò ní ipò rẹ̀.

²²Á dìgbò lù ú láìṣàánú rẹ̀, á sá lọ kúrò lọ́wọ́ agbára rẹ̀.

²³Ọlọrun á pàtẹ́wọ́ lé e lórí, á sì pòṣé sí i láti ibi tí ó wà.