Read yoruba Ìwé ti Jobu 29 Bible Online

Ìwé ti Jobu 29 - yoruba bible

Ìwé ti Jobu 29

¹Jobu tún ń bá ọ̀rọ̀ rẹ̀ lọ báyìí pé,

²“Ìbá jẹ́ tún rí fún mi, bí ìgbà àtijọ́, nígbà tí Ọlọrun ń tọ́jú mi;

³nígbà tí ìmọ́lẹ̀ rẹ̀ ń tàn sí mi lórí, tí mo kọjá ninu òkùnkùn pẹlu ìmọ́lẹ̀ rẹ̀;

⁴kí ó tún rí fún mi bí ìgbà tí ara dẹ̀ mí, nígbà tí ìrẹ́pọ̀ wà láàrin Ọlọrun ati ìdílé mi;

⁵tí Olodumare wà pẹlu mi, tí gbogbo àwọn ọmọ mi yí mi ká;

⁶tí mò ń rí ọpọlọpọ wàrà lára àwọn ẹran ọ̀sìn mi, ati ọpọlọpọ òróró lára igi olifi tí ń dàgbà láàrin òkúta!

⁷Nígbà tí mo lọ sí ẹnubodè ìlú, tí mo jókòó ní gbàgede,

⁸tí àwọn ọdọmọkunrin bá rí mi, wọn á bìlà sẹ́gbẹ̀ẹ́ kan, àwọn àgbà á sì dìde dúró;

⁹àwọn ìjòyè á dákẹ́ rọ́rọ́, wọn á fi ọwọ́ bo ẹnu wọn.

¹⁰Àwọn olórí á panumọ́, ahọ́n wọn á lẹ̀ mọ́ wọn lẹ́nu.

¹¹Àwọn tí wọ́n gbọ́ nípa mi, ń pè mí ní ẹni ibukun, àwọn tí wọ́n rí mi ń kan sáárá sí mi.

¹²Nítorí pé mò ń ran àwọn aláìní tí ń ké lọ́wọ́, ati àwọn aláìníbaba tí wọn kò ní olùrànlọ́wọ́.

¹³Ìre àwọn tí ń kú lọ mọ́ mi, mo sì mú kí opó kọrin ayọ̀.

¹⁴Mo fi òdodo bora bí aṣọ, ìdájọ́ òtítọ́ dàbí ẹ̀wù ati adé mi.

¹⁵Mo jẹ́ ojú fún afọ́jú, ati ẹsẹ̀ fún arọ.

¹⁶Mo jẹ́ baba fún talaka, mo gba ẹjọ́ àlejò rò.

¹⁷Mo ṣẹ́ ẹni ibi lápá, mo gba ẹni tí ó mú sílẹ̀.

¹⁸“Nígbà náà, mo rò pé, n óo gbòó, n óo tọ̀ọ́ láyé, ati pé inú ilé mi ni n óo sì kú sí.

¹⁹Mo ta gbòǹgbò lọ síbi omi, ìrì sì ń sẹ̀ sí ẹ̀ka mi ní alaalẹ́.

²⁰Ọlá hàn lára mi, agbára mi sì ń di titun nígbà gbogbo.

²¹Àwọn eniyan á dákẹ́ jẹ́ẹ́, wọn á farabalẹ̀ gbọ́ tèmi, wọ́n sì ń gba ìmọ̀ràn mi pẹlu.

²²Lẹ́yìn tí mo bá ti sọ̀rọ̀ tán, ẹnikẹ́ni kì í tún sọ̀rọ̀ mọ́, ọ̀rọ̀ mi a máa wọ̀ wọ́n lára.

²³Wọ́n ń retí mi, bí ẹni retí òjò àkọ́rọ̀.

²⁴Mo rẹ́rìn-ín sí wọn nígbà tí wọn ń ṣiyèméjì, wọn kò sì lè kó ìrẹ̀wẹ̀sì bá mi.

²⁵Mo jókòó bí ọba, mò ń tọ́ wọn sọ́nà, mo dàbí ọba láàrin àwọn ọmọ ogun rẹ̀, bí olùtùnú fún oníròbìnújẹ́.