Read yoruba Ìwé ti Jobu 32 Bible Online

Ìwé ti Jobu 32 - yoruba bible

Ìwé ti Jobu 32

¹Àwọn ọkunrin mẹtẹẹta náà kò dá Jobu lóhùn mọ́, nítorí pé ó jẹ́ olódodo lójú ara rẹ̀.

²Elihu, ọmọ Barakeli, ará Busi, ní ìdílé Ramu bá bínú sí Jobu, nítorí pé ó dá ara rẹ̀ láre dípò Ọlọrun.

³Ó bínú sí àwọn ọ̀rẹ́ Jobu mẹtẹẹta pẹlu, nítorí pé wọn kò mọ èsì tí wọ́n lè fún Jobu mọ́, bí ó tilẹ̀ jẹ́ pé wọ́n dá a lẹ́bi.

⁴Elihu ti fẹ́ bá Jobu sọ̀rọ̀ tẹ́lẹ̀, ṣugbọn ó dákẹ́, nítorí àwọn àgbà tí wọ́n jù ú lọ ni wọ́n ń sọ̀rọ̀.

⁵Ṣugbọn nígbà tí Elihu rí i pé àwọn mẹtẹẹta kò lè fún Jobu lésì mọ́, inú bí i.

⁶Ó ní, “Àgbàlagbà ni yín, ọmọde sì ni mí, nítorí náà ni ojú fi ń tì mí, tí ẹ̀rù sì ń bà mí láti sọ èrò ọkàn mi.

⁷Mo ní kí ẹ̀yin àgbà sọ̀rọ̀, kí ọ̀rọ̀ yín sì fa ọgbọ́n yọ gẹ́gẹ́ bí ọjọ́ orí yín.

⁸Ṣugbọn ẹ̀mí tí ó wà ninu eniyan, tíí ṣe èémí Olodumare, ni ó ń fún eniyan ní ìmọ̀.

⁹Kì í ṣe àwọn àgbà nìkan ni wọ́n gbọ́n, tabi pé arúgbó nìkan ni ó mọ òye ohun tó tọ́, tó yẹ.

¹⁰Nítorí náà, ‘Ẹ fetí sílẹ̀, kí èmi náà lè sọ èrò ọkàn mi.’

¹¹“Mo farabalẹ̀ nígbà tí ẹ̀yin ń sọ̀rọ̀, mo fetí sí ọ̀rọ̀ ọgbọ́n yín, nígbà tí ẹ̀ ń ronú ohun tí ẹ fẹ́ sọ,

¹²Mo farabalẹ̀ fun yín, ṣugbọn kò sí ẹnikẹ́ni ninu yín tí ó lè ko Jobu lójú, kí ó sì fi àṣìṣe rẹ̀ hàn án, tabi kí ó fún un lésì àwọn àwíjàre rẹ̀.

¹³Ẹ ṣọ́ra, kí ẹ má baà wí pé, ‘A ti di ọlọ́gbọ́n, Ọlọrun ló lè ṣe ìdájọ́ rẹ̀, kì í ṣe eniyan.’

¹⁴Èmi kọ́ ni Jobu ń bá wí, ẹ̀yin ni, n kò sì ní dá a lóhùn bí ẹ ṣe dá a lóhùn.

¹⁵“Ọkàn wọn dàrú, wọn kò sì lè fèsì mọ́, bẹ́ẹ̀ ni wọn kò ní ohun kan láti sọ.

¹⁶Ṣé kí n dúró, nítorí pé wọ́n dúró láìfèsì?

¹⁷Èmi náà óo fèsì lé e, n óo sì sọ èrò ọkàn tèmi.

¹⁸Mo ní ọ̀rọ̀ pupọ láti sọ, Ṣugbọn ẹ̀mí tí ó wà ninu mi ló ń kó mi ní ìjánu.

¹⁹Ọ̀rọ̀ kún inú mi bí ọtí inú ìgò, ó fẹ́ ru síta bí ọtí inú ìgò aláwọ.

²⁰Mo níláti sọ̀rọ̀ kí ara lè rọ̀ mí, mo gbọdọ̀ la ẹnu mi kí n sì dáhùn.

²¹N kò ní ṣe ojuṣaaju ẹnikẹ́ni, bẹ́ẹ̀ ni n kò sì ní gbèjà eniyan.

²²Nítorí n kò mọ bí wọ́n ṣe ń pọ́n eniyan, kí Ẹlẹ́dàá mi má baà pa mí run ní kíá.