Read yoruba Ìwé ti Jobu 34 Bible Online

Ìwé ti Jobu 34 - yoruba bible

Ìwé ti Jobu 34

¹Elihu tún ń bá ọ̀rọ̀ rẹ̀ bọ̀, ó ní,

²“Ẹ gbọ́rọ̀ mi, ẹ̀yin ọlọ́gbọ́n, ẹ tẹ́tí sí mi, ẹ̀yin tí ẹ ní ìmọ̀,

³nítorí bí ahọ́n ti í máa ń tọ́ oúnjẹ wò, bẹ́ẹ̀ ni etí náà lè máa tọ́ ọ̀rọ̀ wò

⁴Ẹ jẹ́ kí á yan ohun tí ó tọ́, kí á jọ jíròrò ohun tí ó dára láàrin ara wa.

⁵Jobu sọ pé òun kò jẹ̀bi, ó ní Ọlọrun ni ó kọ̀ tí kò dá òun láre.

⁶Ó ní bí ó tilẹ̀ jẹ́ pé òun jàre, Ọlọrun ka òun kún òpùrọ́, bí ó tilẹ̀ jẹ́ pé òun kò dẹ́ṣẹ̀, ọgbẹ́ òun kò ṣe é wòsàn.

⁷“Ta ló dàbí Jobu, tí ń kẹ́gàn Ọlọrun nígbà gbogbo,

⁸tí ó ń bá àwọn aṣebi kẹ́gbẹ́, tí ó sì ń bá àwọn eniyan burúkú rìn?

⁹Nítorí ó ń sọ pé, ‘Kò sí èrè kankan, ninu ṣíṣe ìfẹ́ Ọlọrun.’

¹⁰“Nítorí náà ẹ gbọ́ tèmi, ẹ̀yin olóye, Ọlọrun kì í ṣe ibi, Olodumare kì í ṣe ohun tí kò tọ́.

¹¹Nítorí a máa san ẹ̀san fún eniyan gẹ́gẹ́ bí iṣẹ́ rẹ̀ ati gẹ́gẹ́ bí ìwà rẹ̀.

¹²Nítòótọ́, Ọlọrun kì í ṣe ibi, bẹ́ẹ̀ ni Olodumare kì í dájọ́ èké.

¹³Ta ló fi í ṣe alákòóso ayé, ta ló sì fi jẹ olórí gbogbo ayé?

¹⁴Bí Ọlọrun bá gba ẹ̀mí rẹ̀ sọ́dọ̀ ara rẹ̀, tí ó sì gba èémí rẹ̀ pada sọ́dọ̀,

¹⁵gbogbo eniyan ni yóo ṣègbé, tí wọn yóo sì pada di erùpẹ̀.

¹⁶“Bí ẹ bá ní òye, ẹ gbọ́ ohun tí mo fẹ́ sọ.

¹⁷Ǹjẹ́ ẹni tí ó kórìíra ìdájọ́ ẹ̀tọ́ lè jẹ́ olórí? Àbí ẹ lè dá olódodo ati alágbára lẹ́bi?

¹⁸Ẹni tí ó tó pe ọba ní eniyan lásán, tí ó tó pe ìjòyè ní ẹni ibi;

¹⁹ẹni tí kì í ṣe ojuṣaaju fún àwọn ìjòyè, tí kì í sì í ka ọlọ́rọ̀ sí ju talaka lọ, nítorí iṣẹ́ ọwọ́ rẹ̀ ni gbogbo wọn.

²⁰Wọn á kú ikú òjijì, ní ọ̀gànjọ́ òru; á mi gbogbo eniyan jìgìjìgì, wọn a sì kú. Ikú á mú àwọn alágbára lọ láì jẹ́ pé eniyan fi ọwọ́ kàn wọ́n.

²¹Nítorí pé ojú rẹ̀ tó gbogbo ọ̀nà tí eniyan ń tọ̀, ó sì rí gbogbo ìrìn ẹsẹ̀ wọn.

²²Kò sí ibi òkùnkùn biribiri kankan, tí àwọn eniyan burúkú lè fi ara pamọ́ sí.

²³Nítorí Ọlọrun kò nílò láti yan àkókò kan fún ẹnikẹ́ni, láti wá siwaju rẹ̀ fún ìdájọ́.

²⁴Á pa àwọn alágbára run láìṣe ìwádìí wọn, á sì fi àwọn ẹlòmíràn dípò wọn.

²⁵Nítorí pé ó mọ iṣẹ́ ọwọ́ wọn, á bì wọ́n ṣubú lóru, wọn á sì parun.

²⁶Á máa jẹ wọ́n níyà ní gbangba, nítorí ìwà ibi wọn.

²⁷Nítorí pé wọ́n kọ̀ láti tẹ̀lé e, wọn kò náání ọ̀nà rẹ̀ kankan,

²⁸wọ́n ń jẹ́ kí àwọn talaka máa kígbe sí Ọlọrun, a sì máa gbọ́ igbe àwọn tí a ni lára.

²⁹“Bí Ọlọrun bá dákẹ́, ta ló lè bá a wí? Nígbà tí ó bá fi ojú pamọ́, orílẹ̀-èdè tabi eniyan wo ló lè rí i?

³⁰Kí ẹni ibi má baà lè ṣe àkóso, kí ó má baà kó àwọn eniyan sinu ìgbèkùn.

³¹“Ǹjẹ́ ẹnikẹ́ni tíì sọ fún Ọlọrun pé, ‘Mo ti jìyà rí, n kò sì ní gbẹ̀ṣẹ̀ mọ́.

³²Kọ́ mi ní ohun tí n kò rí, bí mo bá ti ṣẹ̀ rí, n kò ní ṣe bẹ́ẹ̀ mọ́?’

³³Ṣé yóo san ẹ̀san fún ọ lọ́nà tí ó tẹ́ ọ lọ́rùn, nítorí pé o kọ̀ ọ́? Nítorí ìwọ ni o gbọdọ̀ yan ohun tí ó bá wù ọ́, kì í ṣe èmi, nítorí náà, sọ èrò ọkàn rẹ fún wa.

³⁴Àwọn tí wọ́n lóye yóo sọ fún mi, àwọn ọlọ́gbọ́n tí wọn ń gbọ́ mi yóo sọ pẹlu pé,

³⁵‘Jobu ń sọ̀rọ̀ láìní ìmọ̀, ó ń sọ̀rọ̀ láìní òye tí ó jinlẹ̀.’

³⁶À bá lè gbé ọ̀rọ̀ Jobu yẹ̀wò títí dé òpin, nítorí pé ó ń sọ̀rọ̀ bí eniyan burúkú.

³⁷Ó fi ọ̀tẹ̀ kún ẹ̀ṣẹ̀ tí ó dá; ó ń pàtẹ́wọ́ ẹlẹ́yà láàrin wa, ó sì ń kẹ́gàn Ọlọrun.”