Read yoruba Ìwé ti Jobu 35 Bible Online

Ìwé ti Jobu 35 - yoruba bible

Ìwé ti Jobu 35

¹Elihu tún ń bá ọ̀rọ̀ rẹ̀ bọ̀, ó ní,

²“Jobu, ṣé o rò pé ó tọ̀nà, kí o máa sọ pé, ‘Ọ̀nà mi tọ́ níwájú Ọlọrun?’

³Kí o tún máa bèèrè pé, ‘Anfaani wo ni mo ní? Tabi kí ni mo fi sàn ju ẹni tí ó dẹ́ṣẹ̀ lọ?’

⁴N óo dá ìwọ ati àwọn ọ̀rẹ́ rẹ lóhùn.

⁵Gbójú sókè kí o wo ojú ọ̀run, ati àwọn ìkùukùu tí ó wà lókè.

⁶Bí o bá dẹ́ṣẹ̀, kò ṣe Ọlọrun ní àìrójú, bí ẹ̀ṣẹ̀ rẹ bá pọ̀, kò jámọ́ nǹkankan fún un.

⁷Bí o bá jẹ́ olódodo, kí ni ó dà fún Ọlọrun, tabi kí ni ó ń rí gbà lọ́wọ́ rẹ?

⁸Àwọn eniyan burúkú bíì rẹ, ni ẹ̀ṣẹ̀ rẹ lè pa lára, àwọn ọmọ eniyan ni òdodo rẹ sì lè jẹ́ anfaani fún.

⁹“Àwọn eniyan ń kígbe nítorí ọpọlọpọ ìnira, wọ́n ń bẹ̀bẹ̀ fún ìrànlọ́wọ́, nítorí àwọn alágbára ń tẹ̀ wọ́n mọ́lẹ̀.

¹⁰Ṣugbọn kò sí ẹni tí ó bèèrè pé, ‘Níbo ni Ọlọrun Ẹlẹ́dàá mi wà, tíí fún ni ní orin ayọ̀ lóru,

¹¹ẹni tí ó ń kọ́ wa lẹ́kọ̀ọ́ ju àwọn ẹranko lọ, Ó sì fún wa ní ọgbọ́n ju àwọn ẹyẹ lọ?’

¹²Wọ́n kígbe níbẹ̀ ṣugbọn kò dá wọn lóhùn, nítorí ìgbéraga àwọn eniyan burúkú.

¹³Dájúdájú Ọlọrun kì í gbọ́ igbe asán, Olodumare kò tilẹ̀ náání rẹ̀.

¹⁴Kí á má tilẹ̀ sọ ti ìwọ Jobu, tí o sọ pé o kò rí i, ati pé ẹjọ́ rẹ wà níwájú rẹ̀, o sì ń dúró dè é!

¹⁵Ṣugbọn nisinsinyii, nítorí pé inú kì í bí i kí ó jẹ eniyan níyà, bẹ́ẹ̀ ni kò ka ẹ̀ṣẹ̀ kún lọ títí.

¹⁶Jobu kàn ń la ẹnu, ó sì ń sọ̀rọ̀ lásán ni. Ọ̀rọ̀ rẹ̀ pọ̀, ṣugbọn kò mú ọgbọ́n lọ́wọ́.”