Read yoruba Ìwé ti Jobu 36 Bible Online

Ìwé ti Jobu 36 - yoruba bible

Ìwé ti Jobu 36

¹Elihu tún tẹ̀síwájú ninu ọ̀rọ̀ rẹ̀, ó ní,

²“Ní sùúrù fún mi díẹ̀, n óo ṣe àlàyé fún ọ, nítorí mo ní ohun kan tí mo fẹ́ gbẹnusọ fún Ọlọrun.

³N óo gba ìmọ̀ mi láti ọ̀nà jíjìn, n óo sì fi júbà Ẹlẹ́dàá mi, tí ó ní ìmọ̀ òdodo.

⁴Nítorí òtítọ́ ni ọ̀rọ̀ mi; ẹni tí ìmọ̀ rẹ̀ péye ni èmi tí mò ń bá ọ sọ̀rọ̀ yìí.

⁵“Ọlọrun lágbára, kì í kẹ́gàn ẹnikẹ́ni, agbára ati òye rẹ̀ pọ̀ gan-an.

⁶Kì í jẹ́ kí eniyan burúkú ó wà láàyè, ṣugbọn a máa fún ẹni tí ìyà ń jẹ ní ẹ̀tọ́ rẹ̀.

⁷Kìí mú ojú kúrò lára àwọn olódodo, ṣugbọn a máa gbé wọn sórí ìtẹ́ pẹlu àwọn ọba, á gbé wọn ga, á sì fi ìdí wọn múlẹ̀ títí lae.

⁸Ṣugbọn bí a bá fi ṣẹ́kẹ́ṣẹkẹ̀ dè wọ́n, tí ayé wọn kún fún ìpọ́njú,

⁹a máa fi àṣìṣe wọn hàn wọ́n, ati ẹ̀ṣẹ̀ ìgbéraga wọn.

¹⁰Ó fún wọn ní etígbọ̀ọ́, ó sì pàṣẹ pé kí wọ́n yipada kúrò ninu ẹ̀ṣẹ̀.

¹¹Bí wọ́n bá gbọ́ràn, tí wọ́n sì sìn ín, wọn yóo lo ọjọ́ ayé wọn pẹlu ìdẹ̀rùn, wọn yóo ṣe ọ̀pọ̀ ọdún ninu ìgbádùn.

¹²Ṣugbọn bí wọn kò bá gbọ́ràn, a óo fi idà pa wọ́n, wọn yóo sì kú láìní ìmọ̀.

¹³“Àwọn tí kò mọ Ọlọrun fẹ́ràn ibinu, wọn kì í kígbe fún ìrànlọ́wọ́, nígbà tí ó bá fi wọ́n sinu ìdè.

¹⁴Wọn á kú ikú ìtìjú, nígbà tí wọ́n wà ní èwe.

¹⁵A máa lo ìpọ́njú àwọn tí à ń pọ́n lójú láti gbà wọ́n là, a sì máa lo ìdààmú wọn láti ṣí wọn létí.

¹⁶A máa yọ ọ́ kúrò ninu ìpọ́njú, bọ́ sinu ìdẹ̀ra níbi tí kò sí wahala, oúnjẹ tí a gbé kalẹ̀ níwájú rẹ̀ a sì jẹ́ kìkì àdídùn.

¹⁷“Ṣugbọn, ìdájọ́ eniyan burúkú dé bá ọ, ọwọ́ ìdájọ́ ati òdodo sì ti tẹ̀ ọ́.

¹⁸Ṣọ́ra kí ibinu má baà sọ ọ́ di ẹlẹ́yà, kí títóbi àbẹ̀tẹ́lẹ̀ sì mú ọ ṣìnà.

¹⁹Igbe ati agbára rẹ kò lè gbà ọ́ kúrò ninu ìpọ́njú.

²⁰Má máa dúró, kí o máa retí ọjọ́ alẹ́, nígbà tí à ń pa àwọn eniyan run.

²¹Ṣọ́ra kí o má yipada sí ìwà ẹ̀ṣẹ̀, tí ó wù ọ́ ju ìjìyà lọ.

²²“Wò ó, a gbé OLUWA ga ninu agbára rẹ̀; ta ni olùkọ́ tí ó dàbí rẹ̀?

²³Ta ló ń sọ ohun tí yóo ṣe fún un, tabi kí ó sọ fún un pé, ‘Ohun tí o ṣe yìí kò dára?’

²⁴Ranti láti gbé iṣẹ́ rẹ̀ ga, tí àwọn eniyan ń kọrin nípa rẹ̀.

²⁵Gbogbo eniyan ti rí i; àwọn tí wọ́n wà ní òkèèrè ń wò ó.

²⁶Wò ó, Ọlọrun tóbi lọ́ba, ju ìmọ̀ wa lọ, kò sí ẹni tí ó lè mọ ọjọ́ orí rẹ̀.

²⁷“Ó fa ìkán omi sókè láti inú ilẹ̀, ó sọ ìkùukùu di òjò,

²⁸ó sì rọ òjò sílẹ̀ láti ojú ọ̀run sórí ọmọ eniyan lọpọlọpọ.

²⁹Ta ló mọ bí ó ti tẹ́ ìkùukùu? Tabi bí ó ṣe ń sán ààrá láti inú àgọ́ rẹ̀?

³⁰Ó fi mànàmáná yí ara rẹ̀ ká, ó sì bo ìsàlẹ̀ òkun mọ́lẹ̀.

³¹Bẹ́ẹ̀ ni ó ṣe ń ṣàkóso àwọn orílẹ̀-èdè; ó sì ń fún wọn ní oúnjẹ lọpọlọpọ.

³²Ìkáwọ́ rẹ̀ ni mànàmáná wà, ó sì ń rán ààrá láti sán lu ohun tí ó bá fẹ́.

³³Ìró ààrá ń kéde bíbọ̀ rẹ̀, àwọn ẹran ọ̀sìn sì mọ̀ pé ó súnmọ́ tòsí.