Read yoruba Ìwé ti Jobu 41 Bible Online

Ìwé ti Jobu 41 - yoruba bible

Ìwé ti Jobu 41

¹“Ṣé o lè fi ìwọ̀ fa Lefiatani jáde, tabi kí o fi okùn di ahọ́n rẹ̀?

²Ṣé o lè fi okùn sí imú rẹ̀, tabi kí o fi ìwọ̀ kọ́ ọ ní àgbọ̀n?

³Ṣé yóo bẹ̀ ọ́, tabi kí ó fi pẹ̀lẹ́pẹ̀lẹ́ bá ọ sọ̀rọ̀?

⁴Ṣé yóo bá ọ dá majẹmu, pé kí o fi òun ṣe iranṣẹ títí lae?

⁵Ṣé o lè máa fi ṣeré bí ọmọ ẹyẹ, tabi kí o dè é lókùn fún àwọn iranṣẹbinrin rẹ?

⁶Ṣé àwọn oníṣòwò lè yọwó rẹ̀? Àbí wọ́n lè pín Lefiatani láàrin ara wọn?

⁷Ṣé o lè fi ọ̀kọ̀ gún ẹran ara rẹ̀, tabi kí o fi ẹ̀sín àwọn apẹja gún orí rẹ̀?

⁸Lọ fọwọ́ kàn án; kí o wo irú ìjà tí yóo bá ọ jà; o kò sì ní dán irú rẹ̀ wò mọ́ lae!

⁹“Ìrètí ẹni tí ó bá fẹ́ bá a jà yóo di òfo, nítorí ojora yóo mú un nígbà tí ó bá rí i.

¹⁰Ta ló láyà láti lọ jí i níbi tí ó bá sùn sí? Ta ló tó kò ó lójú?

¹¹Ta ni mo gba nǹkan lọ́wọ́ rẹ̀ tí mo níláti dá a pada fún un? Kò sí olúwarẹ̀ ní gbogbo ayé.

¹²“N kò ní yé sọ̀rọ̀ nípa ẹsẹ̀ rẹ̀, tabi nípa agbára rẹ̀ tabi dídára ìdúró rẹ̀.

¹³Ta ló tó bó awọ rẹ̀, tabi kí ó fi nǹkan gún igbá ẹ̀yìn rẹ̀?

¹⁴Ta ló tó ya ẹnu rẹ̀? Gbogbo eyín rẹ̀ ni ó kún fún ẹ̀rù.

¹⁵Ẹ̀yìn rẹ̀ kún fún ìpẹ́ tí ó dàbí apata, a tò wọ́n lẹ́sẹẹsẹ, wọ́n súnmọ́ ara wọn pẹ́kípẹ́kí bí èdìdì.

¹⁶Àwọn ìpẹ́ náà lẹ̀ mọ́ ara wọn tímọ́tímọ́, tóbẹ́ẹ̀ tí afẹ́fẹ́ kò lè fẹ́ kọjá láàrin wọn.

¹⁷Wọ́n so pọ̀, wọ́n lẹ̀ mọ́ ara wọn tóbẹ́ẹ̀, tí ohunkohun kò lè ṣí wọn.

¹⁸Bí ó bá sín, ìmọ́lẹ̀ á tàn jáde ní imú rẹ̀, ojú rẹ̀ ń tàn bíi ìmọ́lẹ̀ òwúrọ̀ kutukutu.

¹⁹Ahọ́n iná ń yọ lẹ́nu rẹ̀ bí iná tí ń ta jáde, bẹ́ẹ̀ ni ahọ́n iná ń yọ lálá.

²⁰Èéfín ń jáde ní imú rẹ̀, bíi ti ìkòkò gbígbóná ati ìgbẹ́ tí ń jó.

²¹Èémí tí ó ń mí jáde dàbí ògúnná, ahọ́n iná ń yọ ní ẹnu rẹ̀.

²²Kìkì agbára ni ọrùn rẹ̀, ẹ̀rù jẹ̀jẹ̀ sì ń bẹ níwájú rẹ̀.

²³Ìṣẹ́po ẹran ara rẹ̀ lẹ̀ pọ̀ mọ́ ara wọn, wọ́n lẹ̀ pọ̀, wọn kò sì ṣe é ṣí.

²⁴Ọkàn rẹ̀ le bí òkúta, ó le ju ọlọ lọ.

²⁵Bí ó bá dìde, ẹ̀rù á ba àwọn alágbára, wọn á bì sẹ́yìn, wọn á ṣubú lé ara wọn lórí.

²⁶Bí idà tilẹ̀ bá a, kò ràn án, bẹ́ẹ̀ náà ni ọ̀kọ̀, ati ọfà, ati ẹ̀sín.

²⁷Irin kò yàtọ̀ sí koríko lójú rẹ̀, idẹ sì dàbí igi tí ó ti rà.

²⁸Bí wọn ta á lọ́fà, kò ní torí rẹ̀ sá, àwọn òkúta kànnàkànnà dàbí àgékù koríko lójú rẹ̀.

²⁹Kùmọ̀ dàbí koríko lára rẹ̀, a sì máa fi ẹni tí ó ju ọ̀kọ̀ lù ú rẹ́rìn-ín.

³⁰Ìpẹ́ ikùn rẹ̀ dàbí àpáàdì tí ó mú, wọn ń fa ilẹ̀ tútù ya bí ọkọ́.

³¹Ó mú kí ibú hó bí omi inú ìkòkò, ó ṣe òkun bí ìkòkò òróró ìpara.

³²Bí ó bá ń rìn lọ, ipa ọ̀nà rẹ̀ a máa hàn lẹ́yìn rẹ̀, eniyan á rò pé òkun ń hó bí ọṣẹ ni.

³³Kò sí ohun tí a lè fi wé láyé, ẹ̀dá tí ẹ̀rù kì í bà.

³⁴Ó fojú tẹmbẹlu gbogbo ohun gíga, ó sì jọba lórí gbogbo àwọn ọmọ agbéraga.”