Read yoruba Orin Dafidi 102 Bible Online

Orin Dafidi 102 - yoruba bible

Orin Dafidi 102

¹Gbọ́ adura mi, OLUWA; kí o sì jẹ́ kí igbe mi dé ọ̀dọ̀ rẹ.

²Má yọwọ́ lọ́ràn mi lọ́jọ́ ìṣòro! Dẹtí sí adura mi; kí o sì tètè dá mi lóhùn nígbà tí mo bá ké pè ọ́.

³Nítorí ọjọ́ ayé mi ń kọjá lọ bí èéfín, eegun mi gbóná bí iná ààrò.

⁴Ìdààmú bá ọkàn mi, mo rọ bíi koríko, tóbẹ́ẹ̀ tí mo gbàgbé láti jẹun.

⁵Nítorí igbe ìrora mi, mo rù kan eegun.

⁶Mo dàbí igúnnugún inú aṣálẹ̀, àní, bí òwìwí inú ahoro.

⁷Mo dùbúlẹ̀ láìlè sùn, mo dàbí ẹyẹ tí ó dá wà lórí òrùlé.

⁸Àwọn ọ̀tá ń fi mí ṣe yẹ̀yẹ́ tọ̀sán-tòru, àwọn tí wọn ń pẹ̀gàn mi ń fi orúkọ mi ṣépè.

⁹Mò ń jẹ eérú bí oúnjẹ, mo sì ń mu omijé mọ́ omi

¹⁰nítorí ìrúnú ati ibinu rẹ; o gbé mi sókè, o sì jù mí nù.

¹¹Ọjọ́ ayé mi ń lọ bí òjìji àṣáálẹ́, mo sì ń rọ bíi koríko.

¹²Bẹ́ẹ̀ sì ni ìwọ OLUWA gúnwà títí lae, ọlá rẹ sì wà láti ìran dé ìran.

¹³Ìwọ óo dìde, o óo sì ṣàánú Sioni, nítorí ó tó àkókò láti fi ojú àánú wò ó. Àkókò tí o dá tó.

¹⁴Nítorí àwọn òkúta rẹ̀ ṣe iyebíye lójú àwọn iranṣẹ rẹ, àánú rẹ̀ sì ṣeni bí ó tilẹ̀ ti wó dà sinu erùpẹ̀.

¹⁵Àwọn orílẹ̀-èdè yóo máa bẹ̀rù orúkọ OLUWA, gbogbo ọba ayé ni yóo sì máa bẹ̀rù ògo rẹ̀.

¹⁶Nítorí OLUWA yóo tún Sioni kọ́, yóo sì fara hàn ninu ògo rẹ̀.

¹⁷Yóo gbọ́ adura àwọn aláìní, kò sì ní kẹ́gàn ẹ̀bẹ̀ wọn.

¹⁸Kí ẹ kọ èyí sílẹ̀ fún ìran tí ń bọ̀, kí àwọn ọmọ tí a kò tíì bí lè máa yin OLUWA,

¹⁹pé OLUWA bojú wo ilẹ̀ láti òkè mímọ́ rẹ̀, láti ọ̀run ni ó ti bojú wo ayé;

²⁰láti gbọ́ ìkérora àwọn ìgbèkùn, ati láti dá àwọn tí a dájọ́ ikú fún sílẹ̀.

²¹Kí á lè pòkìkí orúkọ OLUWA ní Sioni, kí á sì máa yìn ín lógo ní Jerusalẹmu,

²²nígbà tí àwọn orílẹ̀-èdè bá péjọ tàwọn tọba wọn, láti sin OLUWA.

²³Ó ti gba agbára mi ní àìpé ọjọ́, ó ti gé ọjọ́ ayé mi kúrú.

²⁴Mo ní, “Áà! Ọlọrun mi, má mú mi kúrò láyé láìpé ọjọ́, ìwọ tí ọjọ́ ayé rẹ kò lópin.”

²⁵Láti ìgbà laelae ni o ti fi ìpìlẹ̀ ayé sọlẹ̀, iṣẹ́ ọwọ́ rẹ sì ni ọ̀run.

²⁶Wọn óo parẹ́ ṣugbọn ìwọ yóo wà títí lae; gbogbo wọn yóo gbó bí aṣọ, o óo pààrọ̀ wọn bí aṣọ; wọn yóo sì di ohun ìpatì.

²⁷Ṣugbọn ìwọ wà bákan náà, ọjọ́ ayé rẹ kò sì lópin.

²⁸Ọmọ àwọn iranṣẹ rẹ yóo ní ibùgbé; bẹ́ẹ̀ ni arọmọdọmọ wọn yóo fẹsẹ̀ múlẹ̀ níwájú rẹ.