Read yoruba Orin Dafidi 109 Bible Online

Orin Dafidi 109 - yoruba bible

Orin Dafidi 109

¹Má dákẹ́, ìwọ Ọlọrun tí mò ń yìn.

²Nítorí pé ẹnu àwọn eniyan burúkú ati ti àwọn ẹlẹ́tàn kò dákẹ́, wọ́n ń sọ̀rọ̀ èké nípa mi.

³Wọ́n ń sọ ọ̀rọ̀ ìbàjẹ́ káàkiri nípa mi, wọ́n sì ń gbógun tì mí láìnídìí.

⁴Èmi fẹ́ràn wọn; ṣugbọn ẹ̀sùn ni wọ́n fi ń kàn mí, sibẹ, adura ni mò ń gbà fún wọn.

⁵Ibi ni wọ́n fí ń san oore fún mi, ìkórìíra ni wọ́n sì fi ń san ìfẹ́ tí mo ní sí wọn.

⁶Yan eniyan burúkú tì í, jẹ́ kí ẹlẹ́sùn èké kó o sẹ́jọ́.

⁷Nígbà tí a bá ń dá ẹjọ́ rẹ̀, jẹ́ kí wọn dá a lẹ́bi; kí ẹ̀bẹ̀ rẹ̀ di ọ̀ràn sí i lọ́rùn.

⁸Ṣe é ní ẹlẹ́mìí kúkúrú, kí ohun ìní rẹ̀ di ti àwọn alọ́nilọ́wọ́gbà.

⁹Kí àwọn ọmọ rẹ̀ di aláìníbaba, kí aya rẹ̀ di opó.

¹⁰Kí àwọn ọmọ rẹ̀ di alárìnká, kí wọn máa ṣagbe kiri; kí á lé wọn jáde kúrò ninu ahoro tí wọn ń gbé.

¹¹Kí ẹni tí ó jẹ lówó gba gbogbo ohun ìní rẹ̀, kí ẹni ẹlẹ́ni sì kó èrè iṣẹ́ rẹ̀.

¹²Kí ó má bá aláàánú pàdé, kí ẹnikẹ́ni má sì ṣàánú àwọn ọmọ rẹ̀ tí wọ́n ti di aláìníbaba.

¹³Kí ìran rẹ̀ run, kí orúkọ rẹ̀ parẹ́ lórí àwọn ọmọ rẹ̀.

¹⁴Kí OLUWA máa ranti ẹ̀ṣẹ̀ àwọn baba rẹ̀, kí ó má sì pa ẹ̀ṣẹ̀ ìyá rẹ̀ rẹ́.

¹⁵Kí OLUWA máa ranti ẹ̀ṣẹ̀ wọn nígbà gbogbo, kí á má sì ranti ìran wọn mọ́ láyé.

¹⁶Nítorí pé kò ronú láti ṣàánú, ṣugbọn ó ṣe inúnibíni talaka ati aláìní, ati sí oníròbìnújẹ́ títí a fi pa wọ́n.

¹⁷Ó fẹ́ràn láti máa ṣépè; nítorí náà kí èpè rẹ̀ dà lé e lórí; inú rẹ̀ kò dùn sí ìre, nítorí náà kí ìre jìnnà sí i.

¹⁸Ó gbé èpè wọ̀ bí ẹ̀wù, kí èpè mù ún bí omi, kí ó sì wọ inú egungun rẹ̀ dé mùdùnmúdùn.

¹⁹Kí èpè di aṣọ ìbora fún un, ati ọ̀já ìgbànú.

²⁰Bẹ́ẹ̀ ni kí OLUWA ṣe sí àwọn ọ̀tá mi, àwọn tí ń sọ̀rọ̀ ibi nípa mi!

²¹Ṣugbọn, ìwọ OLUWA Ọlọrun mi, gbèjà mi nítorí orúkọ rẹ, gbà mí! Nítorí ìfẹ́ rere rẹ tí kì í yẹ̀.

²²Nítorí pé talaka ati aláìní ni mí, ọkàn mí bàjẹ́ lọpọlọpọ.

²³Mò ń parẹ́ lọ bí òjìji àṣáálẹ́, a ti gbọ̀n mí dànù bí eṣú.

²⁴Ẹsẹ̀ mi kò ranlẹ̀ mọ́ nítorí ààwẹ̀ gbígbà, mo rù kan egungun.

²⁵Mo di ẹni ẹ̀gàn níwájú àwọn ọ̀tá mi, wọ́n ń wò mí ní àwòmirí.

²⁶Ràn mí lọ́wọ́, OLUWA, Ọlọrun mi, gbà mí, nítorí ìfẹ́ rẹ tí kì í yẹ̀.

²⁷Jẹ́ kí wọn mọ̀ pé iṣẹ́ ọwọ́ rẹ ni èyí, kí wọn mọ̀ pé, ìwọ OLUWA ni o ṣe é.

²⁸Kí wọn máa ṣépè, ṣugbọn kí ìwọ máa súre. Kí ojú ti àwọn alátakò mi, kí inú èmi, iranṣẹ rẹ, sì máa dùn.

²⁹Kí ìtìjú bo àwọn ọ̀tá mi bi aṣọ, àní, kí wọn gbé ìtìjú wọ̀ bí ẹ̀wù.

³⁰N óo máa fi ẹnu mi yin OLUWA gidigidi, àní, n óo máa yìn ín ní àwùjọ ọ̀pọ̀ eniyan.

³¹Nítorí pé ó dúró ti aláìní láti gbà á lọ́wọ́ àwọn tí ó dájọ́ ikú fún un.