Read yoruba Orin Dafidi 115 Bible Online

Orin Dafidi 115 - yoruba bible

Orin Dafidi 115

¹Ògo kì í ṣe fún wa, OLUWA, Kì í ṣe fún wa, orúkọ rẹ nìkan ṣoṣo ni kí á yìn lógo, nítorí ìfẹ́ rẹ tí kì í yẹ̀, ati nítorí òtítọ́ rẹ.

²Kí ló dé tí àwọn orílẹ̀-èdè yóo fi bèèrè pé, níbo ni Ọlọrun wa wà?

³Ọlọrun wa wà ní ọ̀run, ó ń ṣe ohun tí ó wù ú.

⁴Fadaka ati wúrà ni ère tiwọn, iṣẹ́ ọwọ́ eniyan ni wọ́n.

⁵Wọ́n ní ẹnu, ṣugbọn wọn kò lè sọ̀rọ̀, wọ́n lójú, ṣugbọn wọn kò ríran.

⁶Wọ́n létí, ṣugbọn wọn kò gbọ́ràn, wọ́n nímú, ṣugbọn wọn kò gbóòórùn.

⁷Wọ́n lọ́wọ́, ṣugbọn wọn kò lè lò ó, wọ́n lẹ́sẹ̀, ṣugbọn wọn kò lè rìn, bẹ́ẹ̀ ni wọn kò lè gbin.

⁸Àwọn tí ó ń yá àwọn ère náà dàbí wọn, bẹ́ẹ̀ sì ni àwọn tí wọ́n gbẹ́kẹ̀lé wọn.

⁹Ẹ̀yin ọmọ Israẹli, ẹ gbẹ́kẹ̀lé OLUWA, òun ni olùrànlọ́wọ́ ati aláàbò yín.

¹⁰Ẹ̀yin ìdílé Aaroni, ẹ gbẹ́kẹ̀lé OLUWA, òun ni olùrànlọ́wọ́ ati aláàbò yín.

¹¹Ẹ̀yin tí ẹ bẹ̀rù OLUWA, ẹ gbẹ́kẹ̀lé e, òun ni olùrànlọ́wọ́ ati aláàbò yín.

¹²OLUWA ranti wa, yóo bukun wa, yóo bukun ilé Israẹli, yóo bukun ìdílé Aaroni.

¹³Yóo bukun àwọn tí ó bẹ̀rù rẹ̀, ati àwọn ọlọ́lá ati àwọn mẹ̀kúnnù.

¹⁴OLUWA yóo jẹ́ kí ẹ máa bí sí i, àtẹ̀yin àtàwọn ọmọ yín.

¹⁵Kí OLUWA tí ó dá ọ̀run ati ayé bukun yín!

¹⁶OLUWA ló ni ọ̀run, ṣugbọn ó fi ayé fún àwọn eniyan.

¹⁷Àwọn òkú kò lè yin OLUWA, àní àwọn tí wọ́n ti dákẹ́ ninu ibojì.

¹⁸Ṣugbọn àwa yóo máa yin OLUWA, láti ìsinsìnyìí lọ, ati títí laelae. Ẹ máa yin OLUWA.