Read yoruba Orin Dafidi 116 Bible Online

Orin Dafidi 116 - yoruba bible

Orin Dafidi 116

¹Mo fẹ́ràn OLUWA nítorí pé ó gbọ́ adura ati ẹ̀bẹ̀ mi.

²Nítorí pé ó tẹ́tí sí mi, nítorí náà, n óo máa ké pè é níwọ̀n ìgbà tí mo bá wà láàyè.

³Tàkúté ikú yí mi ká; ìrora isà òkú dé bá mi; ìyọnu ati ìnira sì bò mí mọ́lẹ̀.

⁴Nígbà náà ni mo ké pe OLUWA, mo ní, “OLUWA, mo bẹ̀ ọ́, gbà mí!”

⁵Olóore ọ̀fẹ́ ati olódodo ni OLUWA, aláàánú ni Ọlọrun wa.

⁶OLUWA a máa pa àwọn onírẹ̀lẹ̀ mọ́; nígbà tí a rẹ̀ mí sílẹ̀, ó gbà mí.

⁷Sinmi ìwọ ọkàn mi, bíi ti àtẹ̀yìnwá, nítorí pé OLUWA ṣeun fún ọ lọpọlọpọ.

⁸Nítorí ìwọ OLUWA ti gba ọkàn mi lọ́wọ́ ikú, o gba ojú mi lọ́wọ́ omijé, o sì gba ẹsẹ̀ mi lọ́wọ́ ìṣubú.

⁹Mò ń rìn níwájú OLUWA, lórí ilẹ̀ alààyè.

¹⁰Igbagbọ mi kò yẹ̀, nígbà tí mo tilẹ̀ wí pé, “Ìpọ́njú dé bá mi gidigidi.”

¹¹Mo wí ninu ìdààmú ọkàn pé, “Èké ni gbogbo eniyan.”

¹²Kí ni n óo san fún OLUWA, nítorí gbogbo oore rẹ̀ lórí mi?

¹³N óo mu ẹbọ nǹkan mímu wá fún OLUWA, n óo sì pe orúkọ rẹ̀.

¹⁴N óo san ẹ̀jẹ́ mi fún OLUWA, lójú gbogbo àwọn eniyan rẹ̀.

¹⁵Iyebíye ni ikú àwọn eniyan rẹ̀ mímọ́ lójú OLUWA.

¹⁶OLUWA, iranṣẹ rẹ ni mo jẹ́, iranṣẹ rẹ ni mo jẹ́, àní, ọmọ iranṣẹbinrin rẹ. O ti tú ìdè mi.

¹⁷N óo rú ẹbọ ọpẹ́ sí ọ, n óo sì pe orúkọ rẹ OLUWA.

¹⁸N óo san ẹ̀jẹ́ mi fún OLUWA lójú gbogbo àwọn eniyan rẹ̀,

¹⁹ninu àgbàlá ilé OLUWA, láàrin rẹ, ìwọ ìlú Jerusalẹmu. Ẹ máa yin OLUWA!