Read yoruba Orin Dafidi 135 Bible Online

Orin Dafidi 135 - yoruba bible

Orin Dafidi 135

¹Ẹ yin OLUWA. Ẹ yin orúkọ OLUWA; ẹ yìn ín, ẹ̀yin iranṣẹ rẹ̀,

²ẹ̀yin tí ẹ̀ ń jọ́sìn ninu ilé OLUWA, tí ẹ wà ní àgbàlá ilé Ọlọrun wa.

³Ẹ yin OLUWA, nítorí pé ó ṣeun; ẹ kọrin ìyìn sí i, nítorí pé olóore ọ̀fẹ́ ni.

⁴Nítorí pé OLUWA ti yan Jakọbu fún ara rẹ̀, ó ti yan Israẹli gẹ́gẹ́ bí ìní rẹ̀.

⁵Èmi mọ̀ pé OLUWA tóbi, ati pé ó ju gbogbo oriṣa lọ.

⁶Bí ó ti wu OLUWA ni ó ń ṣe lọ́run ati láyé, ninu òkun ati ninu ibú.

⁷Òun ló gbá ìkùukùu jọ láti òpin ilẹ̀ ayé, ó fi mànàmáná fún òjò, ó sì mú afẹ́fẹ́ jáde láti inú ilé ìṣúra rẹ̀.

⁸Òun ló pa àwọn àkọ́bí ní ilẹ̀ Ijipti, ati teniyan ati tẹran ọ̀sìn.

⁹Ẹni tí ó rán iṣẹ́ abàmì ati iṣẹ́ ìyanu sí ilẹ̀ Ijipti, ó rán sí Farao ati gbogbo àwọn iranṣẹ rẹ̀.

¹⁰Ẹni tí ó pa orílẹ̀-èdè pupọ run; ó pa àwọn ọba alágbára:

¹¹Sihoni ọba àwọn Amori, Ogu ọba Baṣani, ati gbogbo ọba ilẹ̀ Kenaani.

¹²Ó pín ilẹ̀ wọn fún àwọn eniyan rẹ̀; ó pín in fún Israẹli bí ohun ìní wọn.

¹³OLUWA, orúkọ rẹ yóo wà títí lae, òkìkí rẹ óo sì máa kàn títí ayé.

¹⁴OLUWA yóo dá àwọn eniyan rẹ̀ láre, yóo sì ṣàánú àwọn iranṣẹ rẹ̀.

¹⁵Wúrà ati fadaka ni àwọn orílẹ̀-èdè yòókù fi ṣe oriṣa wọn, iṣẹ́ ọwọ́ eniyan ni wọ́n.

¹⁶Wọ́n lẹ́nu, ṣugbọn wọn kò lè sọ̀rọ̀, wọ́n lójú, ṣugbọn wọn kò lè ríran.

¹⁷Wọ́n létí, ṣugbọn wọn kò lè gbọ́ràn, bẹ́ẹ̀ ni kò sí èémí kan ní ẹnu wọn.

¹⁸Àwọn tí ń ṣe wọ́n yóo dàbí wọn, ati gbogbo àwọn tí ó bá gbẹ́kẹ̀lé wọn.

¹⁹Ẹ̀yin ọmọ Israẹli, ẹ yin OLUWA, ẹ̀yin ará ilé Aaroni, ẹ yin OLUWA!

²⁰Ẹ̀yin ará ilé Lefi, ẹ yin OLUWA, ẹ̀yin tí ẹ bẹ̀rù OLUWA, ẹ yìn ín!

²¹Ẹ yin OLUWA ní Sioni, ẹni tí ń gbé Jerusalẹmu! Ẹ yin OLUWA!