Read yoruba Orin Dafidi 140 Bible Online

Orin Dafidi 140 - yoruba bible

Orin Dafidi 140

¹OLUWA, gbà mí lọ́wọ́ àwọn ẹni ibi; dáàbò bò mí lọ́wọ́ àwọn oníwà ipá;

²àwọn tí ó ń pète ibi lọ́kàn wọn, tí wọ́n sì ń dá ogun sílẹ̀ nígbàkúùgbà,

³Wọ́n pọ́n ahọ́n wọn, ó mú bí ahọ́n ejò; oró paramọ́lẹ̀ sì ń bẹ ninu eyín wọn.

⁴OLUWA, ṣọ́ mi lọ́wọ́ àwọn eniyan burúkú; dáàbò bò mí lọ́wọ́ àwọn oníwà ipá, tí ó ń gbìmọ̀ láti ré mi lẹ́pa.

⁵Àwọn agbéraga ti dẹ tàkúté sílẹ̀ dè mí, wọ́n dẹ àwọ̀n sílẹ̀ fún mi; wọ́n sì dẹ okùn sílẹ̀ fún mi lẹ́bàá ọ̀nà.

⁶Mo wí fún OLUWA pé, “Ìwọ ni Ọlọrun mi.” OLUWA, tẹ́tí sí ohùn ẹ̀bẹ̀ mi.

⁷OLUWA, OLUWA mi, alágbára tíí gbani là, ìwọ ni o dáàbò bò mí ní ọjọ́ ogun.

⁸OLUWA, má jẹ́ kí ọwọ́ àwọn eniyan burúkú tẹ ohun tí wọn ń wá; má jẹ́ kí èrò ọkàn wọn ṣẹ.

⁹Jẹ́ kí ọ̀rọ̀ ibi ẹnu àwọn tí ó yí mi ká dà lé wọn lórí.

¹⁰Jẹ́ kí ẹ̀yinná dà lé wọn lórí; jẹ́ kí wọn já sí kòtò, kí wọn má lè yọ.

¹¹Má jẹ́ kí abanijẹ́ fi ẹsẹ̀ múlẹ̀ lórí ilẹ̀ náà; jẹ́ kí oníwà ipá ko àgbákò kíákíá.

¹²Mo mọ̀ pé OLUWA yóo gba ọ̀ràn olùpọ́njú rò, yóo sì ṣe ìdájọ́ òdodo fún àwọn aláìní.

¹³Dájúdájú, àwọn olódodo yóo máa fi ọpẹ́ fún ọ; àwọn olóòótọ́ yóo sì máa gbé níwájú rẹ.