Read yoruba Orin Dafidi 147 Bible Online

Orin Dafidi 147 - yoruba bible

Orin Dafidi 147

¹Ẹ yin OLUWA! Nítorí tí ó dára láti máa kọ orin ìyìn sí Ọlọrun wa; nítorí olóore ni, orin ìyìn sì yẹ ẹ́.

²OLUWA ní ń kọ́ ìlú Jerusalẹmu; òun ni yóo kó àwọn ọmọ Israẹli tí a fọ́n ká jọ.

³Ó ń tu àwọn tí ọkàn wọn bàjẹ́ ninu, ó sì ń dí ọgbẹ́ wọn.

⁴Òun ló mọ iye àwọn ìràwọ̀, òun ló sì fún gbogbo wọn lórúkọ.

⁵OLUWA wa tóbi, ó sì lágbára pupọ òye rẹ̀ kò ní ìwọ̀n.

⁶OLUWA ní ń gbé àwọn onírẹ̀lẹ̀ ró, òun ni ó sì ń sọ àwọn eniyan burúkú di ilẹ̀ẹ́lẹ̀.

⁷Ẹ kọ orin ọpẹ́ sí OLUWA, ẹ fi hapu kọ orin dídùn sí Ọlọrun wa.

⁸Ẹni tí ó fi ìkùukùu bo ojú ọ̀run, ó pèsè òjò fún ilẹ̀, ó mú koríko hù lórí òkè.

⁹Òun ni ó ń fún àwọn ẹranko ní oúnjẹ, tí ó sì ń bọ́ ọmọ ẹyẹ ìwò, tí ó ń ké.

¹⁰Kì í ṣe agbára ẹṣin ni inú rẹ̀ dùn sí, kì í sì í ṣe inú agbára eniyan ni ayọ̀ rẹ̀ wà.

¹¹Ṣugbọn inú OLUWA dùn sí àwọn tí ó bẹ̀rù rẹ̀, àwọn tí ó ní ìrètí ninu ìfẹ́ rẹ̀ tí kì í yẹ̀.

¹²Gbé OLUWA ga, ìwọ Jerusalẹmu! Yin Ọlọrun rẹ, ìwọ Sioni!

¹³Ó fún ẹnubodè rẹ ní agbára, ó sì bukun àwọn tí ń gbé inú rẹ.

¹⁴Ó jẹ́ kí alaafia wà ní ààlà ilẹ̀ rẹ, ó sì fi oúnjẹ tí ó dára bọ́ ọ lábọ̀ọ́yó.

¹⁵Ó pàṣẹ lórí ilẹ̀ ayé, àṣẹ rẹ̀ sì múlẹ̀ kíá.

¹⁶Ó da òjò dídì bo ilẹ̀ bí ẹ̀gbọ̀n òwú, ó sì fọ́n ìrì dídì ká bí eérú.

¹⁷Ó sọ yìnyín sílẹ̀ bí òkò, ta ni ó lè fara da òtútù rẹ̀?

¹⁸Ó sọ̀rọ̀, wọ́n yọ́, ó fẹ́ afẹ́fẹ́, omi sì bẹ̀rẹ̀ sí ṣàn.

¹⁹Ó ṣí ọ̀rọ̀ rẹ̀ payá fún Jakọbu, ó sì fi òfin ati ìlànà rẹ̀ han Israẹli.

²⁰Kò ṣe bẹ́ẹ̀ fún orílẹ̀-èdè kankan rí, wọn kò sì mọ ìlànà rẹ̀. Ẹ yin OLUWA!