Read yoruba Orin Dafidi 38 Bible Online

Orin Dafidi 38 - yoruba bible

Orin Dafidi 38

¹OLUWA, má fi ibinu bá mi wí! Má sì fi ìrúnú jẹ mí níyà!

²Nítorí pé ọfà rẹ ti wọ̀ mí lára, ọwọ́ rẹ sì ti bà mí.

³Kò sí ibìkan tí ó gbádùn ní gbogbo ara mi nítorí ibinu rẹ; kò sì sí alaafia ninu gbogbo egungun mi, nítorí ẹ̀ṣẹ̀ mi.

⁴Ẹ̀ṣẹ̀ mi ti bò mí lórí mọ́lẹ̀; ó rìn mí mọ́lẹ̀ bí ẹrù ńlá tí ó wúwo jù fún mi.

⁵Ọgbẹ́ mi ń kẹ̀, ó sì ń rùn, nítorí ìwà òmùgọ̀ mi,

⁶Ìbànújẹ́ dorí mi kodò patapata, mo sì ń ṣọ̀fọ̀ kiri tọ̀sán-tòru.

⁷Gbogbo ẹ̀gbẹ́ mi ń gbóná fòò, kò sí ibìkan tí ó gbádùn lára mi.

⁸Àárẹ̀ mú mi patapata, gbogbo ara sì wó mi; mò ń kérora nítorí ẹ̀dùn ọkàn mi.

⁹OLUWA, gbogbo ìfẹ́ ọkàn mi ni o mọ̀, ìmí ẹ̀dùn mi kò sì pamọ́ fún ọ.

¹⁰Àyà mi ń lù pì pì pì, ó rẹ̀ mí láti inú wá; ojú mi sì ti di bàìbàì.

¹¹Àwọn ọ̀rẹ́ ati àwọn ẹlẹgbẹ́ mi takété sí mi nítorí àrùn mi, àwọn ẹbí mi sì dúró lókèèrè réré.

¹²Àwọn tó fẹ́ gba ẹ̀mí mi dẹ tàkúté sílẹ̀ dè mí, àwọn tí ń wá ìpalára mi ń sọ̀rọ̀ ìparun mi, wọ́n sì ń pète àrékérekè tọ̀sán-tòru.

¹³Ṣugbọn mo ṣe bí adití, n kò gbọ́, mo dàbí odi tí kò le sọ̀rọ̀.

¹⁴Àní, mo dàbí ẹni tí kò gbọ́rọ̀, tí kò sì ní àwíjàre kan lẹ́nu.

¹⁵Ṣugbọn, OLUWA, ìwọ ni mò ń dúró dè; OLUWA, Ọlọrun mi, ìwọ ni o óo dá mi lóhùn.

¹⁶Nítorí tí mò ń gbadura pé, kí àwọn tí ń pẹ̀gàn mi má yọ̀ mí nígbà tí ẹsẹ̀ mi bá yẹ̀.

¹⁷Nítorí pé mo ti fẹ́rẹ̀ ṣubú, mo sì wà ninu ìrora nígbà gbogbo.

¹⁸Mo jẹ́wọ́ àṣìṣe mi, mo sì káàánú fún ẹ̀ṣẹ̀ mi.

¹⁹Àwọn tí ń bá mi ṣọ̀tá láìnídìí lágbára, àwọn tí ó kórìíra mi láìtọ́ sì pọ̀.

²⁰Àwọn tí ń fi ibi san oore fún mi ní ń gbógun tì mí, nítorí pé rere ni mò ń ṣe.

²¹OLUWA, má kọ̀ mí sílẹ̀, Ọlọrun mi, má jìnnà sí mi.

²²Yára wá ràn mí lọ́wọ́, OLUWA, ìgbàlà mi.