Read yoruba Orin Dafidi 48 Bible Online

Orin Dafidi 48 - yoruba bible

Orin Dafidi 48

¹OLUWA tóbi, ó sì yẹ kí á máa yìn ín lọpọlọpọ ní ìlú Ọlọrun wa.

²Òkè mímọ́ rẹ̀, tí ó ga, tí ó sì lẹ́wà, ni ayọ̀ gbogbo ayé. Òkè Sioni, ní àríwá, lọ́nà jíjìn réré, ìlú ọba ńlá.

³Ninu ilé ìṣọ́ ìlú náà, Ọlọrun ti fi ara rẹ̀ hàn bí ibi ìsádi.

⁴Wò ó! Àwọn ọba kó ara wọn jọ; wọ́n jùmọ̀ gbógun tì í.

⁵Nígbà tí wọ́n fojú kàn án, ẹnu yà wọ́n, ìpayà mú wọn, wọ́n sì sá;

⁶ìwárìrì mú wọn níbẹ̀; ìrora sì bá wọn bí obinrin tí ń rọbí.

⁷Ó fọ́ wọn bí afẹ́fẹ́ ìlà oòrùn tií fọ́ ọkọ̀ Taṣiṣi.

⁸Bí a ti gbọ́, bẹ́ẹ̀ gan-an ni ó rí, ní ìlú OLUWA àwọn ọmọ ogun, ní ìlú Ọlọrun wa: Ọlọrun fi ìdí rẹ̀ múlẹ̀ títí lae.

⁹Ninu tẹmpili rẹ, Ọlọrun, à ń ṣe àṣàrò lórí ìfẹ́ rẹ tí kì í yẹ̀.

¹⁰Ọlọrun, ìyìn rẹ tàn ká, bí orúkọ rẹ ṣe tàn dé òpin ayé, iṣẹ́ rere kún ọwọ́ rẹ.

¹¹Jẹ́ kí inú òkè Sioni kí ó dùn, kí gbogbo Juda sì máa yọ̀ nítorí ìdájọ́ rẹ.

¹²Ẹ rìn yí Sioni po; ẹ yí i ká; ẹ ka àwọn ilé ìṣọ́ rẹ̀;

¹³ẹ ṣàkíyèsí odi rẹ̀; ẹ wọ inú gbogbo ilé ìṣọ́ rẹ̀ lọ, kí ẹ lè ròyìn fún ìran tí ń bọ̀

¹⁴pe: “Ọlọrun yìí ni Ọlọrun wa, lae ati laelae. Òun ni yóo máa ṣe amọ̀nà wa títí lae.”