Read yoruba Orin Dafidi 64 Bible Online

Orin Dafidi 64 - yoruba bible

Orin Dafidi 64

¹Ọlọrun, gbọ́ ìráhùn mi; pa mí mọ́ lọ́wọ́ ìdẹ́rùbà ọ̀tá;

²dáàbò bò mí lọ́wọ́ ọ̀tẹ̀ àwọn eniyan burúkú; kó mi yọ lọ́wọ́ ète àwọn aṣebi.

³Wọ́n pọ́n ahọ́n wọn bí idà, wọ́n ń sọ̀kò ọ̀rọ̀ burúkú bí ẹni ta ọfà;

⁴wọ́n ń sọ̀kò ọ̀rọ̀ sí aláìṣẹ̀ láti ibùba wọn, láìbẹ̀rù, wọ́n ń ta ọfà ọ̀rọ̀ sí i lójijì.

⁵Wọ́n wonkoko mọ́ ète burúkú wọn; wọ́n ń gbìmọ̀ àtidẹ okùn sílẹ̀ níkọ̀kọ̀, wọ́n ń rò lọ́kàn wọn pé, “Ta ni yóo rí wa?

⁶Ta ni yóo wá ẹ̀ṣẹ̀ wa rí? Ọgbọ́n àlùmọ̀kọ́rọ́yí ni a ti fi pète.” Áà, inú ọmọ eniyan jìn!

⁷Ṣugbọn Ọlọrun yóo ta wọ́n lọ́fà; wọn óo fara gbọgbẹ́ lójijì.

⁸Yóo pa wọ́n run nítorí ohun tí wọ́n fi ẹnu wọn sọ; gbogbo ẹni tí ó bá rí wọn ni yóo máa mirí nítorí wọn.

⁹Ẹ̀rù yóo sì ba gbogbo eniyan; wọn yóo máa sọ ohun tí Ọlọrun ti gbé ṣe, wọn yóo sì máa ronú nípa iṣẹ́ rẹ̀.

¹⁰Kí àwọn olódodo máa yọ̀ ninu OLUWA, kí wọ́n sì máa wá ààbò lọ́dọ̀ rẹ̀! Kí gbogbo ẹni pípé máa ṣògo.