Read yoruba Orin Dafidi 68 Bible Online

Orin Dafidi 68 - yoruba bible

Orin Dafidi 68

¹Kí Ọlọrun dìde, kí àwọn ọ̀tá rẹ tú ká. Kí àwọn tí ó kórìíra rẹ̀ sá níwájú rẹ̀.

²Bí èéfín tií pòórá, bẹ́ẹ̀ ni kí wọn parẹ́; bí ìda tií yọ́ níwájú iná, bẹ́ẹ̀ ni kí àwọn eniyan burúkú parun níwájú Ọlọrun.

³Ṣugbọn kí inú àwọn olódodo máa dùn, kí wọn máa yọ̀ níwájú Ọlọrun; kí wọn máa yọ̀ ṣẹ̀ṣẹ̀.

⁴Ẹ kọrin sí Ọlọrun, ẹ kọ orin ìyìn sí orúkọ rẹ̀, ẹ pòkìkí ẹni tí ń gun ìkùukùu lẹ́ṣin. OLUWA ni orúkọ rẹ̀; ẹ máa yọ̀ níwájú rẹ̀.

⁵Baba àwọn aláìníbaba ati olùgbèjà àwọn opó ni Ọlọrun, ní ibùgbé rẹ̀ mímọ́.

⁶Ọlọrun, olùpèsè ibùjókòó fún àlejò tí ó nìkan wà; ẹni tí ó kó àwọn ẹlẹ́wọ̀n jáde sinu ìdẹ̀ra, ṣugbọn ó sì fi àwọn ọlọ̀tẹ̀ sílẹ̀ ninu ilẹ̀ gbígbẹ.

⁷Ọlọrun, nígbà tí ò ń jáde lọ níwájú àwọn eniyan rẹ, nígbà tí ò ń yan la aṣálẹ̀ já,

⁸ilẹ̀ mì tìtì, ọ̀run pàápàá rọ òjò, níwájú Ọlọrun, Ọlọrun Sinai, àní, níwájú Ọlọrun Israẹli.

⁹Ọlọrun, ọpọlọpọ ni òjò tí o rọ̀ sílẹ̀; o sì mú ilẹ̀ ìní rẹ tí ó ti gbẹ pada bọ̀ sípò.

¹⁰Àwọn eniyan rẹ rí ibùgbé lórí rẹ̀; Ọlọrun, ninu oore ọwọ́ rẹ, o pèsè fún àwọn aláìní.

¹¹OLUWA fọhùn, ogunlọ́gọ̀ sì ni àwọn tí ó kéde ọ̀rọ̀ rẹ̀.

¹²Gbogbo àwọn ọba ni ó sá tàwọn tọmọ ogun wọn; àwọn obinrin tí ó wà nílé,

¹³ati àwọn tí ó wà ní ibùjẹ ẹran rí ìkógun pín: fadaka ni wọ́n yọ́ bo apá ère àdàbà; wúrà dídán sì ni wọ́n yọ́ bo ìyẹ́ rẹ̀.

¹⁴Nígbà tí Olodumare tú àwọn ọba ká, ní òkè Salimoni, yìnyín bọ́.

¹⁵Áà! Òkè Baṣani, òkè ńlá; Áà! Òkè Baṣani, òkè olórí pupọ.

¹⁶Ẹ̀yin òkè olórí pupọ, kí ló dé tí ẹ̀ ń fi ìlara wo òkè tí Ọlọrun fẹ́ràn láti máa gbé, ibi tí OLUWA yóo máa gbé títí lae?

¹⁷OLUWA sọ̀kalẹ̀ láti òkè Sinai sí ibi mímọ́ rẹ̀ pẹlu ẹgbẹẹgbẹrun lọ́nà ẹgbẹrun kẹ̀kẹ́ ogun, ẹgbẹẹgbẹrun lọ́nà ẹgbẹrun.

¹⁸Ó gun òkè gíga, ó kó àwọn eniyan nígbèkùn; ó gba ẹ̀bùn lọ́wọ́ àwọn eniyan, ati lọ́wọ́ àwọn ọlọ̀tẹ̀ pàápàá. OLUWA Ọlọrun yóo máa gbébẹ̀.

¹⁹Ìyìn ni fún OLUWA, Ọlọrun ìgbàlà wa, tí ń bá wa gbé ẹrù wa lojoojumọ.

²⁰Ọlọrun tí ń gbani là ni Ọlọrun wa; OLUWA Ọlọrun ni ń yọni lọ́wọ́ ikú.

²¹Dájúdájú, OLUWA yóo fọ́ orí àwọn ọ̀tá rẹ̀; yóo fọ́ àtàrí àwọn tí ń dẹ́ṣẹ̀.

²²OLUWA ní, “N óo kó wọn pada láti Baṣani, n óo kó wọn pada láti inú ibú omi òkun,

²³kí ẹ lè fi ẹsẹ̀ wọ́ àgbàrá ẹ̀jẹ̀ àwọn ọ̀tá yín, kí àwọn ajá yín lè lá ẹ̀jẹ̀ wọn bí ó ti wù wọ́n.”

²⁴A ti rí ọ, Ọlọrun, bí o tí ń yan lọ, pẹlu ọ̀wọ́ èrò tí ń tẹ̀lé ọ lẹ́yìn. Ẹ wo Ọlọrun mi, ọba mi, bí ó ti ń yan wọ ibi mímọ́ rẹ̀,

²⁵àwọn akọrin níwájú, àwọn onílù lẹ́yìn, àwọn ọmọbinrin tí ń lu samba láàrin.

²⁶“Ẹ fi ọpẹ́ fún Ọlọrun ninu àwùjọ eniyan, ẹ̀yin ìran Israẹli, ẹ fi ọpẹ́ fún OLUWA.”

²⁷Ẹ wo Bẹnjamini tí ó kéré jù níwájú, ẹ wo ogunlọ́gọ̀ àwọn ìjòyè Juda, ẹ wo àwọn ìjòyè Sebuluni ati ti Nafutali.

²⁸Fi agbára rẹ hàn, Ọlọrun, fi agbára tí o ti fi jà fún wa hàn.

²⁹Nítorí Tẹmpili rẹ tí ó wà ní Jerusalẹmu, àwọn ọba yóo gbé ẹ̀bùn wá fún ọ.

³⁰Bá àwọn ẹranko ẹ̀dá tí ń gbé inú èèsún ní Ijipti wí; àwọn akọ mààlúù, láàrin agbo ẹran àwọn orílẹ̀-èdè. Tẹ àwọn tí ó fẹ́ràn owó mọ́lẹ̀; fọ́n àwọn orílẹ̀-èdè tí ó fẹ́ràn ogun ká.

³¹Jẹ́ kí àwọn ikọ̀ wá láti Ijipti, kí àwọn ará Kuṣi tẹ́wọ́ adura sí Ọlọrun.

³²Ẹ kọ orin sí Ọlọrun ẹ̀yin ìjọba ayé; ẹ kọ orin ìyìn sí OLUWA.

³³Ẹni tí ń gun awọsanma lẹ́ṣin, àní awọsanma àtayébáyé; ẹ gbọ́ bí ó ṣe ń sán ààrá, ẹ gbọ́ ohùn alágbára.

³⁴Ẹ bu ọlá fún Ọlọrun, ẹni tí ògo rẹ̀ wà lórí Israẹli; tí agbára rẹ̀ sì hàn lójú ọ̀run.

³⁵Ẹ̀rù jẹ̀jẹ̀ ni Ọlọrun ní ibi mímọ́ rẹ̀, Ọlọrun Israẹli; òun ni ó ń fún àwọn eniyan rẹ̀ ní ọlá ati agbára. Ìyìn ni fún Ọlọrun!