Read yoruba Orin Dafidi 69 Bible Online

Orin Dafidi 69 - yoruba bible

Orin Dafidi 69

¹Gbà mí, Ọlọrun, nítorí omi ti mù mí dé ọrùn.

²Mo ti rì sinu irà jíjìn, níbi tí kò ti sí ohun ìfẹsẹ̀tẹ̀; mo ti bọ́ sinu ibú, omi sì ti bò mí mọ́lẹ̀.

³Mo sọkún títí àárẹ̀ mú mi, ọ̀nà ọ̀fun mi gbẹ, ojú mi sì di bàìbàì, níbi tí mo ti dúró, tí mò ń wo ojú ìwọ Ọlọrun mi.

⁴Àwọn tí ó kórìíra mi láìnídìí pọ̀, wọ́n pọ̀ ju irun orí mi lọ. Àwọn tí ó fẹ́ pa mí run lágbára. Àwọn ọ̀tá mi ń parọ́ mọ́ mi, àwọn nǹkan tí n kò jí ni wọ́n ní kí n fi dandan dá pada.

⁵Ọlọrun, o mọ ìwà òmùgọ̀ mi, àwọn àṣìṣe mi kò sì fara pamọ́ fún ọ.

⁶Má tìtorí tèmi dójúti àwọn tí ó gbẹ́kẹ̀lé ọ, OLUWA Ọlọrun àwọn ọmọ ogun, má sì tìtorí mi sọ àwọn tí ń wá ọ di ẹni àbùkù, Ọlọrun Israẹli.

⁷Nítorí tìrẹ ni mo ṣe di ẹni ẹ̀gàn, tí ìtìjú sì bò mí.

⁸Mo ti di àlejò lọ́dọ̀ àwọn arakunrin mi, mo sì di àjèjì lọ́dọ̀ àwọn ọmọ ìyá mi.

⁹Nítorí pé ìtara ilé rẹ ni ó jẹ mí lógún, ìwọ̀sí àwọn tí ó ń pẹ̀gàn rẹ sì bò mí mọ́lẹ̀.

¹⁰Nígbà tí mo fi omijé gbààwẹ̀, ó di ẹ̀gàn fún mi.

¹¹Nígbà tí mò ń wọ aṣọ ọ̀fọ̀, mo di ẹni àmúpòwe.

¹²Èmi ni àwọn tí ń jókòó lẹ́nu ibodè fi ń ṣe ọ̀rọ̀ sọ; àwọn ọ̀mùtí sì ń fi mí ṣe orin kọ.

¹³Ṣugbọn ní tèmi, OLUWA, ìwọ ni mò ń gbadura sí ní àkókò tí ó bá yẹ, Ọlọrun, ninu ọ̀pọ̀ ìfẹ́ rẹ tí kì í yẹ̀, ninu agbára ìgbàlà rẹ, Ọlọrun dá mi lóhùn.

¹⁴Yọ mí ninu irà yìí, má jẹ́ kí n rì, gbà mí kúrò lọ́wọ́ àwọn ọ̀tá mi.

¹⁵Má jẹ́ kí ìgbì omi bò mí mọ́lẹ̀, kí ibú omi má gbé mi mì, kí isà òkú má sì padé mọ́ mi.

¹⁶Dá mi lóhùn, OLUWA, nítorí ìfẹ́ rẹ tí kì í yẹ̀ dára; fojú rere wò mí, gẹ́gẹ́ bí ọpọlọpọ àánú rẹ.

¹⁷Má ṣe fi ojú pamọ́ fún èmi, iranṣẹ rẹ, nítorí tí mo wà ninu ìdààmú, yára dá mi lóhùn.

¹⁸Sún mọ́ mi, rà mí pada, kí o sì tú mi sílẹ̀ nítorí àwọn ọ̀tá mi!

¹⁹O mọ ẹ̀gàn mi, o mọ ìtìjú ati àbùkù mi; o sì mọ gbogbo àwọn ọ̀tá mi.

²⁰Ẹ̀gàn ti mú kí inú mi bàjẹ́, tóbẹ́ẹ̀ tí ọkàn mi rẹ̀wẹ̀sì mò ń retí àánú ṣugbọn kò sí; mò ń retí olùtùnú, ṣugbọn n kò rí ẹnìkan.

²¹Iwọ ni wọ́n sọ di oúnjẹ fún mi, nígbà tí òùngbẹ sì ń gbẹ mí, ọtí kíkan ni wọ́n fún mi mu.

²²Jẹ́ kí tabili oúnjẹ tí wọ́n tẹ́ fún ara wọn di ẹ̀bìtì fún wọn; kí àsè ẹbọ wọn sì di tàkúté.

²³Jẹ́ kí ojú wọn ṣú, kí wọn má lè ríran; kí gbogbo ara wọn sì máa gbọ̀n rìrì.

²⁴Rọ òjò ibinu rẹ lé wọn lórí, kí o sì jẹ́ kí wọ́n rí gbígbóná ibinu rẹ.

²⁵Kí ibùdó wọn ó di ahoro, kí ẹnikẹ́ni má sì gbé inú àgọ́ wọn.

²⁶Nítorí ẹni tí o ti kọlù ni wọ́n tún gbógun tì; ẹni tí o ti ṣá lọ́gbẹ́ ni wọ́n sì tún ń pọ́n lójú.

²⁷Fi ẹ̀sùn kún ẹ̀sùn wọn; má sì jẹ́ kí wọ́n rí ìdáláre lọ́dọ̀ rẹ.

²⁸Pa orúkọ wọn rẹ́ kúrò ninu ìwé ìyè; kí á má sì kọ orúkọ wọn mọ́ ti àwọn olódodo.

²⁹Ojú ń pọ́n mi, mo sì ń jẹ̀rora; Ọlọrun, jẹ́ kí ìgbàlà rẹ gbé mi lékè!

³⁰Èmi ó fi orin yin orúkọ Ọlọrun; n óo fi ọpẹ́ gbé e ga.

³¹Èyí yóo tẹ́ Ọlọrun lọ́rùn ju akọ mààlúù lọ, àní, akọ mààlúù tòun tìwo ati pátákò rẹ̀.

³²Àwọn onírẹ̀lẹ̀ yóo rí i, inú wọn yóo dùn; ẹ̀yin tí ẹ̀ ń wá Ọlọrun, ẹ jẹ́ kí ọkàn yín sọjí.

³³Nítorí OLUWA a máa gbọ́ ti àwọn aláìní, kì í sìí kẹ́gàn àwọn eniyan rẹ̀ tí ó wà ní ìgbèkùn.

³⁴Jẹ́ kí ọ̀run ati ayé kí ó yìn ín, òkun ati gbogbo ohun tí ó ń rìn káàkiri ninu wọn.

³⁵Nítorí Ọlọrun yóo gba Sioni là; yóo sì tún àwọn ìlú Juda kọ́; àwọn iranṣẹ rẹ̀ yóo máa gbé inú rẹ̀, yóo sì di tiwọn.

³⁶Àwọn ọmọ àwọn iranṣẹ rẹ̀ yóo jogún rẹ̀; àwọn tí ó fẹ́ràn orúkọ rẹ̀ yóo sì máa gbé inú rẹ̀.