Read yoruba Orin Dafidi 76 Bible Online

Orin Dafidi 76 - yoruba bible

Orin Dafidi 76

¹Àwọn ará Juda mọ Ọlọrun, orúkọ rẹ̀ sì lọ́wọ̀ ní Israẹli.

²Ilé rẹ̀ wà ní Salẹmu, ibùgbé rẹ̀ wà ní Sioni.

³Níbẹ̀ ni ó ti ṣẹ́ ọfà ọ̀tá tí ń rọ̀jò, ati apata, ati idà, ati àwọn ohun ìjà ogun.

⁴Ológo ni ọ́, ọlá rẹ sì pọ̀, ó ju ti àwọn òkè tí ó kún fún ẹran lọ.

⁵A gba ìkógun lọ́wọ́ àwọn akikanju, wọ́n sun oorun àsùn-ùn-jí; àwọn alágbára kò sì le gbé ọwọ́ láti jà.

⁶Nípa ìbáwí rẹ, Ọlọrun Jakọbu, ati ẹṣin, ati ẹni tó gun ẹṣin, gbogbo wọn ló ṣubú lulẹ̀, tí wọn kò sì lè mira.

⁷Ṣugbọn ẹ̀rù jẹ̀jẹ̀ ni ọ́! Ta ló tó dúró níwájú rẹ tí ibinu rẹ bá dé?

⁸Láti ọ̀run wá ni o ti ń ṣe ìdájọ́, ẹ̀rù ba ayé, ayé sì dúró jẹ́ẹ́;

⁹nígbà tí Ọlọrun dìde láti gbé ìdájọ́ kalẹ̀, láti gba gbogbo àwọn tí à ń nilára láyé sílẹ̀.

¹⁰Dájúdájú ibinu eniyan yóo pada di ìyìn fún ọ; àwọn tí wọ́n bá sì bọ́ lọ́wọ́ ibinu rẹ yóo ṣe àjọ̀dún rẹ.

¹¹Jẹ́ ẹ̀jẹ́ fún OLUWA Ọlọrun rẹ, kí o sì mú un ṣẹ, kí gbogbo àwọn tí ó yí i ká mú ẹ̀bùn wá fún ẹni tí ó yẹ kí á bẹ̀rù.

¹²Ẹni tí ń gba ẹ̀mí àwọn ìjòyè, tí ó ń ṣe ẹ̀rù ba àwọn ọba ayé.