Read yoruba Orin Dafidi 77 Bible Online

Orin Dafidi 77 - yoruba bible

Orin Dafidi 77

¹Mo ké pe Ọlọrun fún ìrànlọ́wọ́, mo kígbe pe Ọlọrun kí ó lè gbọ́ tèmi.

²Ní ọjọ́ ìpọ́njú mi, mo wá OLUWA; ní òru, mo tẹ́wọ́ adura láìkáàárẹ̀, ṣugbọn n kò rí ìtùnú.

³Mo ronú nípa Ọlọrun títí, mò ń kérora; mo ṣe àṣàrò títí, ọkàn mi rẹ̀wẹ̀sì.

⁴OLUWA, o ò jẹ́ kí n dijú wò ní gbogbo òru mo dààmú tóbẹ́ẹ̀ tí n kò le sọ̀rọ̀.

⁵Mo ranti ìgbà àtijọ́, mo ranti ọ̀pọ̀ ọdún sẹ́yìn.

⁶Mo ronú jinlẹ̀ lóru, mo ṣe àṣàrò, mo yẹ ọkàn mi wò.

⁷Ṣé Ọlọrun yóo kọ̀ wá sílẹ̀ títí lae ni; àbí inú rẹ̀ kò tún ní dùn sí wa mọ́?

⁸Ṣé ìfẹ́ rẹ̀ tí kì í yẹ̀ ti pin títí lae ni; àbí ìlérí rẹ̀ ti dópin patapata?

⁹Ṣé Ọlọrun ti gbàgbé láti máa ṣoore ni; àbí ó ti fi ibinu pa ojú àánú rẹ̀ dé?

¹⁰Nígbà náà ni mo wí pé, “Ohun tí ó bà mí lọ́kàn jẹ́ ni pé Ọ̀gá Ògo kò jẹ́wọ́ agbára mọ́.”

¹¹N óo ranti àwọn iṣẹ́ OLUWA, àní, n óo ranti àwọn iṣẹ́ ìyanu ìgbàanì.

¹²N óo máa ṣe àṣàrò lórí gbogbo iṣẹ́ rẹ; n óo sì máa ronú lórí àwọn iṣẹ́ ribiribi tí o ṣe.

¹³Ọlọrun, mímọ́ ni ọ̀nà rẹ; oriṣa wo ni ó tó Ọlọrun wa?

¹⁴Ìwọ ni Ọlọrun tí ń ṣe ohun ìyanu; o ti fi agbára rẹ hàn láàrin àwọn eniyan.

¹⁵O ti fi agbára rẹ gba àwọn eniyan rẹ là; àní, àwọn ọmọ Jakọbu ati Josẹfu.

¹⁶Nígbà tí omi òkun rí ọ, Ọlọrun, àní, nígbà tí omi òkun fi ojú kàn ọ́, ẹ̀rù bà á; ibú omi sì wárìrì.

¹⁷Ìkùukùu da omi òjò sílẹ̀, ojú ọ̀run sán ààrá; mànàmáná ń kọ yẹ̀rì káàkiri.

¹⁸Ààrá ń sán kíkankíkan ní ojú ọ̀run, mànàmáná ń kọ yànràn, gbogbo ayé sì mọ́lẹ̀; ilẹ̀ ayé wárìrì, ó sì mì tìtì.

¹⁹Ọ̀nà rẹ wà lójú omi òkun, ipa ọ̀nà rẹ la omi òkun ńlá já; sibẹ ẹnìkan kò rí ipa ẹsẹ̀ rẹ.

²⁰O kó àwọn eniyan rẹ jáde bí agbo ẹran, o fi Mose ati Aaroni ṣe olórí wọn.