Read yoruba Orin Dafidi 81 Bible Online

Orin Dafidi 81 - yoruba bible

Orin Dafidi 81

¹Ẹ kọ orin sókè sí Ọlọrun, agbára wa; ẹ hó ìhó ayọ̀ sí Ọlọrun Jakọbu.

²Ẹ dárin, ẹ lu samba, ẹ ta hapu dídùn ati lire.

³Ẹ fọn fèrè ní ọjọ́ oṣù titun, ati ní ọjọ́ oṣù tí a yà sọ́tọ̀, ati ní ọjọ́ àsè.

⁴Nítorí pé àṣẹ ni, fún àwọn ọmọ Israẹli, ìlànà sì ni, láti ọ̀dọ̀ Ọlọrun Jakọbu.

⁵Ó pa á láṣẹ fún àwọn ọmọ Josẹfu, nígbà tí ó kọlu ilẹ̀ Ijipti. Mo gbọ́ ohùn kan tí n kò gbọ́ rí: tí ó wí pé,

⁶“Mo ti sọ àjàgà náà kalẹ̀ lọ́rùn rẹ; mo ti gba agbọ̀n ẹrù kúrò lọ́wọ́ rẹ.

⁷Ninu ìnira, o ké pè mí, mo sì gbà ọ́; mo dá ọ lóhùn ninu ìjì ààrá, níbi tí mo fara pamọ́ sí; mo sì dán ọ wò ninu omi odò Meriba.

⁸Ẹ gbọ́, ẹ̀yin eniyan mi, nígbà tí mo bá ń kìlọ̀ fun yín, àní kí ẹ fetí sílẹ̀ sí mi, ẹ̀yin ọmọ Israẹli!

⁹Kò gbọdọ̀ sí ọlọrun àjèjì kan kan láàrin yín; ẹ kò gbọdọ̀ foríbalẹ̀ fún oriṣa-koriṣa kan.

¹⁰Èmi ni OLUWA Ọlọrun yín, tí ó mu yín jáde láti ilẹ̀ Ijipti. Ẹ ya ẹnu yín dáradára, n óo sì bọ yín ní àbọ́yó.

¹¹“Ṣugbọn àwọn eniyan mi kò gbọ́ràn sí mi lẹ́nu, Israẹli kò sì gba tèmi.

¹²Nítorí náà mo fi wọ́n sílẹ̀ sinu agídí ọkàn wọn, kí wọn máa ṣe ohun tó wù wọ́n.

¹³Àwọn eniyan mi ìbá jẹ́ gbọ́ tèmi, àní Israẹli ìbá jẹ́ máa rìn ní ọ̀nà mi!

¹⁴Kíákíá ni èmi ìbá kọjú ìjà sí àwọn ọ̀tá wọn, tí ǹ bá sì ṣẹgun wọn.

¹⁵Àwọn tí ó kórìíra OLUWA yóo fi ìbẹ̀rùbojo tẹríba fún un, ìyà óo sì jẹ wọ́n títí lae.

¹⁶Ṣugbọn èmi ó máa fi ọkà tí ó dára jùlọ bọ yín, n óo sì fi oyin inú àpáta tẹ yín lọ́rùn.”