Read yoruba Orin Dafidi 88 Bible Online

Orin Dafidi 88 - yoruba bible

Orin Dafidi 88

¹OLUWA, Ọlọrun, Olùgbàlà mi, mo ké pè ọ́ fún ìrànlọ́wọ́ ní ọ̀sán; mo ké níwájú rẹ ní òru.

²Jẹ́ kí adura mi dé ọ̀dọ̀ rẹ; tẹ́tí sí igbe mi.

³Nítorí pé ọkàn mi kún fún ìyọnu; mo sì súnmọ́ isà òkú.

⁴Mo dàbí àwọn tí ó ń wọ ibojì lọ; mo dà bí ẹni tí kò lágbára mọ.

⁵N kò yàtọ̀ sí ẹni tí a pa tì sí apá kan láàrin àwọn òkú, mo dàbí ẹni tí a pa, tí ó sùn ninu ibojì, bí àwọn tí ìwọ kò ranti mọ́, nítorí pé wọ́n ti kúrò lábẹ́ ìtọ́jú rẹ.

⁶O ti fi mí sinu isà òkú tí ó jìn pupọ, ninu òkùnkùn, àní ninu ọ̀gbun.

⁷Ọwọ́ ibinu rẹ wúwo lára mi, ìgbì ìrúnú rẹ sì bò mí mọ́lẹ̀.

⁸O ti mú kí àwọn ọ̀rẹ́ kòríkòsùn mi fi mí sílẹ̀; mo sì ti di ẹni ìríra lọ́dọ̀ wọn: mo wà ninu àhámọ́, n kò sì lè jáde;

⁹ojú mi ti di bàìbàì nítorí ìbànújẹ́. Lojoojumọ ni mò ń ké pè ọ́, OLUWA; tí mò ń tẹ́wọ́ adura sí ọ.

¹⁰Ṣé òkú ni o óo ṣe iṣẹ́ ìyanu hàn? Ṣé àwọn òkú lè dìde kí wọ́n máa yìn ọ́?

¹¹Ṣé a lè sọ̀rọ̀ ìfẹ́ rẹ tí kì í yẹ̀ ninu ibojì? Àbí ẹnìkan lè sọ̀rọ̀ òtítọ́ rẹ ninu ìparun?

¹²Ṣé a lè rí iṣẹ́ ìyanu rẹ ninu òkùnkùn ikú? Àbí ìrànlọ́wọ́ ìgbàlà rẹ wà ní ilẹ̀ àwọn tí a ti gbàgbé?

¹³Ṣugbọn OLUWA, èmi ń ké pè ọ́; ní òwúrọ̀ n óo gbadura sí ọ.

¹⁴OLUWA, kí ló dé tí o fi ta mí nù? Kí ló dé tí o fi ojú pamọ́ fún mi?

¹⁵Láti ìgbà èwe mi ni a tí ń jẹ mí níyà, tí mo sì fẹ́rẹ̀ kú, mo ti rí ìjẹníyà rẹ tí ó bani lẹ́rù; agara sì ti dá mi.

¹⁶Ìrúnú rẹ bò mí mọ́lẹ̀; ẹ̀rù rẹ sì bà mí dójú ikú.

¹⁷Wọ́n yí mi ká tọ̀sán-tòru bí ìṣàn omi ńlá; wọ́n ká mi mọ́ patapata.

¹⁸O ti mú kí ọ̀rẹ́ kòríkòsùn mi ati àwọn alábàárìn mi kọ̀ mí sílẹ̀; òkùnkùn nìkan ni ó yí mi ká níbi gbogbo.