Read yoruba Orin Dafidi 89 Bible Online

Orin Dafidi 89 - yoruba bible

Orin Dafidi 89

¹OLUWA, n óo máa kọrin ìfẹ́ rẹ tí kì í yẹ̀ títí lae; n óo máa fi ẹnu mi kéde òtítọ́ rẹ láti ìran dé ìran.

²Nítorí pé, a ti fi ìdí ìfẹ́ rẹ tí kì í yẹ̀ múlẹ̀ títí lae; o sì ti fi ìdí òtítọ́ rẹ múlẹ̀ bí ojú ọ̀run.

³O sọ pé, “Mo ti dá majẹmu kan pẹlu ẹni tí mo yàn, mo ti búra fún Dafidi, iranṣẹ mi, pé,

⁴‘N óo fi ìdí àwọn ọmọ rẹ múlẹ̀ títí lae, n óo sì gbé ìtẹ́ rẹ ró láti ìran dé ìran.’ ”

⁵Jẹ́ kí ojú ọ̀run máa kọrin ìyìn iṣẹ́ ìyanu rẹ, OLÚWA; kí àwọn eniyan mímọ́ sì máa kọrin ìyìn òtítọ́ rẹ.

⁶Nítorí ta ni a lè fi wé ọ ní ọ̀run, OLUWA? Ta ni ó dàbí OLUWA láàrin àwọn ẹ̀dá ọ̀run?

⁷Ọlọrun, ìwọ ni a bẹ̀rù ninu ìgbìmọ̀ àwọn eniyan mímọ́, o tóbi, o sì lẹ́rù ju gbogbo àwọn tí ó yí ọ ká lọ?

⁸OLUWA, Ọlọrun àwọn ọmọ ogun, ta ló lágbára bíi rẹ? OLUWA, òtítọ́ rẹ yí ọ ká.

⁹Ò ń jọba lórí òkun tí ń ru; nígbà tí ìgbì rẹ̀ bá ru sókè, ìwọ ni ò ń mú kí ó rọlẹ̀.

¹⁰Ìwọ ni o wó Rahabu mọ́lẹ̀ bí òkú ẹran; o fi ọwọ́ agbára rẹ fọ́n àwọn ọ̀tá rẹ ká.

¹¹Tìrẹ ni ọ̀run, tìrẹ sì ni ayé pẹlu; ìwọ ni o tẹ ayé ati gbogbo ohun tí ó wà ninu rẹ̀ dó.

¹²Ìwọ ni o dá àríwá ati gúsù, òkè Tabori ati òkè Herimoni ń fi ayọ̀ yin orúkọ rẹ.

¹³Alágbára ni ọ́; agbára ń bẹ ní ọwọ́ rẹ; o gbé ọwọ́ agbára rẹ sókè.

¹⁴Òdodo ati ẹ̀tọ́ ni ìpìlẹ̀ ìtẹ́ rẹ; ìfẹ́ tí kì í yẹ̀ ati òtítọ́ ń lọ ṣiwaju rẹ.

¹⁵Ayọ̀ ń bẹ fún àwọn tí ó mọ ìhó ayọ̀ nnì, àwọn tí ń rìn ninu ìmọ́lẹ̀ ojurere rẹ, OLUWA,

¹⁶àwọn tí ń yọ̀ nítorí orúkọ rẹ tọ̀sán-tòru, tí sì ń gbé òdodo rẹ lárugẹ.

¹⁷Nítorí ìwọ ni ògo ati agbára wọn; nípa ojurere rẹ sì ni a ti ní ìṣẹ́gun.

¹⁸Dájúdájú, OLUWA, tìrẹ ni ààbò wa; ìwọ, Ẹni Mímọ́ Israẹli ni ọba wa.

¹⁹Ní ìgbàanì, o sọ ninu ìran fún olùfọkànsìn rẹ pé, “Mo ti fi adé dé alágbára kan lórí, mo ti gbé ẹnìkan ga tí a yàn láàrin àwọn eniyan.

²⁰Mo ti rí Dafidi, iranṣẹ mi; mo ti fi òróró mímọ́ mi yàn án;

²¹kí ọwọ́ agbára mi lè máa gbé e ró títí lae, kí ọwọ́ mi sì máa fún un ní okun.

²²Ọ̀tá kan kò ní lè borí rẹ̀, bẹ́ẹ̀ ni àwọn eniyan burúkú kò ní tẹ orí rẹ̀ ba.

²³N óo run ọ̀tá rẹ̀ níwájú rẹ̀; n óo sì bá àwọn tí ó kórìíra rẹ̀ kanlẹ̀.

²⁴Òtítọ́ mi ati ìfẹ́ mi tí kì í yẹ̀ yóo wà pẹlu rẹ̀; orúkọ mi ni yóo sì máa fi ṣẹgun.

²⁵N óo mú ìjọba rẹ̀ gbòòrò dé òkun; agbára rẹ̀ yóo sì tàn dé odò Yufurate

²⁶Yóo ké pè mí pé, ‘Ìwọ ni Baba mi, Ọlọrun mi, ati Àpáta ìgbàlà mi.’

²⁷N óo fi ṣe àkọ́bí, àní, ọba tí ó tóbi ju gbogbo ọba ayé lọ.

²⁸N óo máa fi ìfẹ́ mi tí kì í yẹ̀ hàn án títí lae; majẹmu èmi pẹlu rẹ̀ yóo sì dúró ṣinṣin.

²⁹Arọmọdọmọ rẹ̀ ni yóo máa jọba títí lae; ìtẹ́ rẹ̀ yóo sì máa bẹ níwọ̀n ìgbà tí ojú ọ̀run bá ń bẹ.

³⁰“Bí àwọn ọmọ rẹ̀ bá kọ òfin mi sílẹ̀, tí wọn kò sì tẹ̀lé ìlànà mi,

³¹bí wọ́n bá tàpá sí àṣẹ mi, tí wọn kò sì pa òfin mi mọ́;

³²n óo nà wọ́n lẹ́gba nítorí ẹ̀ṣẹ̀ wọn, n óo sì nà wọ́n ní pàṣán nítorí àìdára wọn.

³³Ṣugbọn ìfẹ́ mi tí kì í yẹ̀ kò ní kúrò lára rẹ̀, bẹ́ẹ̀ ni n kò ní yẹ òtítọ́ mi.

³⁴N kò ni yẹ majẹmu mi, bẹ́ẹ̀ ni n kò ní yí ọ̀rọ̀ tí mo ti sọ pada.

³⁵“Níwọ̀n ìgbà tí mo ti fi ìwà mímọ́ mi búra: n kò ní purọ́ fún Dafidi.

³⁶Arọmọdọmọ rẹ̀ ni yóo máa jọba títí lae, ìtẹ́ rẹ̀ yóo sì máa wà níwájú mi, níwọ̀n ìgbà tí oòrùn bá ń yọ.

³⁷A óo fi ìdí rẹ̀ múlẹ̀ bí òṣùpá títí lae, yóo dúró ṣinṣin níwọ̀n ìgbà tí ojú ọ̀run bá ń bẹ.”

³⁸Ṣugbọn nisinsinyii inú rẹ ti ru sí ẹni àmì òróró rẹ; o ti ta á nù, o sì ti kọ̀ ọ́ sílẹ̀.

³⁹O ti pa majẹmu tí o bá iranṣẹ rẹ dá tì, o ti ba adé rẹ̀ jẹ́, o ti fi wọ́lẹ̀.

⁴⁰O ti wó gbogbo odi rẹ̀; o sì ti sọ ilé ìṣọ́ rẹ̀ di ahoro.

⁴¹Gbogbo àwọn tí ń kọjá lọ ní ń kó o lẹ́rù; ó ti di ẹni ẹ̀gàn lọ́dọ̀ àwọn aládùúgbò rẹ̀.

⁴²O ti ran àwọn ọ̀tá rẹ̀ lọ́wọ́; o ti mú kí àwọn ọ̀tá rẹ̀ yọ̀ ọ́.

⁴³Àní, o ti ba gbogbo ohun ìjà rẹ̀ jẹ́, o kò sì ràn án lọ́wọ́ lójú ogun.

⁴⁴O ti gba ọ̀pá àṣẹ lọ́wọ́ rẹ̀; o sì ti wó ìtẹ́ rẹ̀ palẹ̀.

⁴⁵O ti gé ìgbà èwe rẹ̀ kúrú; o sì ti da ìtìjú bò ó.

⁴⁶Yóo ti pẹ́ tó, OLUWA? Ṣé títí lae ni o óo máa fi ara pamọ́ fún mi? Yóo ti pẹ́ tó tí ibinu rẹ yóo máa jò bí iná?

⁴⁷OLUWA, ranti bí ọjọ́ ayé ẹ̀dá ti gùn mọ, ati pé ẹ̀dá lásán ni ọmọ eniyan!

⁴⁸Ta ló wà láyé tí kò ní kú? Ta ló lè gba ẹ̀mí ara rẹ̀ lọ́wọ́ agbára isà òkú?

⁴⁹OLUWA, níbo ni ìfẹ́ rẹ ìgbàanì tí kì í yẹ̀ wà, tí o búra fún Dafidi pẹlu òtítọ́ rẹ?

⁵⁰OLUWA, ranti bí èmi, iranṣẹ rẹ, ti di ẹni yẹ̀yẹ́; ati bí mo ti ń farada ẹ̀gàn àwọn eniyan,

⁵¹OLUWA àwọn ọ̀tá rẹ ń fi ẹni tí o fi àmì òróró yàn ṣe yẹ̀yẹ́, wọ́n sì ń kẹ́gàn ìrìn ẹsẹ̀ rẹ̀.

⁵²Ẹni ìyìn ni OLUWA títí lae! Amin! Amin!