Read yoruba Orin Dafidi 94 Bible Online

Orin Dafidi 94 - yoruba bible

Orin Dafidi 94

¹OLUWA, ìwọ Ọlọrun ẹ̀san, ìwọ Ọlọrun ẹ̀san, fi agbára rẹ hàn!

²Dìde, ìwọ onídàájọ́ ayé; san ẹ̀san èrè iṣẹ́ àwọn agbéraga fún wọn!

³OLUWA, yóo ti pẹ́ tó? Àní, yóo ti pẹ́ tó tí àwọn eniyan burúkú yóo máa ṣe jàgínní?

⁴Wọ́n ń fi ìgbéraga sọ̀rọ̀ jàbùjàbù, gbogbo àwọn aṣebi ní ń fọ́nnu.

⁵Wọ́n ń rún àwọn eniyan rẹ mọ́lẹ̀, OLUWA, wọ́n ń pọ́n àwọn eniyan rẹ lójú.

⁶Wọ́n ń pa àwọn opó ati àwọn àlejò, wọ́n sì ń pa àwọn aláìníbaba;

⁷wọ́n ń sọ pé, “OLUWA kò rí wa; Ọlọrun Jakọbu kò ṣàkíyèsí wa.”

⁸Ẹ jẹ́ kí ó ye yín, ẹ̀yin tí ẹ ya òpè jùlọ láàrin àwọn eniyan! Ẹ̀yin òmùgọ̀, nígbà wo ni ẹ óo gbọ́n?

⁹Ṣé ẹni tí ó dá etí, ni kò ní gbọ́ràn? Àbí ẹni tí ó dá ojú, ni kò ní ríran?

¹⁰Ṣé ẹni tí ń jẹ àwọn orílẹ̀-èdè níyà, ni kò ní jẹ yín níyà? Àbí ẹni tí ń fún eniyan ní ìmọ̀, ni kò ní ní ìmọ̀?

¹¹OLUWA mọ èrò ọkàn ọmọ eniyan, ó mọ̀ pé afẹ́fẹ́ lásán ni.

¹²Ayọ̀ ń bẹ fún ẹni tí o bá báwí, OLUWA, tí o sì kọ́ ní òfin rẹ,

¹³kí ó lè sinmi lọ́wọ́ ọjọ́ ìṣòro, títí tí a ó fi gbẹ́ kòtò fún eniyan burúkú.

¹⁴Nítorí OLUWA kò ní kọ àwọn eniyan rẹ̀ sílẹ̀; kò ní ṣá àwọn eniyan ìní rẹ̀ tì;

¹⁵nítorí pé ìdájọ́ òtítọ́ yóo pada jẹ́ ìpín àwọn olódodo, àwọn olóòótọ́ yóo sì máa tọ̀ ọ́ lẹ́yìn.

¹⁶Ta ni yóo bá mi dìde sí àwọn eniyan burúkú? Ta ni yóo bá mi dìde sí àwọn aṣebi?

¹⁷Bí kì í bá ṣe pé OLUWA ràn mí lọ́wọ́, ǹ bá ti dákẹ́ jẹ́ẹ́ ní isà òkú.

¹⁸Nígbà tí mo rò pé, “Ẹsẹ̀ mi ti yọ̀,” OLUWA, ìfẹ́ rẹ tí kì í yẹ̀ ni ó gbé mi ró.

¹⁹Nígbà tí àìbàlẹ̀ ọkàn mi pọ̀ pupọ, ìwọ ni o tù mí ninu, tí o dá mi lọ́kàn le.

²⁰Ǹjẹ́ o lè ní àjọṣe pẹlu àwọn ìkà aláṣẹ, àwọn tí ń fi òfin gbé ìwà ìkà ró?

²¹Wọ́n para pọ̀ láti gba ẹ̀mí olódodo; wọ́n sì dá ẹjọ́ ikú fún aláìṣẹ̀.

²²Ṣugbọn OLUWA ti di ibi ìsádi mi, Ọlọrun mi sì ti di àpáta ààbò mi.

²³Yóo san ẹ̀san ẹ̀ṣẹ̀ wọn fún wọn, yóo pa wọ́n run nítorí ìwà ìkà wọn. OLUWA Ọlọrun wa yóo pa wọ́n run.