Read yoruba Orin Dafidi 95 Bible Online

Orin Dafidi 95 - yoruba bible

Orin Dafidi 95

¹Ẹ wá, ẹ jẹ́ kí á kọrin sí OLUWA; ẹ jẹ́ kí á hó ìhó ayọ̀ sí Olùdáàbòbò ati ìgbàlà wa!

²Ẹ jẹ́ kí á wá siwaju rẹ̀ pẹlu ọpẹ́; ẹ jẹ́ kí á fi orin ìyìn hó ìhó ayọ̀ sí i.

³Nítorí pé Ọlọrun tí ó tóbi ni OLUWA, ọba tí ó tóbi ni, ó ju gbogbo oriṣa lọ.

⁴Ìkáwọ́ rẹ̀ ni ọ̀gbun ilẹ̀ wà; gíga àwọn òkè ńlá wà ní ìkáwọ́ rẹ̀ pẹlu.

⁵Tirẹ̀ ni òkun, nítorí pé òun ni ó dá a; ọwọ́ rẹ̀ ni ó sì fi dá ìyàngbẹ ilẹ̀.

⁶Ẹ wá, ẹ jẹ́ kí á jọ́sìn, kí á tẹríba, ẹ jẹ́ kí á kúnlẹ̀ níwájú OLUWA, Ẹlẹ́dàá wa!

⁷Nítorí òun ni Ọlọrun wa, àwa ni eniyan rẹ̀, tí ó ń kó jẹ̀ káàkiri, àwa ni agbo aguntan rẹ̀. Bí ẹ bá gbọ́ ohùn rẹ̀ lónìí,

⁸ẹ má ṣe orí kunkun bí ẹ ti ṣe ní Meriba, ati bí ẹ ti ṣe ní ijọ́un ní Masa, ninu aṣálẹ̀

⁹nígbà tí àwọn baba ńlá yín dán mi wò, tí wọ́n dẹ mí, bí ó tilẹ̀ jẹ́ pé wọ́n ti rí ohun tí mo ti ṣe rí.

¹⁰Fún ogoji ọdún gbáko ni ọ̀rọ̀ wọn fi sú mi, tí mo sọ pé, “Ọkàn àwọn eniyan wọnyi ti yapa, wọn kò sì bìkítà fún ìlànà mi.”

¹¹Nítorí náà ni mo fi fi ibinu búra pé, wọn kò ní wọ inú ìsinmi mi.