Read yoruba Orin Dafidi 96 Bible Online

Orin Dafidi 96 - yoruba bible

Orin Dafidi 96

¹Ẹ kọ orin titun sí OLUWA; gbogbo ayé, ẹ kọ orin sí OLUWA.

²Ẹ kọ orin sí OLUWA, ẹ yin orúkọ rẹ̀; ẹ sọ nípa ìgbàlà rẹ̀ láti ọjọ́ dé ọjọ́.

³Ẹ kéde ògo rẹ̀ láàrin àwọn orílẹ̀-èdè; ẹ sọ̀rọ̀ iṣẹ́ ìyanu rẹ̀ láàrin àwọn eniyan.

⁴Nítorí OLUWA tóbi, ó yẹ kí á máa yìn ín lọpọlọpọ; ó sì yẹ kí á bẹ̀rù rẹ̀ ju gbogbo oriṣa lọ.

⁵Nítorí oriṣa lásán ni àwọn orílẹ̀-èdè yòókù ń sìn, ṣugbọn OLUWA ni ó dá ọ̀run.

⁶Iyì ati ọlá ńlá ń bẹ lọ́dọ̀ rẹ̀; agbára ati ẹwà kún inú ilé mímọ́ rẹ̀.

⁷Ẹ yin OLUWA, gbogbo ẹ̀yin aráyé; ẹ kókìkí ògo ati agbára rẹ̀.

⁸Ẹ fún OLUWA ní iyì tí ó tọ́ sí orúkọ rẹ̀, ẹ mú ọrẹ lọ́wọ́ wá sinu àgbàlá rẹ̀.

⁹Ẹ sin OLUWA ninu ẹwà ìwà mímọ́; gbogbo ayé, ẹ wárìrì níwájú rẹ̀.

¹⁰Ẹ wí láàrin àwọn orílẹ̀-èdè pé, “OLUWA jọba! A ti fi ìdí ayé múlẹ̀, kò sì ní yẹ̀ lae; OLUWA yóo fi òtítọ́ ṣe ìdájọ́ àwọn eniyan.”

¹¹Jẹ́ kí inú ọ̀run ó dùn, sì jẹ́ kí ayé ó yọ̀; kí òkun ó hó, ati gbogbo ohun tí ó wà ninu rẹ̀.

¹²Jẹ́ kí pápá oko ati gbogbo ohun tí ó wà ninu rẹ̀ yọ̀. Nígbà náà ni gbogbo igi igbó yóo fi ayọ̀ kọrin,

¹³níwájú OLUWA, nítorí pé ó ń bọ̀; ó ń bọ̀ wá ṣe ìdájọ́ ayé. Yóo fi òdodo ṣe ìdájọ́ ayé; yóo sì fi òtítọ́ ṣe ìdájọ́ àwọn eniyan.