Read yoruba Ìwé Òwe 18 Bible Online

Ìwé Òwe 18 - yoruba bible

Ìwé Òwe 18

¹Onímọ-tara-ẹni-nìkan ya ara rẹ̀ sọ́tọ̀, láti tako ìdájọ́ òtítọ́.

²Òmùgọ̀ kò ní inú dídùn sí ìmọ̀, àfi kí ó ṣá máa sọ èrò ọkàn rẹ̀.

³Nígbà tí ìwà burúkú bá dé, ẹ̀gàn yóo dé, bí àbùkù bá wọlé ìtìjú yóo tẹ̀lé e.

⁴Ọ̀rọ̀ ẹnu eniyan dàbí odò jíjìn, orísun ọgbọ́n dàbí omi odò tí ń tú jáde.

⁵Kò dára kí á ṣe ojuṣaaju sí eniyan burúkú, tabi kí á dá olódodo ní ẹjọ́ ẹ̀bi.

⁶Ẹnu òmùgọ̀ a máa dá ìjà sílẹ̀, ọ̀rọ̀ ẹnu rẹ̀ a sì máa bá a wá pàṣán.

⁷Ẹnu òmùgọ̀ ni yóo tì í sinu ìparun, ọ̀rọ̀ ẹnu rẹ̀ ni yóo sì ṣe tàkúté mú un.

⁸Ọ̀rọ̀ kẹ́lẹ́kẹ́lẹ́ olófòófó dàbí òkèlè oúnjẹ dídùn, a máa wọni lára ṣinṣin.

⁹Ẹni tí ń ṣe ìmẹ́lẹ́ lẹ́nu iṣẹ́ rẹ̀, ẹgbẹ́ ni òun ati ẹni tí ń ba nǹkan jẹ́.

¹⁰Orúkọ OLUWA jẹ́ ilé-ìṣọ́ tí ó lágbára, olódodo sá wọ inú rẹ̀, ó sì yè.

¹¹Ohun ìní ọlọ́rọ̀ ni ìlú olódi wọn, lójú wọn, ó dàbí odi ńlá tí ń dáàbò bò wọ́n.

¹²Ìgbéraga níí ṣáájú ìparun, ìrẹ̀lẹ̀ níí ṣáájú iyì.

¹³Ìwà òmùgọ̀ ni, ìtìjú sì ni, kí eniyan fèsì sí ọ̀rọ̀ kí ó tó gbọ́ ìdí rẹ̀.

¹⁴Eniyan lè farada àìsàn, ṣugbọn ta ló lè farada ìrẹ̀wẹ̀sì ọkàn?

¹⁵Ọkàn ọlọ́gbọ́n a máa fẹ́ ìmọ̀, etí ni ọlọ́gbọ́n fi wá a kiri.

¹⁶Ẹ̀bùn a máa ṣí ọ̀nà sílẹ̀ fún ẹni tí ń fúnni lẹ́bùn, a sì mú un dé iwájú ẹni gíga.

¹⁷Ẹni tí ó bá kọ́kọ́ rojọ́ níí dàbí ẹni tí ó jàre, títí tí ẹnìkejì yóo fi bi í ní ìbéèrè,

¹⁸Gègé ṣíṣẹ́ a máa yanjú ọ̀rọ̀ a sì parí gbolohun asọ̀ láàrin àwọn alágbára.

¹⁹Ọkàn arakunrin tí eniyan bá ṣẹ̀ a máa le bí ìlú olódi, àríyànjiyàn sì dàbí ọ̀pá ìdábùú ìlẹ̀kùn ilé ìṣọ́.

²⁰Eniyan lè fi ọ̀rọ̀ ẹnu wá oúnjẹ fún ara rẹ̀, a lè jẹ oúnjẹ tí a bá fi ọ̀rọ̀ ẹnu wá ní àjẹyó ati àjẹṣẹ́kù.

²¹Ahọ́n lágbára láti pani ati láti lani, ẹni tí ó bá fẹ́ràn rẹ̀ yóo jèrè rẹ̀.

²²Ẹni tí ó bá rí aya fẹ́ rí ohun rere, ó sì rí ojurere lọ́dọ̀ OLUWA.

²³Ẹ̀bẹ̀ ni talaka bẹ̀, ṣugbọn ọlọ́rọ̀ á dáhùn tìkanra-tìkanra.

²⁴Àwọn ọ̀rẹ́ kan wà, ọ̀rẹ́ àfẹnujẹ́ ni wọ́n, ṣugbọn ọ̀rẹ́ mìíràn wà tí ó fi ara mọ́ni ju ọmọ ìyá ẹni lọ.