Read yoruba Ìwé Òwe 24 Bible Online

Ìwé Òwe 24 - yoruba bible

Ìwé Òwe 24

¹Má ṣe ìlara àwọn ẹni ibi, má sì ṣe bá wọn kẹ́gbẹ́,

²nítorí ọkàn wọn ń gbèrò ìparun, ẹnu wọn sì ń sọ̀rọ̀ ìkà.

³Ọgbọ́n ni a fi ń kọ́lé, òye ni a fi ń fi ìdí rẹ̀ múlẹ̀.

⁴Pẹlu ìmọ̀ ni eniyan fi í kó oniruuru nǹkan ìní dáradára olówó iyebíye kún àwọn yàrá rẹ̀

⁵Ọlọ́gbọ́n lágbára ju akọni lọ, ẹni tí ó ní ìmọ̀ sì ju alágbára lọ.

⁶Nítorí nípa ìtọ́ni ọlọ́gbọ́n, o lè jagun, ọpọlọpọ ìmọ̀ràn níí sìí mú ìṣẹ́gun wà.

⁷Ọgbọ́n ga jù fún òmùgọ̀, kì í lè lanu sọ̀rọ̀ láwùjọ.

⁸Ẹni tí ń pète àtiṣe ibi ni a óo máa pè ní oníṣẹ́ ibi.

⁹Ẹ̀ṣẹ̀ ni ète òmùgọ̀, ẹni ìríra sì ni pẹ̀gànpẹ̀gàn.

¹⁰Bí o bá kùnà lọ́jọ́ ìpọ́njú, a jẹ́ pé agbára rẹ kò tó.

¹¹Gba àwọn tí wọ́n bá fẹ́ lọ pa sílẹ̀, fa àwọn tí wọ́n bá fẹ́ ta gbọ̀n-ọ́n-gbọ̀n-ọ́n, lọ sọ́dọ̀ àwọn apànìyàn pada.

¹²Bí ẹ bá sọ pé ẹ kò mọ nǹkan nípa rẹ̀, ṣé ẹni tí ó mọ èrò ọkàn kò rí i? Ṣé ẹni tí ń pa ẹ̀mí rẹ mọ́ kò mọ̀, àbí kò ní san án fún eniyan gẹ́gẹ́ bí iṣẹ́ ọwọ́ rẹ̀?

¹³Ọmọ mi, jẹ oyin, nítorí pé ó dùn, oyin tí a fún láti inú afárá a sì máa dùn lẹ́nu.

¹⁴Mọ̀ dájú pé bẹ́ẹ̀ ni ọgbọ́n yóo rí fún ọ, bí o bá ní i, yóo dára fún ọ lẹ́yìn ọ̀la, ìrètí rẹ kò sì ní di asán.

¹⁵Má lúgọ bí eniyan burúkú láti kó ilé olódodo, má fọ́ ilé rẹ̀.

¹⁶Nítorí pé bí olódodo bá ṣubú léra léra nígbà meje, yóo tún dìde, ṣugbọn àjálù máa ń bi ẹni ibi ṣubú.

¹⁷Má yọ̀ nígbà tí ọ̀tá rẹ bá ṣubú, má sì jẹ́ kí inú rẹ dùn bí ó bá kọsẹ̀,

¹⁸kí OLUWA má baà bínú sí ọ tí ó bá rí ọ, kí ó sì yí ojú ibinu rẹ̀ pada kúrò lára ọ̀tá rẹ.

¹⁹Má ṣe kanra nítorí àwọn aṣebi, má sì ṣe jowú eniyan burúkú,

²⁰nítorí pé kò sí ìrètí fún ẹni ibi, a óo sì pa àtùpà eniyan burúkú.

²¹Ọmọ mi, bẹ̀rù OLUWA ati ọba, má ṣe àìgbọràn sí ọ̀kankan ninu wọn;

²²nítorí jamba lè ti ọ̀dọ̀ wọn wá lójijì, ta ló mọ irú ìparun, tí ó lè ti ọ̀dọ̀ àwọn mejeeji wá?

²³Àwọn ọ̀rọ̀ ọlọ́gbọ́n tún nìwọ̀nyí: Kò dára láti máa ṣe ojuṣaaju ninu ìdájọ́.

²⁴Ẹni tí ó sọ fún ẹlẹ́ṣẹ̀ pé ọwọ́ rẹ̀ mọ́, àwọn eniyan yóo gbé e ṣépè, àwọn orílẹ̀-èdè yóo sì kórìíra rẹ̀.

²⁵Ṣugbọn yóo dára fún àwọn tí wọ́n bá dá ẹ̀bi fún ẹni tí ó jẹ̀bi, ibukun Ọlọrun yóo sì bá wọn.

²⁶Ẹni tí ó bá fèsì tí ó tọ́ dàbí ẹni tí ó fi ẹnu koni lẹ́nu.

²⁷Parí iṣẹ́ tí ò ń ṣe níta, tọ́jú gbogbo nǹkan oko rẹ, lẹ́yìn náà kọ́ ilé rẹ.

²⁸Má jẹ́rìí lòdì sí aládùúgbò rẹ láìnídìí, má sì jẹ́ kí ọ̀rọ̀ ẹ̀tàn ti ẹnu rẹ jáde.

²⁹Má sọ pé, “Bí lágbájá ti ṣe sí mi, bẹ́ẹ̀ ni èmi náà yóo ṣe sí i, n óo san ẹ̀san ohun tí ó ṣe fún un.”

³⁰Mo gba ẹ̀gbẹ́ oko ọ̀lẹ kan kọjá, mo kọjá lẹ́gbẹ̀ẹ́ ọgbà àjàrà ẹnìkan tí kò lóye.

³¹Wò ó! Ẹ̀gún ti hù níbi gbogbo, igbó ti bo gbogbo rẹ̀ mọ́lẹ̀, ọgbà tí ó fi òkúta ṣe yí i ká sì ti wó.

³²Mo ṣe àṣàrò lórí ohun tí mo ṣàkíyèsí, mo sì kọ́ ẹ̀kọ́ lára ohun tí mo rí.

³³Oorun díẹ̀, òògbé díẹ̀, ìkáwọ́ gbera díẹ̀ láti sinmi,

³⁴bẹ́ẹ̀ ni òṣì yóo ṣe dé bá ọ bíi kí olè yọ sí eniyan, àìní yóo sì wọlé tọ̀ ọ́ bí ẹni tí ó di ihamọra ogun.