Read yoruba Ìwé Òwe 25 Bible Online

Ìwé Òwe 25 - yoruba bible

Ìwé Òwe 25

¹Àwọn òwe mìíràn tí Solomoni pa, tí àwọn òṣìṣẹ́ Hesekaya ọba Juda kọ sílẹ̀ nìwọ̀nyí.

²Ògo ni ó jẹ́ fún Ọlọrun láti fi nǹkan pamọ́, ṣugbọn ògo ló sá tún jẹ́ fún ọba láti wádìí nǹkan ní àwárí.

³Bí ọ̀run ti ga, tí ilẹ̀ sì jìn, bẹ́ẹ̀ ni ẹnikẹ́ni kò lè mọ ohun tí ó wà lọ́kàn àwọn ọba.

⁴Yọ́ gbogbo ìdọ̀tí tí ó wà lára fadaka kúrò, alágbẹ̀dẹ yóo sì rí fadaka fi ṣe ohun èlò.

⁵Mú àwọn olùdámọ̀ràn ibi kúrò lọ́dọ̀ ọba, a óo sì fi ìdí ìjọba rẹ̀ múlẹ̀ pẹlu òdodo.

⁶Má ṣe gbéraga níwájú ọba, tabi kí o jókòó ní ipò àwọn eniyan pataki,

⁷nítorí ó sàn kí ó wí fún ọ pé, “Máa bọ̀ lókè níhìn-ín”, jù pé kí ó rẹ̀ ọ́ sílẹ̀ níwájú ọlọ́lá kan lọ.

⁸Má fi ìwàǹwára fa ẹnikẹ́ni lọ sílé ẹjọ́, nítorí kí ni o óo ṣe nígbà tí aládùúgbò rẹ bá dójútì ọ́.

⁹Bí o bá ń bá aládùúgbò rẹ ṣe àríyànjiyàn má ṣe tú àṣírí ẹlòmíràn,

¹⁰kí ẹni tí ó bá gbọ́ má baà dójútì ọ́, kí o má baà sọ ara rẹ lórúkọ.

¹¹Ọ̀rọ̀ tí a sọ lákòókò tí ó yẹ dàbí ohun ọ̀ṣọ́ wúrà tí a gbé sinu àwo fadaka.

¹²Ìbáwí ọlọ́gbọ́n dàbí òrùka wúrà, tabi ohun ọ̀ṣọ́ tí a fi wúrà ṣe, fún ẹni tí ó ní etí láti fi gbọ́.

¹³Bí òtútù yìnyín nígbà ìkórè, bẹ́ẹ̀ ni olóòótọ́ iranṣẹ jẹ́, sí àwọn tí ó rán an, a máa fi ọkàn àwọn oluwa rẹ̀ balẹ̀.

¹⁴Bí òjò tí ó ṣú dudu tí ó fẹ́ atẹ́gùn títí ṣugbọn tí kò rọ̀, ni ẹni tí ó ń fọ́nnu láti fúnni lẹ́bùn, tí kò sì fúnni ní nǹkankan.

¹⁵Pẹlu sùúrù, a lè yí aláṣẹ lọ́kàn pada ọ̀rọ̀ pẹ̀lẹ́ sì lè fọ́ eegun.

¹⁶Bí o bá rí oyin, lá a níwọ̀nba, má lá a ní àlájù, kí o má baà bì.

¹⁷Má máa lọ sílé aládùúgbò rẹ lemọ́lemọ́, kí ọ̀rọ̀ rẹ má baà sú u, kí ó sì kórìíra rẹ.

¹⁸Ẹni tí ó jẹ́rìí èké nípa aládùúgbò rẹ̀ dàbí kùmọ̀ ọmọ ogun, tabi idà, tabi ọfà tí ó mú.

¹⁹Igbẹkẹle ninu alaiṣootọ ní àkókò ìṣòro, dàbí eyín tí ń ro ni, tabi ẹsẹ̀ tí ó rọ́.

²⁰Bí ẹni tí a bọ́ṣọ rẹ̀ ninu òtútù, tabi tí a da ọtí kíkan sójú egbò rẹ̀, ni ẹni tí à ń kọrin fún ní àkókò tí inú rẹ̀ bàjẹ́.

²¹Bí ebi bá ń pa ọ̀tá rẹ, fún un ní oúnjẹ jẹ, bí òùngbẹ bá ń gbẹ ẹ́, fún un ní omi mu.

²²Nípa bẹ́ẹ̀ o óo wa ẹ̀yinná lé e lórí, OLUWA yóo sì san ẹ̀san rere fún ọ.

²³Bí ẹ̀fúùfù ìhà àríwá tíí mú òjò wá, bẹ́ẹ̀ ni òfófó ṣíṣe máa ń fa kí a máa fi ojú burúkú woni.

²⁴Ó sàn kí á máa gbé kọ̀rọ̀ kan lókè àjà, ju pé kí eniyan máa bá oníjàngbọ̀n obinrin gbé ilé lọ.

²⁵Gẹ́gẹ́ bí omi tútù ti rí fún ẹni tí òùngbẹ ń gbẹ, ni ìròyìn ayọ̀ láti ilẹ̀ òkèèrè rí.

²⁶Olódodo tí ó fi ààyè sílẹ̀ fún eniyan burúkú dàbí odò tí omi rẹ̀ dàrú tabi kànga tí a da ìdọ̀tí sí.

²⁷Kò dára kí eniyan lá oyin ní àlájù, bẹ́ẹ̀ ni kò dára kí eniyan máa wá iyì ní àwájù.

²⁸Ẹni tí kò lè kó ara rẹ̀ níjàánu, dàbí ìlú tí ọ̀tá wọ̀, tí wọ́n sì wó odi rẹ̀ lulẹ̀.