Read yoruba Ìwé Òwe 26 Bible Online

Ìwé Òwe 26 - yoruba bible

Ìwé Òwe 26

¹Bí yìnyín kò ṣe yẹ ní àkókò ooru, ati òjò ní àkókò ìkórè, bẹ́ẹ̀ ni iyì kò yẹ òmùgọ̀.

²Bí ológoṣẹ́ tí ń rábàbà kiri, ati bí alápàáǹdẹ̀dẹ̀ tí ń fò ká, bẹ́ẹ̀ ni èpè tí kò nídìí, kì í balẹ̀ síbìkan.

³Bí pàṣán ti rí lára ẹṣin, tí ìjánu sì rí lẹ́nu kẹ́tẹ́kẹ́tẹ́, bẹ́ẹ̀ ni igi rí lẹ́yìn àwọn òmùgọ̀.

⁴Má ṣe dá òmùgọ̀ lóhùn gẹ́gẹ́ bí ìwà òmùgọ̀ rẹ̀, kí ìwọ pàápàá má baà dàbí rẹ̀.

⁵Dá òmùgọ̀ lóhùn gẹ́gẹ́ bí ìwà agọ̀ rẹ̀, kí ó má baà rò pé òun gbọ́n lójú ara òun.

⁶Ẹni tí ó rán òmùgọ̀ níṣẹ́ gé ara rẹ̀ lẹ́sẹ̀, ó sì ń mu omi ìjàngbọ̀n.

⁷Bí ẹsẹ̀ arọ, tí kò wúlò, ni òwe rí lẹ́nu òmùgọ̀.

⁸Bí ẹni fi òkúta sinu kànnàkànnà, ni ẹni tí ń yẹ́ òmùgọ̀ sí rí.

⁹Bí ẹ̀gún tí ó gún ọ̀mùtí lọ́wọ́, ni òwe rí lẹ́nu òmùgọ̀.

¹⁰Ẹni tí ó gba òmùgọ̀ tabi ọ̀mùtí sí iṣẹ́ dàbí tafàtafà tí ń pa eniyan lára kiri.

¹¹Bí ajá tíí pada sídìí èébì rẹ̀ bẹ́ẹ̀ ni òmùgọ̀ tó pada sí ìwà agọ̀ rẹ̀.

¹²Ìrètí ń bẹ fún òmùgọ̀ ju ẹni tí ó gbọ́n lójú ara rẹ̀ lọ.

¹³Ọ̀lẹ ń wí pé, “Kinniun kan wà lọ́nà! Kinniun buburu kan wà ní ìgboro!”

¹⁴Bí ìlẹ̀kùn ṣe ń ṣí síhìn-ín, sọ́hùn-ún, lórí ìdè rẹ̀, bẹ́ẹ̀ ni ọ̀lẹ ń yí síhìn-ín, sọ́hùn-ún, lórí ibùsùn rẹ̀.

¹⁵Ọ̀lẹ ti ọwọ́ bọ àwo oúnjẹ, ṣugbọn ó lẹ kọjá kí ó lè bu oúnjẹ kí ó fi bọ ẹnu.

¹⁶Ọ̀lẹ gbọ́n lójú ara rẹ̀ ju eniyan meje tí wọ́n lè dáhùn ọ̀rọ̀ pẹlu ọgbọ́n lọ.

¹⁷Ẹni tí ó ti ọrùn bọ ìjà tí kì í ṣe tirẹ̀, dàbí ẹni tí ó gbá ajá alájá létí mú.

¹⁸Bíi aṣiwèrè tí ó ju igi iná tabi ọfà olóró,

¹⁹ni ẹni tó ṣi ẹlòmíràn lọ́nà, tí ó wá ń sọ pé “Mo kàn ń ṣeré ni!”

²⁰Láìsí igi, iná óo kú, bẹ́ẹ̀ ni, láìsí olófòófó, ìjà óo tán.

²¹Bí èédú ti rí sí ògúnná, ati igi sí iná, bẹ́ẹ̀ ni oníjà eniyan rí, sí àtidá ìjà sílẹ̀.

²²Ọ̀rọ̀ kẹ́lẹ́kẹ́lẹ́ olófòófó dàbí òkèlè oúnjẹ dídùn a máa wọni lára ṣinṣin.

²³Ètè mímú ati inú burúkú, dàbí ìdàrọ́ fadaka tí a yọ́ bo ìkòkò amọ̀.

²⁴Ẹni tí ó bá kórìíra eniyan, lè máa fi ọ̀rọ̀ ẹnu bo ara rẹ̀ láṣìírí, ṣugbọn ẹ̀tàn wà ninu rẹ̀,

²⁵bí ó bá sọ̀rọ̀ dáradára, má ṣe gbà á gbọ́, nítorí ọpọlọpọ ìríra kún inú ọkàn rẹ̀.

²⁶Ó lè gbìyànjú láti fi ẹ̀tàn pa àrankàn rẹ̀ mọ́, ṣugbọn ìwà burúkú rẹ̀ yóo hàn ní àwùjọ gbogbo eniyan.

²⁷Ẹni tí ó bá gbẹ́ kòtò, ni yóo já sinu rẹ̀, ẹni tí ó bá sì ń yí òkúta ni òkúta yóo pada yí lù.

²⁸A-purọ́-mọ́ni a máa kórìíra àwọn tí ń parọ́ mọ́, ẹni tí ń pọ́nni sì lè fa ìparun ẹni.