Read yoruba Ìwé Òwe 28 Bible Online

Ìwé Òwe 28 - yoruba bible

Ìwé Òwe 28

¹Àwọn eniyan burúkú a máa sá, nígbà tí ẹnikẹ́ni kò lé wọn, ṣugbọn olódodo a máa láyà bíi kinniun.

²Bí orílẹ̀-èdè kan bá dẹ́ṣẹ̀, léraléra ni wọ́n ó máa jọba, ṣugbọn bí orílẹ̀-èdè kan bá ní àwọn eniyan tí wọn ní òye ati ìmọ̀, yóo wà fún ìgbà pípẹ́.

³Talaka tí ń ni aláìní lára dàbí òjò líle tí ó ba nǹkan ọ̀gbìn jẹ́.

⁴Àwọn tí wọ́n kọ òfin sílẹ̀ ni wọ́n máa ń yin àwọn eniyan burúkú, ṣugbọn àwọn tí wọn ń pa òfin mọ́ máa ń dojú ìjà kọ wọ́n.

⁵Òye ìdájọ́ òdodo kò yé àwọn eniyan burúkú, ṣugbọn ó yé àwọn tí ń wá OLUWA yékéyéké.

⁶Talaka tí ń rìn pẹlu òtítọ́ inú sàn ju ọlọ́rọ̀ tí ń hùwà àgàbàgebè lọ.

⁷Ọlọ́gbọ́n ọmọ ni ọmọ tí ó pa òfin mọ́, ṣugbọn ẹni tí ń bá àwọn wọ̀bìà rìn, ń dójúti baba rẹ̀.

⁸Ẹni tí ó ń fi kún ọrọ̀ rẹ̀ nípa gbígba èlé ati èrè jíjẹ ní ọ̀nà èrú, ń kó ọrọ̀ náà jọ fún ẹni tí yóo ṣàánú àwọn talaka.

⁹Ẹni tí ó kọ etí dídi sí òfin Ọlọrun, adura rẹ̀ pàápàá yóo di ìríra sí Ọlọ́run.

¹⁰Ẹni tí ó ṣi olódodo lọ́nà lọ sinu ibi, yóo já sinu kòtò tí òun fúnrarẹ̀ gbẹ́ sílẹ̀, ṣugbọn aláìlẹ́bi eniyan yóo jogún ire.

¹¹Ọlọ́rọ̀ gbọ́n lójú ara rẹ̀, ṣugbọn talaka tí ó gbọ́n yóo rídìí rẹ̀.

¹²Nígbà tí olódodo bá borí, àwọn eniyan á yọ̀ ṣẹ̀ṣẹ̀, ṣugbọn nígbà tí ìkà bá dìde, àwọn eniyan á sá pamọ́.

¹³Ẹni tí ó bo ẹ̀ṣẹ̀ rẹ̀ mọ́lẹ̀ kò ní ṣe rere, ṣugbọn ẹni tí ó jẹ́wọ́ ẹ̀ṣẹ̀ rẹ̀, tí ó sì kọ̀ ọ́ sílẹ̀, yóo rí àánú gbà.

¹⁴Ayọ̀ ń bẹ fún ẹni tí ó ń bẹ̀rù OLUWA nígbà gbogbo, ṣugbọn ẹni tí ó sé ọkàn rẹ̀ le yóo bọ́ sinu ìyọnu.

¹⁵Ọba burúkú tí ó jọba lórí àwọn talaka, dàbí kinniun tí ń bú ramúramù, tabi ẹranko beari tí inú ń bí.

¹⁶Ìkà, aninilára ni olórí tí kò ní òye, ṣugbọn ẹ̀mí ẹni tí ó bá kórìíra à ń jèrè lọ́nà èrú yóo gùn.

¹⁷Bí ẹ̀bi ẹ̀jẹ̀ ẹnìkan bá ń da eniyan láàmú, yóo di ìsáǹsá ní gbogbo ọjọ́ ayé rẹ̀, kí ẹnikẹ́ni má ṣe ràn án lọ́wọ́.

¹⁸Ẹni tí ń rìn pẹlu òtítọ́ inú yóo rí ìgbàlà, ṣugbọn ẹni tí ń rìn ségesège yóo ṣubú sinu kòtò.

¹⁹Ẹni tí ń ṣiṣẹ́ oko dáradára, yóo ní oúnjẹ pupọ, ṣugbọn ẹni tí ń fi àkókò rẹ̀ ṣòfò yóo di talaka.

²⁰Olóòótọ́ yóo ní ibukun lọpọlọpọ, ṣugbọn ẹni tí ń kánjú àtilówó, kò ní lọ láìjìyà.

²¹Ojuṣaaju kò dára, sibẹ oúnjẹ lè mú kí eniyan ṣe ohun tí kò tọ́.

²²Ahun a máa sáré ati ní ọrọ̀, láìmọ̀ pé òṣì ń bọ̀ wá ta òun.

²³Ẹni tí ó bá eniyan wí, yóo rí ojurere níkẹyìn, ju ẹni tí ń pọ́n eniyan lọ.

²⁴Ẹni tí ó ja ìyá tabi baba rẹ̀ lólè, tí ó ní, “Kì í ṣe ẹ̀ṣẹ̀”, ẹlẹgbẹ́ apanirun ni.

²⁵Olójúkòkòrò eniyan a máa dá ìjà sílẹ̀, ṣugbọn ẹni tí ó gbẹ́kẹ̀lé OLUWA yóo ṣe rere.

²⁶Òmùgọ̀ ni ẹni tí ó gbẹ́kẹ̀lé ara rẹ̀, ẹni tí ń fi ọgbọ́n rìn yóo là.

²⁷Ẹni tí ó ta talaka lọ́rẹ kò ní ṣe aláìní, ṣugbọn ẹni tí ó fojú pamọ́ fún wọn, yóo gba ègún.

²⁸Nígbà tí àwọn eniyan burúkú bá dìde, àwọn eniyan á sá pamọ́, ṣugbọn nígbà tí wọ́n bá parun, olódodo á pọ̀ sí i.