Read yoruba Ìwé Òwe 29 Bible Online

Ìwé Òwe 29 - yoruba bible

Ìwé Òwe 29

¹Ẹni tí à ń báwí tí ó ń ṣoríkunkun, yóo parun lójijì láìsí àtúnṣe.

²Nígbà tí olódodo bá di eniyan pataki, àwọn eniyan a máa yọ̀, ṣugbọn nígbà tí eniyan burúkú bá wà lórí oyè, àwọn eniyan a máa kérora.

³Ọlọ́gbọ́n ọmọ a máa mú inú baba rẹ̀ dùn, ṣugbọn ẹni tí ń tẹ̀lé aṣẹ́wó kiri, ń fi ọrọ̀ ara rẹ̀ ṣòfò.

⁴Ọba tí ó bá ń ṣe ìdájọ́ òdodo, a máa fìdí orílẹ̀-èdè múlẹ̀, ṣugbọn ọba onírìbá a máa dojú orílẹ̀-èdè bolẹ̀.

⁵Ẹni tí ó bá ń pọ́n aládùúgbò rẹ̀, ń dẹ àwọ̀n sílẹ̀ fún ẹsẹ̀ rẹ̀.

⁶Eniyan burúkú bọ́ sinu àwọ̀n ẹ̀ṣẹ̀ rẹ̀, ṣugbọn olódodo lè kọrin, ó sì lè máa yọ̀.

⁷Olódodo a máa bìkítà fún ẹ̀tọ́ àwọn talaka, ṣugbọn àwọn eniyan burúkú kò ní òye irú rẹ̀.

⁸Àwọn ẹlẹ́gàn a máa dá rúkèrúdò sílẹ̀ láàrin ìlú, ṣugbọn àwọn ọlọ́gbọ́n a máa paná ibinu.

⁹Nígbà tí ọlọ́gbọ́n bá pe òmùgọ̀ lẹ́jọ́, ẹ̀rín ni òmùgọ̀ yóo máa fi rín, yóo máa pariwo, kò sì ní dákẹ́.

¹⁰Àwọn apànìyàn kórìíra olóòótọ́ inú, wọ́n sì ń wá ọ̀nà láti pa á.

¹¹Òmùgọ̀ eniyan a máa bínú, ṣugbọn ọlọ́gbọ́n a máa mú sùúrù.

¹²Bí aláṣẹ bá ń fetí sí irọ́, gbogbo àwọn ìgbìmọ̀ rẹ̀ yóo di eniyankeniyan.

¹³Ohun tí ó sọ talaka ati aninilára di ọ̀kan náà ni pé, OLUWA ló fún àwọn mejeeji ní ojú láti ríran.

¹⁴Ọba tí ó dájọ́ ẹ̀tọ́ fún talaka, ní a óo fìdí ìjọba rẹ̀ múlẹ̀ títí.

¹⁵Pàṣán ati ìbáwí a máa kọ́ ọmọ lọ́gbọ́n, ọmọ tí a bá fi sílẹ̀ yóo dójúti ìyá rẹ̀.

¹⁶Nígbà tí eniyan burúkú bá wà lórí oyè, ẹ̀ṣẹ̀ a máa pọ̀ síi, ṣugbọn lójú olódodo ni wọn yóo ti ṣubú.

¹⁷Tọ́ ọmọ rẹ, yóo sì fún ọ ní ìsinmi, yóo sì mú inú rẹ dùn.

¹⁸Orílẹ̀-èdè tí kò bá ní ìfihàn láti ọ̀run, yóo dàrú, ṣugbọn ayọ̀ ń bẹ fún ẹni tí ń pa òfin mọ́.

¹⁹Ọ̀rọ̀ ẹnu nìkan kò tó láti fi bá ẹrú wí, ó lè fi etí gbọ́ ṣugbọn kí ó má ṣe ohunkohun.

²⁰Òmùgọ̀ nírètí ju ẹni tí yóo sọ̀rọ̀ sọ̀rọ̀, tí kò lè kó ara rẹ̀ ní ìjánu lọ.

²¹Bí eniyan bá kẹ́ ẹrú ní àkẹ́jù, yóo ya ìyàkuyà níkẹyìn.

²²Ẹni tí inú ń bí a máa dá rògbòdìyàn sílẹ̀, onínúfùfù a sì máa ṣe ọpọlọpọ àṣìṣe.

²³Ìgbéraga eniyan a máa rẹ̀ ẹ́ sílẹ̀, ṣugbọn onírẹ̀lẹ̀ ọkàn yóo gba iyì.

²⁴Ẹni tí ó ṣe alábàápín pẹlu olè kò fẹ́ràn ẹ̀mí ara rẹ̀, ó gbọ́ ọ̀rọ̀ ègún, ṣugbọn kò sọ fún ẹnikẹ́ni.

²⁵Ìbẹ̀rù eniyan a máa di ìdẹkùn fún eniyan, ṣugbọn ẹni bá gbẹ́kẹ̀lé OLUWA yóo wà láìléwu.

²⁶Ọ̀pọ̀ ń wá ojurere olórí, ṣugbọn OLUWA níí dáni ní ẹjọ́ òdodo.

²⁷Olódodo a máa kórìíra alaiṣootọ, eniyan burúkú a sì kórìíra eniyan rere.