Read yoruba Ìwé Oníwàásù 10 Bible Online

Ìwé Oníwàásù 10 - yoruba bible

Ìwé Oníwàásù 10

¹Bí òkú eṣinṣin ṣe lè ba òórùn turari jẹ́; bẹ́ẹ̀ ni ìwà òmùgọ̀ kékeré lè ba ọgbọ́n ńlá ati iyì jẹ́.

²Ọkàn ọlọ́gbọ́n eniyan a máa darí rẹ̀ sí ọ̀nà rere, ṣugbọn ọ̀nà burúkú ni ọkàn òmùgọ̀ ń darí rẹ̀ sí.

³Ìrìn ẹsẹ̀ òmùgọ̀ láàrin ìgboro ń fihàn pé kò gbọ́n, a sì máa fihan gbogbo eniyan bí ó ti gọ̀ tó.

⁴Bí aláṣẹ bá ń bínú sí ọ, má ṣe torí rẹ̀ kúrò ní ìdí iṣẹ́ rẹ, ìtẹríba lè mú kí wọn dárí ẹ̀ṣẹ̀ tí ó bá tóbi jini.

⁵Nǹkan burúkú tí mo tún rí láyé ni, irú àṣìṣe tí àwọn aláṣẹ pàápàá ń ṣe:

⁶Wọ́n fi àwọn òmùgọ̀ sí ipò gíga, nígbà tí àwọn ọlọ́rọ̀ wà ní ipò tí ó rẹlẹ̀.

⁷Mo rí i tí àwọn ẹrú ń gun ẹṣin, nígbà tí àwọn ọmọ-aládé ń fẹsẹ̀ rìn bí ẹrú.

⁸Ẹni tí ó gbẹ́ kòtò ni yóo jìn sinu rẹ̀, ẹni tí ó bá já ọgbà wọlé ni ejò yóo bùjẹ.

⁹Ẹni tí ó bá ń fọ́ òkúta, ni òkúta í pa lára; ẹni tí ó bá ń la igi, ni igi í ṣe ní jamba.

¹⁰Ẹni tí kò bá pọ́n àáké rẹ̀ kí ó mú, yóo lo agbára pupọ bí ó bá fẹ́ lò ó, ṣugbọn ọgbọ́n a máa ranni lọ́wọ́ láti ṣe àṣeyọrí.

¹¹Lẹ́yìn tí ejò bá ti buni jẹ tán, kò ṣàǹfààní mọ́ kí á máa pọfọ̀ sí ejò.

¹²Ọ̀rọ̀ ẹnu ọlọ́gbọ́n a máa bu iyì kún un, ṣugbọn ẹnu òmùgọ̀ ni yóo pa á.

¹³Agọ̀ ni ìbẹ̀rẹ̀ ọ̀rọ̀ ẹnu rẹ̀, wèrè sì ni ìparí rẹ̀.

¹⁴Òmùgọ̀ ń sọ̀rọ̀ láìdákẹ́, kò sí ẹni tí ó mọ ohun tí ń bọ̀ lẹ́yìn ọ̀la, ta ni lè sọ ohun tí yóo ṣẹlẹ̀ lẹ́yìn rẹ̀ fún un.

¹⁵Làálàá ọ̀lẹ ń kó àárẹ̀ bá a, tóbẹ́ẹ̀ tí kò mọ ọ̀nà ìlú mọ́.

¹⁶Ilẹ̀ tí ọba rẹ̀ jẹ́ ọmọde gbé! Tí àwọn olórí rẹ̀ ń ṣe àríyá láàárọ̀.

¹⁷Ilẹ̀ tí ọba rẹ̀ kì í bá ṣe ọmọ ẹrú ṣoríire! Tí àwọn olórí rẹ̀ ń ṣe àríyá ní àsìkò tí ó tọ́; tí wọn ń jẹ tí wọn ń mu kí wọn lè lágbára, ṣugbọn tí kì í ṣe fún ìmutípara.

¹⁸Ọ̀lẹ a máa jẹ́ kí ilé ẹni wó, ìmẹ́lẹ́ a máa jẹ́ kí ilé ẹni jò.

¹⁹Oúnjẹ a máa múni rẹ́rìn-ín, waini a sì máa mú inú ẹni dùn, ṣugbọn owó ni ìdáhùn ohun gbogbo.

²⁰Má bú ọba, kì báà jẹ́ ninu ọkàn rẹ, má sì gbé ọlọ́rọ̀ ṣépè, kì báà jẹ́ ninu yàrá rẹ, nítorí atẹ́gùn lè gbé ọ̀rọ̀ rẹ lọ, tabi kí àwọn ẹyẹ kan lọ ṣòfófó rẹ.