Read yoruba Orin Solomoni 6 Bible Online

Orin Solomoni 6 - yoruba bible

Orin Solomoni 6

¹Níbo ni olùfẹ́ rẹ lọ, ìwọ, arẹwà jùlọ láàrin àwọn obinrin? Níbo ni olùfẹ́ rẹ yà sí, kí á lè bá ọ wá a?

²Olùfẹ́ mi ti lọ sinu ọgbà rẹ̀, níbi ebè igi turari, ó da ẹran rẹ̀ lọ sinu ọgbà, ó lọ já òdòdó lílì.

³Olùfẹ́ mi ló ni mí, èmi ni mo sì ni olùfẹ́ mi. Láàrin òdòdó lílì, ni ó ti ń da ẹran rẹ̀.

⁴Olùfẹ́ mi, o dára bíi Tirisa. O lẹ́wà bíi Jerusalẹmu, O níyì bíi ọ̀wọ́ àwọn ọmọ ogun tí ń gbé ọ̀págun.

⁵Yíjú kúrò lọ́dọ̀ mi, nítorí wọn kò jẹ́ kí n gbádùn. Irun orí rẹ dàbí ọ̀wọ́ ewúrẹ́ ninu agbo, tí ń sọ̀kalẹ̀ ní gẹ̀rẹ́gẹ̀rẹ́ òkè Gileadi.

⁶Eyín rẹ dàbí ọ̀wọ́ aguntan, tí wọn ṣẹ̀ṣẹ̀ wẹ̀ tán, gbogbo wọn gún régé, kò sì sí ọ̀kan tí ó yọ ninu wọn,

⁷Ẹ̀rẹ̀kẹ́ rẹ dàbí ìlàjì èso pomegiranate lábẹ́ ìbòjú rẹ.

⁸Àwọn ayaba ìbáà tó ọgọta, kí àwọn obinrin mìíràn sì tó ọgọrin, kí àwọn iranṣẹbinrin sì pọ̀, kí wọn má lóǹkà,

⁹sibẹ, ọ̀kan ṣoṣo ni àdàbà mi, olùfẹ́ mi tí ó péye. Ọmọlójú ìyá rẹ̀, ẹni tí kò ní àbààwọ́n lójú ẹni tí ó bí i. Àwọn iranṣẹbinrin ń pe ìyá rẹ̀ ní olóríire. Àwọn ayaba ati àwọn obinrin mìíràn ní ààfin sì ń yìn ín.

¹⁰Ta ni ń yọ bọ̀ bí ìmọ́lẹ̀ òwúrọ̀ yìí, tí ó mọ́ bí ọjọ́, tí ó lẹ́wà bí òṣùpá. Tí ó sì bani lẹ́rù, bí àwọn ọmọ ogun tí wọn dira ogun?

¹¹Mo lọ sinu ọgbà igi eléso, mo lọ wo ẹ̀ka igi tútù ní àfonífojì, pé bóyá àwọn àjàrà ti rúwé, ati pé bóyá àwọn igi èso pomegiranate tí ń tanná.

¹²Kí n tó fura, ìfẹ́ tí ṣe mí bí ẹni tí ó wà ninu ọkọ̀ ogun, tí ara ń wá bíi kí ó bọ́ sójú ogun.

¹³Máa pada bọ̀, máa pada bọ̀, ìwọ ọmọbinrin ará Ṣulamu. Máa pada bọ̀, kí á lè máa fi ọ́ ṣe ìran wò. Ẹ óo ṣe máa fi ará Ṣulamu ṣe ìran wò bí ẹni wo ẹni tí ó ń jó níwájú ọ̀wọ́ ọmọ ogun meji?