Read yoruba Ìwé ti Aisaya 24 Bible Online

Ìwé ti Aisaya 24 - yoruba bible

Ìwé ti Aisaya 24

¹Ẹ wò ó! OLUWA yóo fọ́ gbogbo ayé wómúwómú yóo sì sọ ọ́ di ahoro. Yóo dojú rẹ̀ rú, yóo sì fọ́n àwọn eniyan inú rẹ̀ ká.

²Ohun tí ó ṣẹlẹ̀ sí àwọn ará ìlú ni yóo ṣẹlẹ̀ sí alufaa; ohun tí ó ṣẹlẹ̀ sí ẹrú yóo ṣẹlẹ̀ sí olówó rẹ̀; ohun tí ó ṣe ọmọ-ọ̀dọ̀ ni yóo ṣe ọ̀gá rẹ̀; ohun tí ó ṣe ẹni tí ń rà ni yóo ṣe ẹni tí ń tà. Ohun tí ó ṣe ẹni tí ń yá ni lówó ni yóo ṣe ẹni tí à ń yá lówó. Ohun tí ó ṣe onígbèsè ni yóo ṣe ẹni tí a jẹ lówó.

³Ogun yóo kó ilé ayé, yóo di òfo patapata. Nítorí OLUWA ni ó sọ bẹ́ẹ̀.

⁴Ilẹ̀ ń ṣọ̀fọ̀, gbogbo nǹkan ń rọ. Ayé ń joró, ó sì ń ṣá àwọn ọ̀run ń joró pẹlu.

⁵Àwọn tí ń gbé inú ayé ti ba ilé ayé jẹ́, nítorí pé wọ́n ti rú àwọn òfin wọ́n ti tàpá sí àwọn ìlànà wọ́n sì da majẹmu ayérayé.

⁶Nítorí náà ègún ń pa ayé run lọ. Àwọn eniyan inú rẹ̀ ń jìyà ẹ̀ṣẹ̀ wọn, iná ń jó àwọn olùgbé inú rẹ̀, eniyan díẹ̀ ni ó sì kù.

⁷Ọtí waini ń ṣọ̀fọ̀. Igi èso àjàrà ń joró, gbogbo àwọn tí ń ṣe àríyá ti ń kẹ́dùn.

⁸Ìró ìlù ayọ̀ ti dákẹ́, ariwo àwọn alárìíyá ti dópin. Àwọn tí ń tẹ dùùrù ti dáwọ́ dúró.

⁹Wọn kò mu ọtí níbi tí wọ́n ti ń kọrin mọ́ ọtí líle sì korò lẹ́nu àwọn tí ń mu ún.

¹⁰Ìlú ìdàrúdàpọ̀ ti wó palẹ̀, ó ti dòfo, gbogbo ìlẹ̀kùn ilé ti tì, kò sì sí ẹni tí ó lè wọlé.

¹¹Ariwo ta lóde nítorí kò sí ọtí waini, oòrùn ayọ̀ ti wọ̀; ayọ̀ di àwátì ní ilẹ̀ náà.

¹²Gbogbo ìlú ti di ahoro, wọ́n ti wó ẹnu ibodè ìlú wómúwómú.

¹³Bẹ́ẹ̀ ní yóo rí ní ilẹ̀ ayé, láàrin àwọn orílẹ̀-èdè bí igi olifi tí a ti gbọn gbogbo èso rẹ̀ sílẹ̀, lẹ́yìn tí a ti kórè tán ninu ọgbà àjàrà.

¹⁴Wọ́n gbé ohùn wọn sókè, wọ́n ń kọrin ayọ̀, wọ́n ń yin OLUWA lógo láti ìhà ìwọ̀-oòrùn wá.

¹⁵Nítorí náà ẹ fi ògo fún OLUWA ní ìhà ìlà-oòrùn; ẹ̀yin tí ń gbé etí òkun, ẹ fògo fún OLUWA Ọlọrun Israẹli.

¹⁶Láti òpin ayé ni a ti ń gbọ́ ọpọlọpọ orin ìyìn, wọ́n ń fi ògo fún Olódodo. Ṣugbọn èmi sọ pé: “Mò ń rù, mò ń joro, mò ń joro, mo gbé! Nítorí pé àwọn ọ̀dàlẹ̀ ń dalẹ̀, wọ́n ń dalẹ̀, wọ́n ń hùwà àgàbàgebè.”

¹⁷Ẹ̀rù ati kòtò, ati tàkúté ń bẹ níwájú yín ẹ̀yin tí ẹ̀ ń gbé ilẹ̀ ayé.

¹⁸Ẹni tí ẹ̀rù bá bà tí ó sá, yóo já sinu kòtò, ẹni tí ó bá rá pálá jáde ninu kòtò yóo kó sinu tàkúté. Nítorí pé àwọn fèrèsé ojú ọ̀run ti ṣí, àwọn ìpilẹ̀ṣẹ̀ ayé sì mì tìtì.

¹⁹Ayé ti fọ́, ayé ti fàya, ayé sì mì tìtì.

²⁰Ayé ń ta gbọ̀n-ọ́n-gbọ̀n-ọ́n bí ọ̀mùtí, ó ń mì bí abà oko. Ẹrù ẹ̀ṣẹ̀ rẹ̀ wọ̀ ọ́ lọ́rùn, ó wó lulẹ̀, kò ní dìde mọ́.

²¹Ní àkókò náà, OLUWA yóo fìyà jẹ àwọn ogun ọ̀run, lọ́run; ati àwọn ọba ayé, lórí ilẹ̀ ayé.

²²A óo gbá gbogbo wọn jọ pọ̀ sinu kòtò bí ẹlẹ́wọ̀n, wọn óo wà ní àtìmọ́lé ninu ẹ̀wọ̀n. Lẹ́yìn ọpọlọpọ ọjọ́, a óo fìyà jẹ wọ́n.

²³Òṣùpá yóo dààmú, ìtìjú yóo sì bá oòrùn. Nítorí OLUWA àwọn ọmọ-ogun yóo jọba lórí òkè Sioni ati ní Jerusalẹmu. Yóo sì fi ògo rẹ̀ hàn níwájú àwọn àgbààgbà wọn.